Balusakumunu ya Kimfumu Lenda Kuma ya Nge

NTUMWA Polo ya kuvandaka Mukristu vandaka kutuba bandinga mingi yina bantu vandaka kutuba na ntangu na yandi. Beto lenda fwanisa nzo-nkanda ya yandi kotaka na iniversite ya bubu yai. Yandi bakaka mambote ti banswa yonso yina sitwaye ya Roma yonso vandaka na yo. (Bisalu 21:37-40; 22:3, 28) Badiplome yonso ya yandi bakaka lendaka kusadisa yandi na kukuma mvwama mpi muntu ya nene. Kansi, yandi tubaka nde: “Mambu yina ya mono vandaka kumona ya mfunu, ntangu yai mono ke mona yo mfunu ve sambu na Kristo. . . . Mono ke monaka mambu yina yonso bonso mvindu sambu na kuvanda na Kristo.” (Filipi 3:7, 8) Sambu na nki Polo kutubaka mutindu yai?

Polo kuzabanaka ntete na zina ya Saule ya Tarse mpi muntu ya vandaka kunyokula bantu “yina kuvandaka na Nzila.” (NW) Yandi kumaka Mukristu na nima ya kumona mbona-meso ya Yezu yina mefutumukaka mpi mebakaka lukumu. (Bisalu 9:1-19) Sambu na Polo, mambu yai ya yandi monaka na nzila ya Damasi kundimisaka yandi na kukatula ntembe yonso nde Yezu vandaka Mesia, to Kristu, yina Nzambi silaka, mfumu ya Kimfumu yina Nzambi silaka. Yo balulaka mpenza luzingu ya Polo, mutindu mambu yai yandi tubaka awa na zulu kemonisaka yo. Disongidila nde, Polo kubalulaka ntima sambu yandi vandaka ti ntima ya masonga.​—Galatia 1:13-16.

Na Biblia, kisongi-dyambu ya bo kelutaka kubalula nde “kubalula ntima” mekatuka na ngogo mosi ya Kigreki ya ketendula ntetentete “na nima ya kuzaba,” kansi “kuzaba na ntwala ve.” Disongidila, kubalula ntima ketendula nde muntu mebalula mabanza, bangindu, to lukanu na yandi, yandi meyambula banzila na yandi ya ntama sambu yandi memona nde yo tanatila yandi ve ata kima mosi ya mbote. (Bisalu 3:19; Kusonga 2:5) Polo kubikaka ve nde dyambu ya mfunu yina kubwilaka yandi na nzila ya Damasi kuvanda kaka kima ya kusimbaka mawi na yandi to nkutu nde yo vanda kaka eksperiansi ya kimpeve. Yandi monaka yo bonso kima ya kukangulaka yandi mabanza na kubakisa nde luzingu na yandi ya ntama, ya kukonda kuzaba Kristu, vandaka na mfunu ve. Yandi bakisaka mpi nde, sambu na kubaka mambote ya nzayilu ya mpa yina metala Kristu ya yandi bakaka , yo lombaka nde yandi sala kima mosi sambu na kutomisa luzingu na yandi.​—Roma 2:4; Efezo 4:24.

Nsoba Yina Kunataka Balusakumunu Mingi

Nzayilu ya Nzambi yina Polo vandaka na yo ntete kukatukaka mingimingi na kadibundu ya Bafarize, kisika yandi vandaka kusambila ntete. Malongi na bo mingi vandaka bangindu ya bantu ti bansiku ya bambuta. Sambu na kimbeni yina bo vandaka ti yo kontre mabundu yankaka, Polo kusadilaka ve mbote tiya ti kikesa na yandi. Ata yandi vandaka kuyindula nde yandi vandaka kusadila Nzambi, yo ke pwelele nde yandi vandaka kunwanisa yandi.​—Filipi 3:5, 6.

Na nima ya kubaka nzayilu ya sikisiki ya Kristu ti ya kisika yandi kele na yo na lukanu ya Nzambi, Polo kubakisaka nde yo lombaka nde yandi pona: Keti yandi fwete bikala Mufarize mpi kulanda na kusala na kisika ya nene mpi ya lukumu, to yandi fwete balula luzingu na yandi mpi kuyantika kusala mambu yina vandaka mfunu sambu Nzambi kundima yandi? Yo kele kyese na kuzaba nde, Polo kuponaka kima ya mbote, sambu yandi tubaka nde: “Mono ke monaka nsoni ve na kuzabisa Nsangu ya Mbote yina. Sambu na Nsangu ya Mbote Nzambi ke gulusaka bantu yina yonso ke tulaka ntima na Yesu Kristo, ntete Bayuda, na nima bayina kele Bayuda ve.” (Roma 1:16) Polo kukumaka nsamuni ya kikesa ya nsangu ya mbote ya metala Kristu ti Kimfumu.

Bamvula mingi na nima, Polo kutubaka na bampangi na yandi Bakristu nde: “Mono ke tuba ve nde mono me baka ntete matabisi; kansi mono ke salaka kaka mambu mosi yai mpamba: Mono ke vilaka mambu yonso ya ntama, ebuna mono ke sosaka mpila ya kukuma na mambu yina kele na ntwala. Mono ke bakaka ntinu sambu na kubaka matabisi; matabisi yango yo yai: Nzambi ke solaka beto na kuzinga na zulu, na lusadisu ya Yesu Kristo.” (Filipi 3:13, 14) Polo kubakaka mambote ya nsangu ya mbote sambu yandi yambulaka na luzolo yonso mambu yina vandaka kukatula yandi na nzila ya Nzambi mpi yandi landaka na masonga yonso balukanu yina vandaka kuwakana ti lukanu ya Nzambi.

Inki Nge Fwete Sala?

Ziku nge mekatuka kuwa nsangu ya mbote ya Kimfumu ntama mingi ve. Keti kivuvu ya kuzinga kimakulu na paladisu mosi ya kukuka kesimbaka ntima na nge? Yo fwete simba nge sambu beto yonso kebutukaka ti mpusa ya kuzinga mpi ya kuvanda na ngemba mpi na lutaninu. Biblia ketuba nde Nzambi metulaka “dibanza ya kuzinga mvula na mvula” na ntima na beto. (Longi 3:11, NW) Yo kezola kutuba nde beto kebutukaka na kivuvu ya kuzinga na ntangu yina bantu tazinga mvula na mvula na ngemba mpi na kyese. Yo yai kima ya nsangu ya mbote ya Kimfumu kepesaka.

Kansi, sambu kivuvu yina kukuma kima ya kyeleka, yo kelomba nde nge sosa mpi nge bakisa mambu yina nsangu ya mbote ketubila. Ntumwa Polo kulongisilaka nde: “[Nge] ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.” (Roma 12:2) Yo yina, bonso Polo, na nina ya kubaka nzayilu mpi kubakisa, nge fwete pona.

Mbala yankaka, nge lenda vanda dezia ti mambu yankaka ya nge ketulaka ntima sambu na luzingu na nge ya bilumbu kekwisa. Kuvila ve nde Saule mpi kuvandaka ntete ti bangindu na yandi mosi ya metala luzolo ya Nzambi na ntwala nde yandi kuma ntumwa Polo. Kansi, na kifulu ya kukinga nde Nzambi kusadila nge mpi kima mosi ya kuyitukisa, sambu na nki ve kutadila mambu na masonga yonso? Kudiyula mutindu yai: ‘Keti mono mezaba mpenza luzolo ya Nzambi sambu na bantu ti ntoto? Inki kidimbu kesonga nde mambu ya mono ketulaka ntima kele ya kyeleka? Keti kidimbu na mono lenda vanda ya kyeleka kana beto tadila yo na nsemo ya ndinga ya Nzambi, Biblia?’ Yo kele mbi ve nde nge tadila malongi ya dibundu na nge na mutindu yai. Na kuta masonga, nge fwete ndima na kusala yo sambu Biblia kelongisila beto nde: “Beno tala mambu yonso mbote-mbote, ebuna beno simba mambu ya mbote.” (1 Tesalonika 5:21) Na kutuba ya mbote, keti kima ya meluta mfunu kele ve kusosa nde Nzambi kundima beto?​—Yoane 17:3; 1 Timoteo 2:3, 4.

Bamfumu ya mabundu lenda sila beto luzingu ya kukonda nsuka. Kansi, kana lusilu yina kewakana ve ti malongi yina kele na Biblia, yo tasadisa beto ve na kubaka balusakumunu ya Kimfumu ya Nzambi. Na Disolo na yandi ya mekwendaka nsangu ya yandi salaka na zulu ya Ngumba, Yezu kukebisaka na ngolo yonso nde: “Bantu yina ke bingaka mono nde: ‘Mfumu, Mfumu,’ bo yonso ve ta kota na Kimfumu ya Nzambi, kansi bantu yina ke salaka luzolo ya Tata na mono yina kele na zulu, bo kaka bantu ta kota na Kimfumu ya Nzambi.”​—Matayo 7:21.

Simba nde Yezu kutulaka dikebi mingi na kusala luzolo ya Tata na yandi nde yo kele kima ya ntete ya beto fwete lungisa sambu na kubaka balusakumunu ya Kimfumu ya Nzambi. Yo kezola kutuba nde, mambu yina lenda monana na meso nde yo kele mambu ya Nzambi kezolaka, yonso kevandaka ve mambu ya Nzambi kendimaka. Yezu kutubaka dyaka nde: “Na kilumbu yina, bantu mingi ta yula mono nde: ‘Mfumu, Mfumu! Beto ve bantu vandaka kuzabisa nsangu ya Nzambi na zina na nge? Beto ve bantu vandaka kubasisa bampeve ya mbi na zina na nge? Beto ve bantu vandaka kusala bidimbu mingi na zina na nge?’ Na ntangu yina mono ta tubila bo nde: ‘Mono me zabaka beno ntete ve. Beno bantu ke salaka mambu ya mbi, beno katuka awa na meso na mono!’” (Matayo 7:22, 23) Yo kele pwelele nde, kima ya mfunu kele nde beto zikisa kana beto kebakisa mpenza mbote nki yai nsangu ya mbote ya Kimfumu mpi na nima kusala mambu yina kewakana na yo.​—Matayo 7:24, 25.

Lusadisu Kele

Bamvula kuluta 100 meluta, Bambangi ya Yehowa ke na kulonga nsangu ya mbote ya Kimfumu ya Nzambi. Bo kesadilaka mikanda ti kutuba na munoko sambu na kusadisa bantu mingi na ntoto ya mvimba na mpila nde bo baka nzayilu ya kyeleka ya ketendula Kimfumu, balusakumunu yina yo tanata, mpi mambu yina bantu fwete sala sambu na kubaka balusakumunu yango.

Beto kelomba nge na kundima nsangu yina Bambangi ya Yehowa ke na kulonga. Kana nge ndima mpi nge zinga na kuwakana ti nsangu ya mbote, nge lenda baka balusakumunu ya nene sesepi yai mpamba ve, kansi ti na bilumbu yina kekwisa mpi ntangu Kimfumu ya Nzambi tayala ntoto ya mvimba.​—1 Timoteo 4:8.

Sala yo sesepi yai, sambu balusakumunu ya Kimfumu ya Nzambi mekuma penepene!

[Bifwanisu ya kele na lutiti 7]

Bambangi ya Yehowa kelongaka nsangu ya mbote ya Kimfumu ya Nzambi na nsadisa ya mikanda ti kutuba na munoko