Bangyufula ya Batangi

Kana beto tala luzolo ya mbote yina Yehowa kevandaka na yo na kulolula masumu na nsadisa ya kimenga ya nkudulu, sambu na nki yo ke mfunu nde Bakristu kufunguna masumu na bo na bankuluntu ya dibundu?

Mutindu beto kemona yo na dyambu yina kubwilaka Davidi ti Bath-Sheba, Yehowa kulolulaka disumu ya Davidi, ata yo vandaka ya nene, sambu Davidi kubalulaka ntima na masonga yonso. Ntangu profete Natani kusolulaka na yandi, Davidi kufungunaka na masonga yonso nde: “Mono me sala masumu na meso ya Mfumu Nzambi.”​—2 Samuele 12:13.

Kansi, Yehowa kendimaka kaka ve mfunguna ya masonga yina nsumuki mesala mpi kulolula yandi, kansi yandi keyidikaka mambu yonso na zola yonso sambu muntu yina mesumuka kubeluka na kimpeve. Sambu na Davidi, Natani muntu kusadisaka yandi. Bubu yai, na dibundu ya Bukristu, beto kele ti bankuluntu, bantu ya kuyela na kimpeve. Longoki Yakobo ketendula nde: “Kana muntu mosi na kati na beno ke na maladi [na kimpeve], yandi binga bambuta ya dibundu; bo ta samba Nzambi sambu na yandi ti kutula yandi mafuta na ntu na zina ya [Yehowa]. Bisambu yina ya bo ta samba ti lukwikilu, yo ta belula muntu yina ya maladi, ebuna Mfumu Nzambi ta vutula ngolo na nitu na yandi, yandi ta lolula yandi mpi sambu na masumu ya yandi salaka.”​—Yakobo 5:14, 15.

Bankuluntu yina mekumaka ti eksperiansi lenda sala mambu mingi sambu na kulembika mpasi yina nsumuki kewa na ntima. Bo kesalaka ngolo sambu na kulanda mbandu ya Yehowa na ntangu bo kesolula ti nsumuki yina. Bo kesadilaka ve bangogo ya kulembisa muntu nitu, ata yo kelombaka nde bo sungika yandi na mutindu mosi ya kufwana. Kansi, bo ketalaka bampusa yina muntu yango kele na yo na ntangu yina. Bo kesalaka ngolo na ntima madidi na kusungika bangindu ya nsumuki na nsadisa ya Ndinga ya Nzambi. (Galatia 6:1) Ata muntu kezola ve kufunguna disumu na yandi na luzolo na yandi mosi, yandi lenda ndima na kubalula ntima kana bankuluntu zole mekwenda kusolula ti yandi, mutindu Natani kwendaka kusolula ti Davidi. Ebuna, lusadisu yina bankuluntu kenatilaka nsumuki yina kesadisaka yandi na kubwa dyaka ve na disumu yina mpi kukonda kukuma nsumuki ya ntima ngolo.​—Baebreo 10:26-31.

Ya kyeleka, yo ke pete ve na kuzabisa bantu yankaka mambu yina muntu kewila nsoni mpi kusosa ndolula. Yo kelombaka mpenza kikesa na ntima. Kansi, yindula fyoti mbandu yai. Bakala mosi yina kukukaka ve kufunguna disumu ya nene ya yandi salaka na bankuluntu ya dibundu kutubaka nde: “Mono vandaka kuwa mpasi mosi na ntima na mono ya vandaka kumana ve. Mono kumaka kubasika mingi na kisalu ya kusamuna, kansi mpasi yina vandaka kumana ve na ntima na mono.” Yandi yindulaka nde kufunguna na Nzambi na kati ya kisambu melunga, kansi yo kele mpidina ve ata fyoti, sambu yandi vandaka kuwa ntima mpasi kaka mutindu Ntotila Davidi kuwaka. (Nkunga 51:8, 11) Yo kele mpenza mbote mingi na kundima lusadisu ya zola yina Yehowa kepesaka beto na nsadisa ya bankuluntu!