Sambu na Nki Yo Kevandaka Mpasi na Kulomba Ndolula?

NA Yuli 2000, Kimvuka ya Bantu yina Kele na Kiyeka ya Kutula Bansiku na État ya Californie na États-Unis kuvotaka nsiku mosi sambu na kukonda kupesa ndola na bantu yina memonisa mawa na konso muntu yina melwala na aksida yina bo mesadisa yandi. Sambu na nki bo basisaka nsiku ya mutindu yina? Bo monaka nde kana kisumbula mosi melwadisa muntu to mebebisa kima, mbala mingi bantu kevandaka na badute na kulomba pardo nde mbala yankaka bantu ya tribinale tabakisa nde yandi mendima mukumba ya mbi na yandi. Na ndambu yankaka, bayina keyindulaka nde bo fwete lomba bo pardo nswalu lenda wa mpasi na ntima, mpi ka kisumbula ya fyoti lenda kituka kuswana ya ngolo.

Ya kyeleka, yo kele mfunu ve na kulomba pardo sambu na dyambu mosi ya mesalama na kintulumukina yina nge ke na foti ve. Mpi bantangu yankaka yo lenda vanda mayele na kusala mpenza dikebi na mambu ya nge ketuba. Kingana mosi ya ntama ketuba nde: “Kana nge tuba mingi, nge lenda sala mpi masumu; kana nge kele muntu ya mayele, nge ta tuba mingi ve.” (Bingana 10:19; 27:12) Ata mpidina, beto lenda monisa luzitu mpi kusadisa.

Kansi, keti yo kele ya kyeleka ve nde bantu mingi kelombaka ve pardo, ata yo talomba ve nde bo funda yandi na tribinale? Na nzo, nkento lenda bokuta nde, ‘Bakala na mono kelombaka ve pardo ata na dyambu mosi.’ Na kisalu mfumu ya kisalu lenda bokuta nde, ‘Bantu na mono ya kisalu kendimaka ve bifu na bo, mpi bo ketubaka ve ata mbala mosi nde lolula beto.’ Na nzo-nkanda longi lenda tuba nde, ‘Bo kelongaka ve bana na kutuba nde lolula mono.’

Mosi na kati ya bikuma yina kesalaka nde bantu kuvanda na badute na kulomba pardo lenda vanda boma ya kuyindula nde muntu yango tandima kwa yandi ve pardo yango. Kana yandi kemona nde bo tavutudila yandi mvutu ya mbi, yandi lenda tuba ve mambu ya yandi keyindula kibeni. Ya kyeleka, kana muntu yina bo mesala mbi meyantika kutina muntu yina kusalaka yandi mbi, yo lenda vanda mpasi mingi na kumanisa dikambu yango.

Kukonda kuyindula mawi ya bantu yankaka kele kikuma ya zole yina kesalaka nde bantu mingi kuvanda na badute na kulomba pardo. Mbala yankaka bo lenda yindula nde, ‘Kulomba pardo takatula ve mbi yina ya mu mesala dezia.’ Kansi bankaka kevandaka na badute na kulomba pardo sambu bo ketinaka malanda yina mbi ya bo salaka lenda nata. Bo ke kudiyulaka nde, ‘Keti bo tapesa munu ve makambu mpi bo lomba munu na kufuta?’ Kansi, kikuma ya nene ya kesalaka nde bantu kundima ve bifu na bo kele lulendo. Muntu yina kele na lulendo mingi sambu na kutuba nde “Lolula mono” lenda vanda keyindula nde, ‘Kana mu ndima mbi na mono, lukumu na mono takulumuka. Bo tamona mono muntu ya mpamba.’

Ata yo vanda sambu na konso nki kikuma yina, bantu mingi kekukaka ve kulomba pardo. Kansi, keti yo kele mpenza mfunu na kulomba pardo? Inki mambote kulomba pardo lenda nata?

[Kifwanisu ya kele na lutiti 3]

“Bo kelongaka ve bana na kutuba nde lolula mono”

[Kifwanisu ya kele na lutiti 3]

“Bantu na mono ya kisalu kendimaka ve bifu na bo”

[Kifwanisu ya kele na lutiti 3]

“Bakala na mono kelombaka ve pardo”