Bankento Yina Kele Bakristu ya Kwikama Kele Bansambidi ya Mfunu ya Nzambi

“Kitoko ya meso ke kusaka, yo mpi ke vilaka, kansi nkento yina ke zitisaka Mfumu Nzambi bo fweti kumisa yandi.”​—BINGANA 31:30.

1. Fwanisa mutindu Yehowa ti inza ketadilaka kitoko.

INZA ketulaka dikebi mingi na kitoko ya meso, mingimingi sambu na yina metala bankento. Kansi, Yehowa ketulaka ntetentete dikebi na kimuntu ya kati, yina lenda kuma kitoko mingi dyaka ntangu muntu kekuma mbuta. (Bingana 16:31) Yo yina, Biblia kesyamisa bankento nde: “Beno kusosa ve na kukuma kitoko na bima ya mutindu na mutindu yina ke monikaka na meso, bonso na kutunga nsuki, na kulwata bampete ti mayaka ya wolo, to na kulwata bilele ya kitoko. Kansi mbote kitoko na beno kuvanda kitoko yina kele na kati ya ntima, yina ke manaka ve, kitoko yina ke monikaka na bikalulu ya pima ti ya kukonda lulendo; yina kele mambu mosi ya mfunu na meso ya Nzambi.”​—1 Piere 3:3, 4.

2, 3. Inki mutindu bankento kusalaka dikabu na bo na kisalu ya kulonga nsangu ya mbote na mvu-nkama ya ntete, mpi nki mutindu bo yitaka kutubila yo?

² Bankento mingi yina Biblia ketubila kumonisaka mpeve yai ya mefwana na kupesa lukumu. Na mvu-nkama ya ntete, bamingi na kati na bo vandaka ti dibaku ya kusadila Yezu ti bantumwa na yandi kisalu. (Luka 8:1-3) Na nima, bankento yina kuvandaka Bakristu kukumaka bansamuni ya kikesa, bankaka kupesaka lusadisu ya kufwana na Bakristu ya babakala yina vandaka kutwadisa kisalu, ti ntumwa Polo. Mpi bankaka dyaka kuyambaka bo na banzo na bo, nkutu bo pesaka banzo na bo sambu na balukutakanu ya dibundu.

³ Masonuku kuyitaka kutuba nde Yehowa tasadila mingi bankento sambu na kulungisa lukanu na yandi. Mu mbandu, Yoele 2:28, 29 yitaka kutuba nde babakala ti bankento, baleke ti bambuta tabaka mpeve santu mpi bo tasala kisalu ya kumwanga nsangu ya mbote ya Kimfumu. Mbikudulu yango kuyantikaka kulungana na Pantekoti ya mvu 33 ya T.B. (Bisalu 2:1-4, 16-18) Nzambi kupesaka mpi bapakulami yankaka ya bankento makabu ya kusala bimpa, bonso dikabu ya kusala kisalu ya kiprofete. (Bisalu 21:8, 9) Sambu na kikesa na bo na kisalu, kibuka yai ya nene mpi ya kimpeve ya bampangi ya bankento yina kele basoda ya kwikama kusalaka nde Bukristu kumwangana nswalu na mvu-nkama ya ntete. Ya kyeleka, penepene na mvu 60 ya T.B., ntumwa Polo kusonikaka nde “bo me zabisaka Nsangu yina ya Mbote na bantu yonso.”​—Kolosai 1:23.

Bo Sikisaka Bo Sambu na Ngolo, Kikesa, mpi Kikalulu na Bo ya Kuyamba Banzenza

4. Sambu na nki Polo kuvandaka ti kikuma ya mbote ya kusikisa bankento mingi na dibundu ya Bukristu ya mvu-nkama ya ntete?

⁴ Ntumwa Polo kuvandaka na kyese mingimingi sambu na kisalu yina bankento vandaka kusala, kaka mutindu bankengi ya Bakristu ya bubu kebakaka kisalu yina bankento ya kikesa kesalaka. Na kati ya bankento yina Polo kutangaka na bazina kuvandaka ‘Trifene ti Trifoze, yina vandaka kusala kisalu ya Mfumu Yesu’ mpi ‘Perside, yandi salaka kisalu mingi sambu na Mfumu Yesu.’ (Roma 16:12) Polo kusonikaka nde Evodia ti Sintike ‘kusalaka ngolo ti yandi na kumwangisa nsangu ya mbote.’ (Filipi 4:2, 3) Prisila ti bakala na yandi Akilasi mpi kusalaka kumosi ti Polo. Nkutu, yandi ti Akilasi “zolaka kufwa” sambu na Polo, yo yina yandi sonikaka nde: “Mono ke pesaka bo mersi; mono mpamba ve, kansi ti badibundu yonso ya bantu yina kele Bayuda ve, bo mpi ke pesaka bo mersi.”​—Roma 16:3, 4; Bisalu 18:2.

5, 6. Na nki mitindu Prisila kubikaka mbandu ya mbote sambu na bampangi ya bankento bubu yai?

⁵ Inki kupesaka Prisila kikesa mpi ngolo? Disolo yina kemonisa kima ya kupesaka yandi kikesa kele na Bisalu 18:24-26, kisika beto ketanga nde yandi pesaka bakala na yandi maboko sambu na kusadisa Apolo, yina kuvandaka mutubi ya mbote, sambu na kuzabisa yandi mbotembote kyeleka yina Nzambi kusongaka bo. Yo kele kyeleka nde Prisila kuvandaka longoki ya mbote ya Ndinga ya Nzambi mpi ya malongi ya bantumwa. Nsukansuka, yandi kumaka ti bikalulu ya kuluta mbote yina kukumisaka yandi nkento mosi ya mfunu na meso ya Nzambi ti ya bakala na yandi, mpi muntu ya mfunu na dibundu ya ntete. Bubu, Bakristu ya bankento mingi yina kesalaka mingi kelongukaka Biblia ti kikesa yonso mpi yina kendimaka madya ya kimpeve yina Yehowa kepesaka na nzila ya “mpika ya mbote ti ya mayele” kevandaka mpi mfunu kiteso mosi.​—Luka 12:42.

⁶ Akilasi ti Prisila vandaka ngolo kibeni na kuyamba banzenza. Polo kuvandaka na nzo na bo mpi yandi salaka ti bo kisalu ya kutunga mpi kuteka batenta na Korinto. (Bisalu 18:1-3) Ntangu Akilasi ti nkento na yandi Prisila kukwendaka na Efezo mpi na nima na Roma, bo landaka kaka na kumonisa kikalulu ya Bukristu ya kuyamba banzenza. Nkutu, bo vandaka kupesa nzo na bo sambu na balukutakanu ya dibundu. (Bisalu 18:18, 19; 1 Korinto 16:8, 19) Nimfa ti Maria mama ya Yoane-Marko mpi kupesaka banzo na bo sambu na balukutakanu ya dibundu.​—Bisalu 12:12; Kolosai 4:15.

Bankento Kele Lusakumunu ya Mfunu Bubu Yai

7, 8. Inki mbandu ya mbote ya kisalu ya santu bankento mingi yina kele Bakristu kemonisaka bubu yai, mpi bo lenda tula ntima na nki mambu?

⁷ Kaka mutindu yo vandaka na mvu-nkama ya ntete, bubu yai, bankento yina kele Bakristu ya kwikama kesalaka kisalu ya mfunu mingi na kulungana ya lukanu ya Yehowa, mingimingi na kisalu ya kusamuna. Bampangi yai ya bankento kepesaka mbandu mosi ya mbote kibeni! Beto tadila mbandu ya Gwen, yina kusadilaka Yehowa na kwikama yonso bamvula kuluta 50 tii na lufwa na yandi na mvula 2002. Bakala na yandi ketuba nde: “Bantu ya mbanza na beto kuzabaka mbote nde Gwen vandaka nsamuni mosi ya kikesa. Na meso na yandi, yandi vandaka kumona nde nsukansuka konso muntu tazola Yehowa mpi tandima balusilu na yandi. Kwikama na yandi na Nzambi, na organizasio na yandi, mpi na dibuta na beto, yika mpi kikesa yina yandi vandaka kupesa beto na zola yonso ntangu beto vandaka ya kulemba, kuvandaka kibeni lusadisu ya ngolo sambu na mono ti bana na beto na luzingu na beto ya mvimba mpi ya kyese kumosi. Beto mevidisaka yandi kibeni.” Gwen ti bakala na yandi kuvandaka bankwelani bamvula 61.

⁸ Bankento mingi yina kele Bakristu, yina mekwelaka ntete ve ti ya mekwelaka, kele bapasudi-nzila mpi bamisionere. Bo kesepelaka kaka ti mwa bima ya mfunu ya kuzingila mpi bo kemwangaka nsangu ya Kimfumu yo vanda na bateritware ya bambanza ya nene to na babwala ya ntama. (Bisalu 1:8) Bamingi mebuyaka kutunga banzo na bo mosi to kubuta bana sambu na kusadila Yehowa mingi dyaka. Bankento yankaka kepesaka lusadisu ya kwikama na babakala na bo yina kele bankengi-ntambudi, mpi bankaka kesalaka na babiro ya Betele na ntoto ya mvimba. Ya kyeleka, bankento yai ya kukonda bwimi kele na kati ya “bima ya mfunu ya makanda yonso” (NW) yina mefulusa nzo ya Yehowa ti lukumu.​—Agai 2:7.

9, 10. Inki mutindu bantu ya mabuta mingi kumonisaka ntonda na bo sambu na mbandu ya mbote yina Bakristu ya bankento yina mekwelaka mpi bayina kele bamama kumonisaka?

⁹ Ya kyeleka, Bakristu mingi ya bankento kevandaka ti mikumba ya dibuta ya bo fwete lungisa; kansi, bo ketulaka mambote ya Kimfumu na kisika ya ntete. (Matayo 6:33) Mpangi mosi ya nkento ya kele mupasudi-nzila yina mekwelaka ntete ve kusonikaka nde: “Lukwikilu ya ngolo mpi mbandu ya mbote ya mama na mono kupusaka mono na kukuma mupasudi-nzila ya ntangu yonso. Ya kyeleka, yandi vandaka mupasudi-nzila yina mu vandaka kubasika ti yandi mingi na kisalu ya kusamuna.” Bakala mosi kutubaka mutindu yai sambu na nkento na yandi yina kele mama ya bana-bankento tanu ya kuyela: “Konso ntangu nzo na beto vandaka ya kukomba mpi bima yonso na ndonga. Bonnie kufulusaka ve bima mingi na nzo mpi bima yonso kuvandaka na ndonga na mpila nde dibuta na beto kutula dikebi na mambu ya kimpeve. Lusadisu na yandi na mutindu ya mbote ya kusadila mbongo kusalaka nde mu sala kisalu ya bantangu fyoti bamvula 32, yina kusadisaka mono na kupesa ntangu mingi na dibuta na beto mpi na mambu ya kimpeve. Nkento na mono kulongaka mpi bana mfunu ya kuvanda kikesa na kisalu. Yo fwanaka kibeni nde mu pesa yandi lukumu.” Bubu yai bo zole bakala ti nkento kesalaka na biro yina kele ntu-mbanza ya Bambangi ya Yehowa na ntoto ya mvimba.

¹⁰ Bakala mosi kusonikaka mutindu yai sambu na nkento na yandi yina kele mama ya bana ya bankento ti ya babakala ya kuyela: “Bikalulu ya Suzane yina keyangidikaka mono mingi kele zola na yandi sambu na Nzambi mpi sambu na bantu, ti mayele, kuwila bantu mawa, mpi masonga na yandi. Yandi vandaka kuyindula ntangu yonso nde Yehowa mefwana na kubaka bima na beto ya kuluta kitoko yina beto lenda pesa yandi, yandi mosi vandaka kusadila munsiku yai na kisalu ya Nzambi mpi na dibuta na yandi.” Sambu na lusadisu ya nkento na yandi, bakala yai kundimaka mikumba mingi ya kimpeve, bonso nkuluntu, mupasudi-nzila, kilandi ya nkengi ya nzyunga, mpi mambre ya Komite ya Kuwakana ti Balupitalu. Bankento ya mutindu yai kevandaka mfunu kibeni na meso ya babakala na bo, ya bampangi Bakristu, mpi kuluta dyaka, na meso ya Yehowa!​—Bingana 31:28, 30.

Bankento ya Mbote Yina Kezingaka Kukonda Bakala

11. (a) Inki mutindu Yehowa kumonisaka susi na yandi sambu na bankento ya kwikama, mingimingi mifwidi? (b) Na nki mambu Bakristu yina kele mifwidi ti bampangi-bankento yina kele ve ti babakala lenda tula ntima?

¹¹ Mbala mingi Yehowa vandaka kumonisa susi na yandi sambu na mifwidi. (Kulonga 27:19; Nkunga 68:6; Yezaya 10:1, 2) Yandi mesobaka ve. Yandi kelandaka na kutula dikebi mingi mpenza na mifwidi mpamba ve kansi mpi na bamama yina kele ve ti babakala mpi bankento yina meponaka kuzinga kukonda bakala to bayina mezwaka ntete ve bakala ya mbote ya Mukristu. (Malashi 3:6; Yakobo 1:27) Kana nge kele na kati ya bantu yina kesadila Yehowa kukonda lusadisu ya nkwelani mosi ya Mukristu, tula ntima nde nge kele na mfunu na meso ya Nzambi.

12. (a) Inki mutindu Bakristu mingi ya bankento kemonisaka kwikama na bo na Yehowa? (b) Bampangi na beto mingi ya bankento kenwanaka ti mawi ya nki mutindu?

¹² Beto baka mbandu ya bampangi na beto ya bankento yina kele Bakristu ya mekwelaka ntete ve sambu bo kelemfukaka na kwikama yonso na ndongisila ya Yehowa ya kukwela “kaka na mfumu.” (1 Korinto 7:39, NW; Bingana 3:1) Ndinga ya Nzambi kendimisa bo nde: ‘[Yehowa] tasala mambu ya kwikama na bantu yina kele ya kwikama.’ (2 Samuele 22:26, NW) Kansi, sambu na bantu mingi na kati na bo, kubikala kukonda bakala kele dyambu mosi ya mpasi kibeni. Mpangi mosi ya nkento ketuba nde: “Mu bakaka lukanu ya kukwela kaka na Mfumu, kansi mu kedilaka mbala mingi kana mu kemona banduku na mono kekwela Bakristu ya babakala ya mbote kansi mu kebikala kaka buna.” Mpangi yankaka ya nkento kutubaka nde: “Mu mesadilaka Yehowa bamvula 25. Mu mebakaka lukanu ya kusadila yandi na kwikama yonso, kansi mawi ya kukonda bakala kekatulaka mono kyese.” Yandi keyika nde: “Bampangi-bankento yina kele bonso mono kele na mfunu ya kikesa.” Inki mutindu beto lenda sadisa bankento yina ya kwikama?

13. (a) Mbandu ya bantu yina vandaka kwenda kutala mwana ya Yefte ya nkento kelonga beto inki? (b) Na nki mitindu yankaka beto lenda monisa susi na beto sambu na bampangi-bankento yina mekwelaka ntete ve na dibundu na beto?

¹³ Mutindu mosi ya kusadisa bo kemonana na mbandu mosi ya ntama. Ntangu mwana ya Yefte ya nkento kundimaka na kuzinga kukonda bakala, bantu kubakisaka nde yandi kuditambikaka. Inki bo salaka sambu na kupesa yandi kikesa? ‘Konso mvula bana-bankento ya Israele fweti kwenda kusikisa mwana ya Yefte ya nkento, muntu ya ntoto ya Galadi bilumbu iya.’ (Bazuzi 11:30-40) Kiteso mosi beto fwete sikisa na masonga yonso bampangi-bankento yina kelemfuka na kwikama yonso na nsiku ya Nzambi.a Na nki mutindu yankaka beto lenda monisa susi na beto sambu na bo? Na bisambu na beto, beto fwete lombaka Yehowa na kusadisa bampangi yai ya beto kezolaka mingi mpi ya kwikama na kulanda kusadila Nzambi na kwikama yonso. Beto fwete ndimisa bo nde Yehowa ti dibundu ya mvimba kezolaka bo mingi.​—Nkunga 37:28.

Mutindu Bibuti Yina Kesansaka Bana Bo Mosi Kenungaka

14, 15. (a) Sambu na nki Bakristu yina kele bamama yina kesansaka bana bo mosi kelombaka lusadisu na Yehowa? (b) Inki mutindu bibuti yina kesansaka bana bo mosi lenda sala mambu yina kewakana ti bisambu na bo?

¹⁴ Bakristu ya bankento yina kesansaka bana bo mosi kenwanaka mpi ti mambu mingi ya mpasi. Kansi, bo lenda lomba lusadisu na Yehowa sambu na kusansa bana na bo na kuwakana ti minsiku ya Biblia. Ya kyeleka, kana nge kesansaka bana nge mosi, nge lenda lungisa ve mikumba yai zole ya mama mpi ya tata na mbala mosi mpi na mambu yonso. Kansi, Yehowa tasadisa nge na kulungisa mikumba mingi ya nge kele na yo kana nge kelomba yandi lusadisu na lukwikilu. Mu mbandu: Kana nge kele ti saki mosi ya kilo mingi ya kufuluka ti madya yina nge fwete mata ti yo na zulu na nzo mosi ya etaze, keti nge tamata ti yo na kimatilu ya makulu kana kimatilu ya kuran (ascenseur) kele penepene? Mvutu kele nde ve! Kiteso mosi, kunata ve kilo ya ngolo ya mawi nge mosi, lomba Yehowa na kusadisa nge. Yandi kelomba nge na kubinga yandi. Nkunga 68:20 ketuba nde: “Beno pesa Mfumu Nzambi lukumu; yandi muntu ke bakaka kilo na beto konso kilumbu.” Kiteso mosi, 1 Piere 5:7 kelomba nge na kupesa Yehowa basusi na nge yonso, “sambu yandi muntu ke talaka mambu na nge.” Yo yina, ntangu kilo ya makambu ti basusi melutana nge, pesa yo na Tata na nge ya zulu, salaka mutindu yina “ntangu yonso.”​—1 Tesalonika 5:17; Nkunga 18:7; 55:23.

¹⁵ Mu mbandu, kana nge kele mama, ntembe kele ve nde nge kekudibanzabanzaka sambu na bupusi ya banduku yina bana na nge lenda kutana na yo na nzo-nkanda to mambu yankaka yina ketulaka lukwikilu na bo na kumekama yina bo lenda nwana na yo. (1 Korinto 15:33) Basusi yai kevandaka na kikuma kibeni. Kansi yo kele mpi mambu ya nge fwete tubila Yehowa na kisambu. Ya kyeleka, keti nge lenda samba ti bana na nge na ntwala nde bo kwenda na nzo-nkanda, mbala yankaka na nima ya kutadila mukapu ya lumbu kumosi? Bisambu ya masonga mpi ya sikisiki lenda bika ngindu ya mbote na mabanza ya bana na nge. Kuluta dyaka, ntangu nge kesalaka ngolo na kukanga ntima yonso sambu na kukotisa Ndinga ya Yehowa na ntima ya bana na nge, pana nge kelombaka lusakumunu ya Yehowa. (Kulonga 6:6, 7; Bingana 22:6) Kuvila ve nde, “Mfumu Nzambi ke tulaka meso na yandi na bantu ya mbote konso ntangu, yandi mpi ke waka bisambu na bo konso ntangu.”​—1 Piere 3:12; Filipi 4:6, 7.

16, 17. (a) Inki mwana mosi ya bakala kusalaka sambu na zola yina mama na yandi kumonisaka? (b) Inki bupusi mabanza ya kimpeve ya mama kuvandaka na yo na bana na yandi?

¹⁶ Beto tadila mbandu ya Olivia, mama ya bana sambanu (bankento tanu mpi bakala mosi). Bakala na yandi yina kele ve Mukristu kuyambulaka dibuta mwa ntangu fyoti na nima ya kubutuka ya mwana-nsuka na bo, kansi Olivia kubakaka mukumba ya kulonga bana na banzila ya Yehowa. Mwana na yandi ya bakala, Darren, ya melungisa bamvula 31 bubu yai mpi yina kele nkuluntu mpi mupasudi-nzila, kuvandaka ti bamvula kiteso ya 5 ntangu yina. Darren vandaka kubela maladi mosi ya keyangisaka yandi tii bubu yai, ebuna dyambu yai vandaka kuyika dyaka Olivia susi mingi. Darren kusonikaka mutindu yai ntangu yandi yindulaka bumwana na yandi: “Mu keyibuka kaka mutindu mu vandaka kufonga na mbeto na mono ya lupitalu mpi mu kekinga na mpusa yonso ntangu Mama takwisa. Yandi vandaka kufonga penepene na mono mpi kutangila mono Biblia konso kilumbu. Na nima, yandi vandaka kuyimbila mono nkunga ya Kimfumu yina kele na ntu-dyambu ‘Matondo, Yehowa.’b Tii bubu yai, mu kezolaka nkunga yai ya Kimfumu mingi kibeni.”

¹⁷ Kutula ntima mpi zola ya Olivia na Yehowa kusalaka nde yandi nunga na kusansa bana yandi mosi. (Bingana 3:5, 6) Nkadilu na yandi ya mbote kumonanaka na balukanu yina yandi vandaka kutudila bana na yandi. Darren ketuba nde: “Konso ntangu Mama vandaka kusyamisa beto na kubaka lukanu ya kusala kisalu ya ntangu yonso. Yo salaka nde mono ti bampangi na mono tanu ya bankento, beto yantikaka kusala kisalu ya ntangu yonso. Kansi, Mama kudisikisaka ve sambu na mambu yai na bantu yankaka. Mu kesalaka ngolo na kulanda bikalulu na yandi ya mbote.” Yo kele kyeleka nde bana yonso keyelaka ve sambu na kusadila Yehowa mutindu bana ya Olivia kusalaka. Kansi kana mama kesala ngolo na kuzitisa minsiku ya Biblia, yandi lenda tula ntima na lutwadisu mpi lusadisu ya zola ya Yehowa.​—Nkunga 32:8.

18. Inki mutindu beto lenda monisa nde beto kebaka na valere ngidika ya Yehowa ya dibundu ya Bukristu?

¹⁸ Nzambi kepesaka lusadisu mingi na nzila ya dibundu ya Bukristu, ti programe na yo ya madya ya kimpeve ya mbala na mbala, kimpangi ya Bukristu, mpi “makabu ya bantu” (NW) yina kevandaka ya kuyela na kimpeve. (Efezo 4:8) Bankuluntu ya kwikama kesalaka ngolo sambu na kupesa konso muntu kikesa na kati ya dibundu, bo ketulaka dikebi mingimingi na bampusa ya “bana-nsiona ti bamifwidi ya bankento na bampasi na bo.” (Yakobo 1:27) Yo yina, vandaka penepene ti bantu ya Yehowa, kudivandilaka ve nge mosi.​—Bingana 18:1; Roma 14:7.

Mfunu ya Bulemfu

19. Sambu na nki bulemfu ya nkento na bakala na yandi ketendulaka ve nde nkento kele na nsi ya makulu na yandi, mpi nki mbandu ya kele na Biblia kendima dibanza yai?

¹⁹ Yehowa kugangaka nkento sambu yandi vanda mulungisi ya bakala. (Kuyantika 2:18) Kansi, bulemfu ya nkento na bakala na yandi ketendulaka ve nde yandi kele na nsi ya makulu ya bakala na yandi. Na kutuba ya mbote, yo kepesaka nkento lukumu, mpi yo kepesaka yandi nzila ya kusadila mayele ti ngangu na yandi na kuwakana ti luzolo ya Nzambi. Bingana kapu ya 31 ketubila bisalu ya kuswaswana yina nkento ya bifu ya mbote mpenza vandaka kusala na Izraele ya ntama. Yandi vandaka kusadisa bansukami, kusala bilanga ya vinu, mpi kusumba ntoto. Ya kyeleka, “bakala na yandi [vandaka kutula] yandi ntima, bakala yina [kukondaka] kima ve.”​—Baverse 11, 16, 20.

20. (a) Inki mutindu nkento yina kele Mukristu fwete tadila mayele to makabu yina Nzambi mepesaka yandi? (b) Inki bikalulu ya mbote Estere kumonisaka, mpi nsukansuka nki mutindu Yehowa kusadilaka yandi?

²⁰ Nkento ya kekudikulumusaka mpi ya ketitaka Nzambi kekuditombulaka ve to kenwaninaka ve kisika ya bakala na yandi. (Bingana 16:18) Yandi kesadilaka ve mayele na yandi ntetentete sambu na kusosa mambote na yandi mosi ti bima ya kinsuni, kansi yandi kesadilaka makabu yina Nzambi mepesaka yandi ntete sambu na kusadila bankaka, disongidila dibuta na yandi, bampangi Bakristu, bantu ya kezingaka penepene na yandi, mpi kuluta dyaka, ya mambote ya Yehowa. (Galatia 6:10; Tito 2:3-5) Beto tadila mbandu yina kele na Biblia ya Ntotila ya Nkento Estere. Ata yandi vandaka kitoko na meso, yandi vandaka kudikulumusa mpi kulemfuka. (Estere 2:13, 15) Ntangu yandi kwelaka, yandi vandaka kumonisa luzitu mingi na bakala na yandi, Ntotila Zeresesi, kuluta Vasti, nkento ya ntete ya Ntotila. (Estere 1:10-12; 2:16, 17) Dyaka, Estere kuzitisaka mpi ntuma ya Mardoshe, kisoni na yandi, yina kulutaka yandi na mvula, na mambu yina vandaka ya mbote, nkutu ata ntangu yandi kumaka ntotila ya nkento. Kansi yandi vandaka ve zololo! Na kikesa yonso yandi fundaka Amani, bakala mosi ya ngolo mpi ya nku, yina kusalaka komplo ya kufwa Bayuda yonso. Yehowa kusadilaka Estere na ngolo yonso sambu na kutanina bantu na yandi.​—Estere 3:8–4:17; 7:1-10; 9:13.

21. Inki mutindu Mukristu ya nkento lenda kuma dyaka mfunu mingi na meso ya Yehowa?

²¹ Yo kele pwelele nde, na ntangu ya ntama mpi bubu yai, bankento yina ketitaka Nzambi memonisaka kudipesa na bo ya mvimba na Yehowa mpi na lusambu na yandi. Dyaka, bankento yina ketitaka Nzambi kevandaka mfunu na meso ya Yehowa. Beno bampangi-bankento yina kele Bakristu, beno pesa Yehowa nzila ya kubalula luzingu na beno malembemalembe na nsadisa ya mpeve na yandi sambu beno kuma ‘banzungu’ (NW) ya kuluta mbote, yina “[Nzambi meyidikaka sambu na, NW] bisalu yonso ya mbote.” (2 Timoteo 2:21; Roma 12:2) Sambu na bansambidi ya mfunu ya mutindu yai, Ndinga ya Nzambi ketuba nde: “Bo fweti ndima kisalu yonso ya yandi me sala, bantu yonso ya bwala fweti zitisa yandi.” (Bingana 31:31) Bika nde yo salama mutindu yina na konso muntu na kati na beno.

[Banoti na nsi ya lutiti]

Keti Nge Keyibuka?

• Inki mutindu Bakristu mingi ya bankento ya mvu-nkama ya ntete kumonisaka nde bo kele mfunu na meso ya Yehowa?

• Inki mutindu bampangi mingi ya bankento ya bubu yai mekudikumisaka mfunu na meso ya Nzambi?

• Na nki mitindu Yehowa kesadisaka bamama yina kesansaka bana bo mosi ti bampangi-bankento yina kele ve ti babakala?

• Inki mutindu nkento lenda monisa luzitu ya masonga na ngidika ya kiyeka?

[Lupangu ya kele na lutiti 31]

BAMBANDU SAMBU NA KUYINDULULA

Keti nge kezola kutadila bambandu yankaka ya bankento ya kwikama yina Biblia ketubila? Kana mpidina, tanga baverse yai kele awa na nsi. Ntangu nge keyindulula na bambandu ya bankento yai bazina na bo kele awa na nsi, sosa kubakisa minsiku yina nge lenda sadila na kiteso ya mingi na luzingu na nge.​—Roma 15:4.

◆ Sara: Kuyantika 12:1, 5; 13:18a; 21:9-12; 1 Piere 3:5, 6.

◆ Bankento ya Izraele yina vandaka ti kikalulu ya kukaba: Kubasika 35:5, 22, 25, 26; 36:3-7; Luka 21:1-4.

◆ Debora: Bazuzi 4:1–5:31.

◆ Ruti: Ruti 1:4, 5, 16, 17; 2:2, 3, 11-13; 4:15.

◆ Nkento ya bwala Shunemi: 2 Bantotila 4:8-37.

◆ Nkento mosi ya nsi ya Kanana: Matayo 15:22-28.

◆ Marta ti Maria: Marko 14:3-9; Luka 10:38-42; Yoane 11:17-29; 12:1-8.

◆ Tabita: Bisalu 9:36-41.

◆ Bana ya Filipi iya ya bankento: Bisalu 21:9.

◆ Febe: Roma 16:1, 2.

[Kifwanisu ya kele na lutiti 29]

Keti nge kesikisaka bampangi-bankento ya mekwelaka ve yina kezitisaka nsiku ya Nzambi na kwikama yonso?

[Kifwanisu ya kele na lutiti 30]

Inki mambu ya sikisiki bamama lenda tubila na kisambu yina bo kesalaka ti bana na ntwala nde bo kwenda na nzo-nkanda?