Keti Kwikama Kenataka Mambote?

KARL, mumonisi ya kompani mosi ya asiranse kutubaka nde: “Nge ke na kubebisa mbongo mingi kibeni na kompani ya asiranse ya mavimpi. Kana nge kwisa na kompani na munu, konso ngonda nge tabikalaka ti badolare 20 na mbongo na nge. Yo kele mingi.”a

Jens kuvutulaka nde: “Yo lenda vanda ya kyeleka nde mu ke na kubebisa mbongo. Kansi, mu mesala bamvula mingi kaka ti kompani yina ya asiranse ya mavimpi. Bo sadisaka munu mingi mpenza na bamvula meluta, yo yina mu kezola kubikala ya kwikama na bo.”

Karl kuvutulaka nde: “Kwikama kele kikalulu mosi ya mbote. Kansi, nge ke na kubebisa mbongo sambu na yo!”

Karl kutaka masonga. Mbala mingi, kuvanda ya kwikama na muntu yankaka lenda sala nde muntu kuvidisa mbongo mingi. Yo kelombaka mpi ntangu, kikesa, mpi mabanza yina kezitisaka lusilu. Keti kwikama kele mpenza mfunu?

Bamingi Kesikisaka Yo Kansi Bo Kesadilaka Yo Ve

Nsosa mosi yina kimvuka mosi ya kesosaka kuzaba bangindu ya bantu kusalaka na Allemagne, kumonisaka nde bantu 96 na kati ya nkama yina bo yulaka kutubaka nde kwikama kele kikalulu mosi ya mbote kibeni. Nsosa ya zole ya kimvuka yango kusalaka na kati ya baleke yina kele na bamvula 18 tii 24 kumonisaka nde baleke 2 na kati ya 3 kundimaka nde yo kele kikalulu mosi ya mbote.

Bantu mingi kesikisaka kikalulu ya kwikama, kansi kana bo lomba bo na kuvanda ya kwikama, bo kemonisaka yo ve. Mu mbandu, na bansi mingi ya Eropa, mbala mingi bankwelani to bantu ya dibuta mosi kemonisaka ve mpenza kwikama na kati na bo. Mbala mingi, banduku kemonisaka ve kwikama na banduku na bo. Dyaka, kwikama yina vandaka kumonana na ntangu ya ntama na kati ya mfumu ya kisalu ti nsadi na yandi to komersa mosi ti bakiliya na yandi kevandaka dyaka ve. Sambu na inki?

Bantangu yankaka, mambu mingi yina beto kesalaka na luzingu kepesaka beto ve ntangu mingi to ngolo ya mabanza ya kezitisaka balusilu yina yo kelombaka sambu na kuvanda ya kwikama. Bantu yina melembaka nitu sambu bangwisana na bo ti bantu yankaka mebebaka lenda kuma ti badute na kumonisa kwikama na muntu yankaka. Bankaka lenda vanda bo meponaka mutindu ya luzingu yina kelombaka ve nde bo monisa kwikama.

Ata yo vanda sambu na konso nki kikuma yina, kwikama kele kikalulu mosi ya bantu kesikisaka mingi, kansi bo kesadilaka yo ve. Yo yina, bika beto tadila bangyufula yai: Keti kwikama kenataka mambote? Kana nde ee, beto fwete kwikama na nani, mpi na nki mitindu? Kwikama kenataka inki mambote?

[Noti na nsi ya lutiti]

[Bangogo sambu na kubenda dikebi ya kele na lutiti 3]

Kwikama kele kikalulu mosi ya bantu kesikisaka mingi, kansi bo kesadilaka yo ve