Kubika Fyoti Bampasi Yonso Kumana!

“Mfumu Nzambi kele ditadi, kisalu na yandi kele ya kukuka.”​—KULONGA 32:4, NW.

1, 2. (a) Sambu na nki nge kebakaka na valere kivuvu ya kuzinga mvula na mvula? (b) Inki kebuyisaka bantu yankaka na kukwikila na Nzambi yina mesalaka balusilu ya kitoko sambu na bilumbu kekwisa?

KETI nge kewaka kyese ntangu nge keyindulaka luzingu ya Paladisu? Ziku nge kemonaka na mabanza mutindu nge tatambula na ntoto yai ya kitoko sambu na kulonguka bima ya mpila na mpila yina kezingaka muna. To mbala yankaka nge keyindula kyese yina nge tavanda na yo na kusala ti bantu yankaka sambu na kubongisa ntoto mpi kusadisa na kukitula yo paladisu. To ziku nge keyindula mayele yina nge lenda yedisa na yina metala kusala bifwanisu, kutunga banzo, to kusala mambu yankaka yina nge lenda zwa ve ntangu ya kusala na luzingu ya bubu yai ya mpasi. Ata nki mutindu, nge kebakaka na valere kivuvu ya kuzinga mvula na mvula yina Biblia kebinga nde “moyo ya kieleka,” disongidila, kuzinga kimakulu mutindu Yehowa kusilaka.​—1 Timoteo 6:19.

² Yo kele kyese mpi dibaku ya nene ya kuzabisa bantu yankaka kivuvu yina Biblia kepesa, buna ve? Kansi, bantu mingi kebuyaka kivuvu yina. Bo kemonaka yo bonso ndosi, bonso kima mosi yina lenda salama ve, mpi bonso nde yo kele sambu na bantu yina kendimaka konso kima. Yo lenda vanda nkutu mpasi sambu na bo na kukwikila na Nzambi yina kesila luzingu ya mvula na mvula na paladisu. Sambu na inki? Kima ya keyangisaka bantu yankaka kele dyambu ya bo kebingaka mbala mingi nde mambi. Bo keyindulaka nde kana Nzambi kevandaka, kana yandi kele nkwa-ngolo mpi Nzambi ya zola, mambi ti bampasi zolaka kuvanda ve na nsi-ntoto. Bo keyindulaka nde ata Nzambi mosi ve lenda ndima nde mambi kuvanda, to kana yandi kele, tuba nde yandi kele ve nkwa-ngolo to yandi kekudibanzaka ve sambu na beto. Mutindu yai ya kuyindula lenda ndimisa bantu yankaka. Satana kesadilaka mpenza mayele ya mbi sambu na kubebisa mabanza ya bantu.​—2 Korinto 4:4.

3. Inki ngyufula ya mpasi yina beto lenda sadisa bantu na kupesa mvutu, mpi sambu na nki kaka beto bantu fwete sala yo?

³ Mutindu beto kele Bambangi ya Yehowa, kaka beto bantu fwete sadisa bantu yina kekusama na Satana ti mayele ya nsi-ntoto yai. (1 Korinto 1:20; 3:19) Beto kebakisa kikuma bantu mingi kekwikilaka ve na balusilu ya Biblia. Bo kezabaka ve Yehowa. Ziku bo kezabaka ve zina na yandi to ntendula na yo, mpi bo kezabaka mambu fyoti to nkutu ata kima ve na yina metala bikalulu na yandi, to mpi bo kezabaka ve nde yandi kelungisaka balusilu na yandi yonso. Beto kele na dibaku ya nene ya kuzwa nzayilu yina. Bantangu yankaka, yo kele mbote na kutadila mutindu beto lenda sadisa bantu yina “me temukaka ve” na kuzwa mvutu na ngyufula mosi ya kuluta mpasi yina bantu keyulaka nde “Sambu na nki Nzambi mepesaka nzila na mambi ti bampasi?” (Efezo 4:18) Ntete beto tatadila mutindu ya mbote ya kupesa mvutu na ngyufula yai. Na nima, beto tatadila mutindu bikalulu ya Yehowa kemonana pwelele na mutindu yandi yidikaka dyambu yina.

Mutindu ya Mbote ya Kupesa Mvutu na Ngyufula Yai

4, 5. Inki beto lenda sala ntete kana muntu meyula beto kikuma ya Nzambi kepesaka nzila na bampasi? Tendula.

⁴ Kana muntu meyula beto nde sambu na nki Nzambi kepesaka nzila na bampasi, inki mvutu beto kepesaka? Beto lenda pesa yandi mvutu mbala mosi, kubanda na kutendula mambu yina kusalamaka na kilanga ya Edeni. Metode yai lenda vanda mbote bantangu yankaka. Kansi, beto fwete keba. Yo lenda vanda mfunu na kutula ntete fondasio. (Bingana 25:11; Kolosai 4:6) Bika beto tadila mambu tatu yina beto lenda sadila sambu na kusadisa muntu na ntwala ya kupesa mvutu na ngyufula yai.

⁵ Ntete, kana muntu kemonana nde yandi kekudiyangisa na mutindu mambi mefuluka na ntoto, yo lenda vanda nde yo mesimbaka yandi to bantu ya yandi kezolaka. Yo yina, yo kele mbote na kuyantika ntete na kumonisa mawa ya masonga. Ntumwa Polo kulongisilaka Bakristu nde: “Beno dila ti bantu yina ke dila.” (Roma 12:15) Kumonisa mawa, to kikalulu ya kuditula na kisika ya bantu yankaka, lenda simba ntima ya muntu yango. (1 Piere 3:8) Kana yandi kubakisa nde beto kekudibanza sambu na yandi, ntembe kele ve nde yandi tazola kuwa mambu ya beto kezola kutuba.

6, 7. Sambu na nki beto lenda sikisa muntu ya masonga yina meyula ngyufula sambu na mambu ya kimpeve yina keyangisa yandi?

⁶ Ya zole, beto lenda sikisa muntu ya masonga yina meyula ngyufula yai. Bantu yankaka keyindulaka nde mutindu bo kekudibanzaka sambu na ngyufula yai, yo kele kidimbu ya kemonisa nde bo kele na lukwikilu ve, to bo kezitisaka ve Nzambi. Yo lenda vanda nkutu nde mfumu mosi ya dibundu kusongaka bo mpidina. Kansi, kuyula ngyufula yai kevandaka ve ntangu yonso kidimbu ya kukonda lukwikilu, sambu ata bantu ya kwikama ya ntangu ya ntama meyulaka bangyufula ya mutindu mosi. Mu mbandu, muyimbi-bankunga Davidi kuyulaka nde: “Mfumu Nzambi, sambu na nki nge kele ntama? sambu na nki nge ke bumbana na ntangu ya mpasi?” (Nkunga 10:1) Mpi profete Habakuki kuyulaka nde: “Mfumu Nzambi, tii nki ntangu mono fweti binga nge sambu nge kwisa kusadisa beto ti kugulusa beto na maboko ya bantu ya nku, ebuna nge ndima? Sambu na nki nge ke bika mono kumona mambu ya mbi mutindu yai? Sambu na nki nge ke tala bampasi ke niokula bantu mpidiyai? Mono ke mona kaka lufwa ti nku me ziunga mono. Bisika yonso mono ke wa kaka makelele ya kunwana ti ya kuswana.”​—Habakuki 1:2, 3.

⁷ Bantu yai kuvandaka babakala ya kwikama yina vandaka kuzitisa Yehowa mingi. Keti Yehowa kunganinaka bo sambu bo yulaka bangyufula yina vandaka kuyangisa bo? Ve, nkutu yandi zolaka nde bo sonika bangyufula na bo ya masonga na Ndinga na yandi. Bubu yai, yo lenda vanda nde muntu ya kekudiyangisa sambu na mambi ya mefuluka na ntoto kele na nzala ya kimpeve mpi ke na mpusa ya ngolo ya kubaka bamvutu yina kaka Biblia mpamba lenda pesa. Kuvila ve nde Yezu kukumisaka bantu yina kele na nzala ya kimpeve, to bayina “kekudibanzaka sambu na mpusa na bo ya kimpeve.” (Matayo 5:3, NW) Yo kele dibaku ya nene mpenza na kusadisa bantu ya mutindu yai na kuzwa kyese yina Yezu silaka!

8. Inki malongi ya luvunu yina mepusaka bantu na kukwikila nde Nzambi kele na kisina ya bampasi, mpi nki mutindu beto lenda sadisa bo?

⁸ Ya tatu, beto lenda sadisa muntu yango na kubakisa nde Nzambi kele ve na kisina ya mambi yina mefuluka na nsi-ntoto. Bo melongaka bantu mingi nde Nzambi muntu keyalaka ntoto yai ya beto kezinga, nde yandi mekanaka na ntwala mambu yonso ya kesalamaka na luzingu na beto, mpi nde yandi kele ti bikuma yina kele maswekamu mpi yina beto lenda tendula ve ya yandi kemonisilaka bantu mpasi. Malongi yai kele ya luvunu. Yo kevwezaka Nzambi mpi kemonisaka nde yandi muntu ke na kisina ya mambi ti bampasi ya ntoto. Yo yina, beto fwete sadila Ndinga ya Nzambi sambu na kusongisa mambu yai. (2 Timoteo 3:16) Satana muntu keyala ngidika yai ya kubeba, kansi Yehowa ve. (1 Yoane 5:19) Yehowa kekanaka ve na ntwala mambu yonso yina kekuminaka bigangwa na yandi ya mayele, yandi kepesaka konso muntu kimpwanza mpi dibaku ya kupona na kati ya mambu ya mbote ti ya mbi. (Kulonga 30:19) Yehowa kele ve ata fyoti na kisina ya mambi, yandi keyinaka yo mpi kekudibanzaka sambu na bantu yina bo kemonisaka mpasi kukonda kikuma.​—Yobi 34:10; Bingana 6:16-19; 1 Piere 5:7.

9. Tanga mwa mikanda yina “mpika ya kwikama mpi ya mayele” mebasisaka sambu na kusadisa bantu na kubakisa kikuma ya Yehowa Nzambi kepesaka nzila na bampasi.

⁹ Kana nge metula fondasio ya mutindu yina, nge lenda mona nde muwi na nge ke ya kuyilama na kuzaba kikuma ya Nzambi kepesaka nzila nde bampasi kulanda na kusalama. “Mpika ya kwikama mpi ya mayele” (NW) mebasisaka mikanda mingi ya mbote sambu na kusadisa nge. (Matayo 25:45-47) Mu mbandu, na Lukutakanu ya Distrike “Bulemfu na Nzambi,” ya mvu 2005/06, bo basisaka trakiti ya ke na ntu-dyambu Kubika Fyoti Bampasi Yonso Kumana! Kana trakiti yai kele na ndinga na beno, sambu na nki ve kuyikana ti mambu ya ke na kati? Mutindu mosi, kapu ya mvimba ya mukanda Inki Biblia Kelongaka Mpenza? yina kele ntangu yai na bandinga 157 ketubila ngyufula yai ya mfunu. Sadila mingi mikanda yai. Yo ketendula pwelele mambu yina kubasisaka ntembe na Edeni, mambu ya metala nswa ya Yehowa ya kuyala luyalanganu ya mvimba, mpi kikuma yandi yidikaka mambu yango na mutindu yina. Kuvila mpi ve nde ntangu nge ketendula disolo yai, nge ke na kupesa muwi na nge nzayilu mosi ya kuluta mfunu. Yo kele nzayilu ya Yehowa ti ya bikalulu na yandi ya kitoko.

Tubila Mingimingi Bikalulu ya Yehowa

10. Sambu na nki bantu mingi kemonaka mpasi na kubakisa kikuma ya Nzambi mepesaka nzila na bampasi, mpi nki nzayilu lenda sadisa bo?

¹⁰ Ntangu nge kesadisa bantu na kubakisa kikuma ya Yehowa mepesaka bantu nzila na kudiyala bo mosi na nsi ya bupusi ya Satana, sosa kubenda dikebi na bikalulu ya kitoko ya Yehowa. Bantu mingi kezabaka nde Nzambi kele ngolo sambu bo kewaka bantu yankaka kebinga yandi nde Nzambi Nkwa-Ngolo Yonso. Kansi, yo lenda vanda mpasi sambu na bo na kubakisa kikuma ya yandi kesadilaka ve ngolo na yandi ya nene sambu na kusukisa kukonda lunungu ti bampasi ntangu yai. Ziku bo kezabaka ve bikalulu yankaka ya Yehowa, bonso busantu, lunungu, mayele, mpi zola. Yehowa kemonisaka bikalulu yai na mutindu mosi ya kukuka mpi ya bukatikati. Yo yina, Biblia ketuba nde: “Kisalu na yandi kele ya kukuka.” (Kulonga 32:4, NW) Inki mutindu nge lenda benda dikebi na bikalulu yai ntangu nge kepesa mvutu na bangyufula ya bantu keyulaka mbala mingi sambu na dyambu yai? Bika beto tadila bambandu fyoti.

11, 12. (a) Sambu na nki mpila ya kulolula Adami ti Eva kuvandaka ve ntangu bo salaka disumu? (b) Sambu na nki Yehowa tandima ve nde masumu kuvanda kimakulu?

¹¹ Sambu na nki Yehowa kulolulaka ve Adami ti Eva? Mpila ya kulolula bo kuvandaka ve ata fyoti. Mutindu bo vandaka bantu ya kukuka, Adami ti Eva buyaka na luzolo yonso kimfumu ya Yehowa, kansi bo ndimaka lutwadisu ya Satana. Kima ya kuyituka kele ve na kumona nde ata kidimbu mosi ve kemonisa nde bankolami yai kubalulaka ntima. Kansi, ntangu bantu keyulaka kikuma ya Yehowa kulolulaka bo ve, ziku bo kekudiyulaka sambu na nki Yehowa kulembisaka ve bansiku na yandi mpi kundimaka nde masumu ti kukolama kuvanda, ata yandi kezolaka yo ve. Mvutu ketadila kikalulu mosi ya mfunu ya kimuntu ya Yehowa: busantu na yandi.​—Kubasika 28:36; 39:30.

¹² Biblia ketubilaka mbala mingi busantu ya Yehowa. Kansi, yo kele mawa na kumona nde bantu fyoti mpamba na nsi-ntoto yai ya kubeba kebakisaka kikalulu yina. Yehowa kele bunkete, ya kukonda mvindu, mpi ya kukabwana na mitindu yonso ya masumu. (Yezaya 6:3; 59:2) Sambu na yina metala masumu, yandi mebongisaka mwaye ya kulolula mpi kukatula yo, kansi yandi tandima ve nde yo vanda kimakulu. Kana Yehowa kundimaka nde masumu kuvanda kimakulu, beto zolaka kuvanda ve ti kivuvu sambu na avenire. (Bingana 14:12) Na ntangu ya yandi metulaka, Yehowa tasala na mpila nde bigangwa yonso kuvutuka dyaka ya santu. Dyambu yai tasalama, sambu yo kele luzolo ya Muntu ya Santu.

13, 14. Sambu na nki Yehowa kufwaka ve bankolami na Edeni?

¹³ Sambu na nki Yehowa kufwaka ve bankolami yina mpi kusala bantu yankaka? Ya kyeleka, yandi vandaka na ngolo ya kusala yo, mpi ntama mingi ve yandi tasadila ngolo yina sambu na kufwa bantu yonso ya mbi. Bantu yankaka lenda yula nde ‘sambu na nki yandi salaka yo ve ntangu bansumuki kuvandaka kaka tatu na luyalanganu? Kana yandi salaka yo, masumu zolaka ve kupanzana na ntoto ya mvimba mpi mpasi yonso ya beto kemona zolaka kuvanda ve.’ Sambu na nki Yehowa kusalaka ve mambu mutindu yina? Kulonga 32:4 ketuba nde: “Banzila na yandi yonso kele ya lunungu.” Yehowa kevandaka ti lunungu ya kuluta mpenza. Ya kyeleka, “Mfumu Nzambi ke zolaka mambu ya kieleka.” (Nkunga 37:28) Sambu yandi kezolaka lunungu, Yehowa kubuyaka na kufwa bankolami na Edeni. Sambu na inki?

¹⁴ Kukolama ya Satana kubasisaka ntembe na yina metala nswa ya Nzambi ya kuyala luyalanganu. Lunungu ya Yehowa kulombaka nde ntembe ya Satana kuzwa mvutu ya mesimbama mpi na lunungu. Yo yina, ata bankolami fwanaka na kubaka ndola yina, kufwa bo na mbala mosi zolaka ve kupesa mvutu ya mbote. Yo zolaka kaka kuyika nzikisa ya kemonisa nde Yehowa kele na ngolo ya kuluta, kansi ntembe yango vandaka kutadila ve ngolo ya Yehowa. Dyaka, Yehowa kuzabisaka lukanu na yandi na Adami ti Eva. Yo lombaka nde bo buta bana mpi kufulusa ntoto, bo yala ntoto ti bigangwa yonso ya kele na kati na yo. (Kuyantika 1:28) Kana Yehowa kufwaka mbala mosi Adami ti Eva, lukanu ya yandi tubaka zolaka kulungana ve. Lunungu ya Yehowa zolaka kupesa nzila ata fyoti ve na dyambu ya mutindu yina, sambu yandi kelungisaka ntangu yonso balukanu na yandi.​—Yezaya 55:10, 11.

15, 16. Inki mutindu beto lenda sadisa bantu yina kepesaka “bangindu” yankaka na mutindu ya kumanisa ntembe yina kubasikaka na Edeni?

¹⁵ Keti kele ti muntu na luyalanganu ya kele ti mayele kuluta Yehowa yina lenda manisa kukolama yina? Bantu yankaka lenda pesa “bangindu” na bo mosi sambu na kukolama yina kusalamaka na Edeni. Kansi ntangu bo kesala mpidina, yo kele bonso bo kemonisa nde bo lenda yindula mbote kuluta na mutindu ya kumanisa ntembe yina. Yo lenda vanda nde bo kesala yo ve ti bangindu ya mbi, kansi bo kebakisa ve Yehowa mpi mayele na yandi ya kuyituka. Ntangu ntumwa Polo sonikilaka Bakristu ya Roma, yandi sosaka kubakisa na mudindu mayele ya Nzambi, yika mpi ‘mambu yina Nzambi vandaka kubumba’ na yina metala lukanu na yandi ya kusadila Kimfumu ya Mesia sambu na kugulusa bantu ya kwikama mpi kusantisa zina na yandi ya santu. Inki mutindu Polo kudiwaka na yina metala mayele ya Nzambi yina kusalaka lukanu yai? Yandi sukisaka mukanda na yandi ti bangogo yai: “Lukumu kuvanda na Nzambi na zina ya Yesu Kristo mvula na mvula! Kaka yandi mosi mpamba ke na mayele yonso! Amen.”​—Roma 11:25; 16:25-27.

¹⁶ Polo zabaka nde kaka Yehowa “mpamba ke na mayele yonso,” mayele ya kuluta kuzanguka na luyalanganu ya mvimba. Nani na kati ya bantu ya kukonda kukuka lenda yindula na mutindu ya kuluta mbote ya kumanisa konso dyambu ya mpasi? Nani lenda manisa ntembe ya kuluta nene yina Satana mebasisaka na yina metala nswa ya Yehowa ya kuyala? Beto fwete sadisa bantu na kuvanda ti luzitu bonso yina beto kevandaka na yo sambu na Nzambi yina kele “mayele.” (Yobi 9:4) Kana beto kebakisa mpenza mayele ya Yehowa, beto tatula ntima nde mutindu na yandi ya kumanisa makambu meluta mbote kibeni.​—Bingana 3:5, 6.

Monisa Ntonda Sambu na Kikalulu ya Kuluta Nene ya Yehowa

17. Inki mutindu kubakisa mbote zola ya Yehowa lenda sadisa bantu yina kemona mpasi na mpila Nzambi mepesaka nzila na bampasi?

¹⁷ “Nzambi kele zola.” (1 Yoane 4:8, NW) Biblia kemonisa na bangogo yai ya kebenda dikebi, kikalulu ya kuluta nene ya Yehowa, ya kuluta kusepedisa, mpi ya kuluta kupesa kikesa na bantu yina kemona mpasi sambu na mambi ya mefuluka na ntoto. Yehowa memonisaka zola na mitindu yonso yina yandi ketadilaka mpasi ya ngolo yina disumu menatilaka bigangwa na yandi. Zola kupusaka Yehowa na kupesa kivuvu na bana ya Adami ti Eva yina kukumaka bansumuki, yandi pesaka bo mwaye ya kupusana penepene na yandi mpi kusala bangwisana ya mbote ti yandi. Zola kupusaka Yehowa na kupesa nkudulu yina zolaka kukangula nzila na ndolula ya masumu yonso mpi kuvutula luzingu ya kukuka mpi ya mvula na mvula. (Yoane 3:16) Mpi zola kupusaka yandi na kumonisa ntima ya nda sambu na bantu mpi kupesa dibaku na bantu mingi na kubuya Satana mpi kupona Yehowa bonso Mfumu na bo.​—2 Piere 3:9.

18. Sambu na nki beto kele na kyese, mpi nki beto tatubila na disolo yina kelanda?

¹⁸ Ntangu pastere mosi vandaka kutuba na kimvuka mosi ya bantu yina kuvukanaka sambu na kusala aniversere ya dati yina bateroriste kufwaka bantu, yandi tubaka nde: “Beto kezaba ve kikuma ya Nzambi mepesaka nzila nde mambi ti bampasi kulanda na kusalama.” Yo ke mawa mpenza! Beto kele na kyese mpenza na mutindu beto mebakisaka dyambu yai! (Kulonga 29:28) Mpi sambu Yehowa kele mayele, muntu ya lunungu ti ya zola, beto kezaba nde ntama mingi ve yandi tasukisa bampasi yonso. Yandi mesilaka na kusala yo. (Kusonga 21:3, 4) Keti kivuvu kele sambu na bantu yonso yina mefwaka? Keti mutindu Yehowa kemanisa ntembe yina kubasikaka na Edeni kebika bo ya kukonda kivuvu? Ve. Zola kupusaka Yehowa na kubaka bangidika sambu na kufutumuna bo. Beto tatubila lufutumuku na disolo yina kelanda.

Inki Mvutu Nge Tapesa?

• Inki beto lenda tuba na muntu yina keyula kikuma ya Nzambi kepesaka nzila na bampasi?

• Inki mutindu busantu mpi lunungu ya Yehowa kemonana na mutindu yandi tadilaka bankolami na Edeni?

• Sambu na nki beto fwete sadisa bantu na kubakisa mbotembote zola ya Yehowa?

[Kifwanisu ya kele na lutiti 15]

Sosa kusadisa bantu yina kemona mpasi sambu na bampasi ya nsi-ntoto

[Bifwanisu ya kele na lutiti 17]

Bantu ya kwikama, Davidi ti Habakuki, kuyulaka Nzambi bangyufula ya masonga