Yedisa Bikalulu Yina Lenda Sadisa Nge na Kukumisa Bantu Balongoki
“Beno kwenda kukumisa bantu yonso balonguki.”—MATAYO 28:19.
1. Inki mayele mpi bikalulu yo lombaka nde bansadi yankaka ya Nzambi ya ntangu ya ntama kuvanda na yo mfunu?
BANTANGU yankaka, yo kelombaka nde bansadi ya Yehowa kuyedisa mayele mpi bikalulu yina tasadisa bo na kusala luzolo na yandi. Mu mbandu, ntangu Nzambi kusongaka Abrahami ti Sara na kukatuka na Ure, insi ya kimvwama, bo zitisaka ntuma yango, mpi nsukansuka yo lombaka nde bo yedisa bikalulu ti mayele yina bantu ya kezingaka na bantenta kevandaka na yo mfunu. (Baebreo 11:8, 9, 15) Sambu na kutwadisa bantu ya Izraele na Ntoto ya Lusilu, yo lombaka nde Yozue kuvanda ti kikesa, kutula ntima na Yehowa, mpi kuzaba bansiku na yandi. (Yozue 1:7-9) Ata yo lenda vanda nde Besalele ti Oholiabi kuvandaka dezia ti mayele mingi, ntembe kele ve nde mpeve ya Nzambi kuyikaka bo dyaka mayele na mpila nde bo sala mpi bo kengila kisalu ya kutunga tenta mpi kusala bisalu yankaka.—Kubasika 31:1-11.
2. Inki bangyufula ya ketadila kisalu ya kukumisa bantu balongoki beto tatadila?
2 Bamvu-nkama mingi na nima, Yezu Kristu kupesaka balongoki na yandi ntuma yai: “Beno kwenda kukumisa bantu yonso balonguki, . . . beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Ata muntu mosi ve kubakaka dezia dibaku ya kusala kisalu ya mutindu yai. Inki bikalulu kele mfunu sambu na kusala kisalu ya kukumisa bantu balongoki? Inki mutindu beto lenda yedisa bikalulu yango?
Monisa Zola Mingi Sambu na Nzambi
3. Ntuma ya kukumisa bantu balongoki kepesa beto nki dibaku?
3 Kusolula ti bantu mpi kusala kikesa sambu na kundimisa bo na kusambila Nzambi ya kyeleka kelombaka nde beto vanda na zola mingi sambu na Yehowa. Sambu bantu ya Izraele kumonisa zola na bo na Nzambi, yo vandaka kulomba nde bo lemfuka na ntima na bo ya mvimba na bansiku ya Nzambi, bo pesa bimenga ya mbote mpi bo kumisa Nzambi na bankunga. (Kulonga 10:12, 13; 30:19, 20; Nkunga 21:14; 96:1, 2; 138:5) Sambu beto kekumisaka bantu balongoki, beto mpi kezitisaka bansiku ya Nzambi. Kansi, beto kemonisaka mpi zola na beto sambu na Yehowa na ntangu beto kezabisaka bankaka mambu mpi balukanu na yandi. Yo yina, beto fwete tuba ti kundima, kupona bangogo ya mbote sambu na kumonisa mutindu beto kekudiwaka mpenza sambu na kivuvu yina Nzambi mepesaka beto.—1 Tesalonika 1:5; 1 Piere 3:15.
4. Sambu na nki Yezu vandaka kusepela na kulonga bantu mambu ya Yehowa?
4 Sambu yandi vandaka kuzola Yehowa mingi, Yezu vandaka kusepela mingi na kutubila balukanu ti Kimfumu ya Nzambi, mpi lusambu ya kyeleka. (Luka 8:1; Yoane 4:23, 24, 31) Nkutu, yandi tubaka nde: “Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala.” (Yoane 4:34) Bangogo yai ya muyimbi-bankunga kulunganaka na Yezu: “Nzambi na mono, mono ke zolaka mingi kusala mambu ya nge zola! Malongi na nge kele na ntima na mono. Mfumu, mono tubaka nsangu na nge ya mbote ntangu bantu na nge kutanaka; nge zaba nde mono ta bikaka ve na kutuba yo.”—Nkunga 40:9, 10; Baebreo 10:7-10.
5, 6. Inki kele kikalulu ya ntetentete ya bansamuni kele na yo mfunu sambu na kukumisa bantu balongoki?
5 Bantangu yankaka, zola sambu na Nzambi kepusaka bantu ya mpa yina mekatuka kulonguka kyeleka ya Biblia na kutubila mambu ya metala Yehowa mpi Kimfumu na yandi ti kundima yonso, na mpila nde bo kenungaka na kundimisa bantu yankaka na kutadila Masonuku. (Yoane 1:41) Zola sambu na Nzambi kele kima ya ntetentete ya kepusaka beto na kusala kisalu ya kukumisa bantu balongoki. Yo yina, bika beto tanga mpi kuyindulula Ndinga ya Nzambi mbala na mbala sambu zola yango kuvanda kaka ngolo.—1 Timoteo 4:6, 15; Kusonga 2:4.
6 Ntembe kele ve nde zola sambu na Yehowa kusadisaka Yezu Kristu na kuvanda longi mosi ya kikesa. Kansi, zola kuvandaka ve kaka kikuma mosi yina kusalaka nde yandi kuvanda nsamuni mosi ya mbote ya Kimfumu. Ebuna, inki kikalulu yankaka kusadisaka Yezu na kununga na kukumisa bantu balongoki?
Kudibanza na Zola Yonso Sambu na Bantu
7, 8. Inki mutindu Yezu vandaka kutadila bantu?
7 Yezu vandaka kudibanza sambu na bantu, mpi yandi vandaka kutudila bo dikebi mpenza. Ata na ntwala ya kukwisa na ntoto, ntangu yandi vandaka “kapita ya kisalu” ya Nzambi na zulu, yandi vandaka kusepela na bantu. (Bingana 8:30, 31) Ntangu yandi vandaka na ntoto, Yezu kuwilaka bantu mawa mpi kupesaka kikesa na bayina vandaka kukwenda na yandi. (Matayo 11:28-30) Yezu kumonisaka zola ti mawa ya Yehowa, mpi bikalulu yai kubendaka bantu na lusambu ya Nzambi mosi kaka ya kyeleka. Bantu ya mitindu yonso vandaka kuwidikila Yezu sambu yandi vandaka kudibanza na zola yonso sambu na bo mpi na mambu ya luzingu na bo.—Luka 7:36-50; 18:15-17; 19:1-10.
8 Ntangu muntu mosi kuyulaka mambu ya yandi fwete sala sambu na kubaka luzingu ya mvula na mvula, “Yesu talaka yandi ti kuzola na ntima.” (Marko 10:17-21) Sambu na yina metala bantu yankaka yina Yezu kulongaka na Betania, beto ketanga mutindu yai: “Yesu vandaka kuzola bo yonso: Marta, mpangi na yandi ya nkento, ti Lazare.” (Yoane 11:1, 5) Yezu vandaka kuzola mpenza bantu na mpila nde ata na ntangu yandi vandaka na mfunu ya kupema, yandi salaka yo ve kaka sambu na kulonga bo. (Marko 6:30-34) Zola ti kudibanza ya ngolo ya mutindu yina kusalaka nde Yezu kununga, kuluta bantu yonso, na kunata bantu na lusambu ya kyeleka.
9. Inki nkadilu Polo kuvandaka na yo ntangu yandi vandaka kukumisa bantu balongoki?
9 Ntumwa Polo mpi vandaka kudibanza mingi sambu na bantu yina yandi vandaka kulonga. Mu mbandu, yandi songaka bantu yina kukumaka Bakristu na Tesalonika nde: “Beto zolaka beno mingi, yo yina beto kabilaka beno nsangu ya mbote ya Nzambi kaka ve, kansi beto vandaka me yilama mpi na kukabila beno moyo na beto mosi, sambu kuzola yina ya beto zolaka beno yo vandaka kuzola mosi ya nene!” Sambu na bikesa yina Polo kusalaka na zola yonso, bantu yankaka ya Tesalonika ‘kubuyaka banzambi ya biteki sambu na kusadila Nzambi ya moyo.’ (1 Tesalonika 1:9; 2:8) Kana beto kekudibanza na zola yonso sambu na bantu, bonso Yezu ti Polo, beto mpi tasepela na kumona mutindu nsangu ya mbote tasimba ntima ya bantu yina kele ya “kuyilama sambu na kubaka luzingu ya mvula na mvula.”—Bisalu 13:48, NW.
Monisa Mpeve ya Kuditambika
10, 11. Sambu na nki mpeve ya kuditambika kele mfunu ntangu beto kesosa kukumisa bantu balongoki?
10 Bakristu yina kenungaka na kukumisa bantu balongoki kevandaka na luzolo ya kusala bibansa. Ya kyeleka, bo kemonaka ve nde kuzwa kimvwama kele kima ya kuluta mfunu. Nkutu, Yezu kusongaka balongoki na yandi nde: “Mpasi mingi na bamvwama na kukota na Kimfumu ya Nzambi!” Balongoki kuyitukaka na kuwa mambu yina, kansi Yezu kuyikaka nde: “Bampangi na mono, ke mpasi mingi na kukota na Kimfumu ya Nzambi! Mbisi yai ya nene, shamo, fweti mona mpasi na kukota na munoko ya sindani, kansi mvwama fweti mona mpasi ya kuluta diaka mingi na kukota na Kimfumu ya Nzambi.” (Marko 10:23-25) Yezu kulongisilaka balongoki na yandi na kuvanda ti luzingu ya kukonda mindondo sambu bo tula dikebi yonso na kisalu ya kukumisa bantu balongoki. (Matayo 6:22-24, 33) Sambu na nki mpeve ya kuditambika kesadisaka beto na kukumisa bantu balongoki?
11 Yo kelombaka kikesa mpenza sambu na kulonga mambu yonso yina Yezu kusongaka. Mbala mingi, Bakristu yina kezolaka kukumisa bantu balongoki kesalaka kikesa sambu na kulonguka Biblia konso mposo ti muntu mosi ya memonisa mpusa. Bansamuni mingi mesosaka kisalu ya ntangu fyoti, na kisika ya kusala bisalu ya kilumbu ya mvimba, sambu na kuzwa mabaku mingi ya kukutana ti bantu ya masonga. Bankaka melongukaka ndinga ya banzenza sambu na kulonga bantu ya teritware na bo yina ketubaka ndinga yango. Bankaka dyaka mebikaka banzo na bo mpi mekwendaka na bisika to na bansi yankaka sambu na kusala mingi na kisalu ya bilanga. (Matayo 9:37, 38) Kusala mambu yai yonso kelombaka kuvanda ti mpeve ya kuditambika. Kansi, kikalulu yankaka kele mfunu sambu na kununga na kukumisa bantu balongoki.
Kanga Ntima Kukonda Kubebisa Ntangu
12, 13. Sambu na nki kukanga ntima kele mfunu mingi sambu na kukumisa bantu balongoki?
12 Kukanga ntima kele kikalulu yankaka ya kesadisaka beto na kukumisa bantu balongoki. Nsangu na beto kelombaka nde bantu kusala mambu kukonda kusukinina, kansi mbala mingi yo kebakaka mpenza ntangu mpi kelombaka kukanga ntima sambu na kukumisa bantu balongoki. (1 Korinto 7:29) Yezu kukangaka ntima sambu na mpangi na yandi Yakobo. Ata yo kemonana nde Yakobo kuzabaka mbote kisalu ya kulonga ya Yezu, na ntangu mosi buna, kima mosi kukangaka yandi nzila na kukuma longoki. (Yoane 7:5) Kansi, na nsungi ya nkufi yina kulutaka na kati ya lufwa ya Kristu tii na Pantekoti ya mvu 33 T.B., yo ke pwelele nde Yakobo kukumaka longoki, sambu Masonuku ketuba nde yandi vukanaka na kisambu ti mama na yandi, bampangi na yandi, mpi bantumwa. (Bisalu 1:13, 14) Yakobo kuyelaka na kimpeve, mpi na nima yandi kumaka ti mikumba ya nene na dibundu ya Bukristu.—Bisalu 15:13; 1 Korinto 15:7.
13 Bonso bansadi bilanga, Bakristu kekunaka bima yina keyelaka mingi malembemalembe, disongidila kubakisa Ndinga ya Nzambi, zola sambu na Yehowa, mpi nkadilu bonso ya Kristu. Kusala mambu yai kelombaka kukanga ntima. Yakobo kusonikaka nde: “Bampangi, beno kanga ntima tii kilumbu ya Mfumu Yesu ta kwisa. Beno tala ntete nki mutindu muntu yina ke salaka bilanga ke kangaka ntima tii kuna bima ya mbote ta basika na ntoto: Kana yandi me kuna bambuma na ntoto, yandi ke kangaka ntima tii kuna mvula ya ntete ta noka, ebuna yandi ke kangaka ntima mpi tii kuna mvula ya nsuka-nsuka ta noka. Beno mpi beno kanga ntima; beno vanda na kikesa mingi, sambu kilumbu ya Mfumu Yesu ta kwisa me kuma penepene.” (Yakobo 5:7, 8) Yakobo vandaka kulongisila Bakristu na ‘kukanga ntima tii kilumbu ya Mfumu ta kwisa.’ Ntangu balongoki vandaka kubakisa ve kima mosi, Yezu vandaka kutendudila bo yo na kukanga ntima yonso mpi kupesa bo bambandu. (Matayo 13:10-23; Luka 19:11; 21:7; Bisalu 1:6-8) Ntangu yai ya Mfumu keyala dezia mpi ya beto kesala kikesa sambu na kukumisa bantu balongoki, beto mpi kele na mfunu ya kukanga ntima. Beto kele na mfunu ya kukanga ntima sambu na kupesa formasio na bantu yina kekuma balongoki ya Yezu na ntangu na beto.—Yoane 14:9.
14. Ata beto kekanga ntima, inki mutindu beto lenda sadila ntangu na beto na mayele yonso na ntangu beto kekumisa bantu balongoki?
14 Ata beto kekanga ntima, nsangu ya Kimfumu kebutaka ve mbuma na bantu mingi yina beto keyantikaka kulonguka Biblia ti bo. (Matayo 13:18-23) Yo yina, na nima ya kusala bikesa ya kufwana sambu na kusadisa bo, yo tavanda mayele na kuyambula kulutisa ntangu ti bantu ya mutindu yina mpi kusosa bayina lenda baka kyeleka ya Biblia na valere. (Longi 3:1, 6) Ya kyeleka, ata bantu yina kesepelaka na kyeleka lenda vanda na mfunu ya lusadisu sambu bo soba mabanza ti nkadilu na bo, mpi mambu ya bo ketulaka na kisika ya ntete na luzingu. Yo yina, beto kekangaka ntima, kaka mutindu Yezu kukangaka ntima sambu na balongoki na yandi yina kuvandaka na mfunu ya ntangu mingi sambu na kuyedisa nkadilu ya mbote.—Marko 9:33-37; 10:35-45.
Yedisa Mayele ya Kulongila
15, 16. Sambu na nki kudibongisa mbote mpi kutuba na mutindu ya pete kele mfunu na ntangu beto kekumisa bantu balongoki?
15 Zola sambu na Nzambi, kudibanza sambu na bantu, mpeve ya kuditambika, mpi kukanga ntima kele bikalulu ya mfunu sambu na kununga na kukumisa bantu balongoki. Yo kele mpi mfunu na kuyedisa mayele ya kulongila, sambu yo kesadisaka beto na kutendula mambu na mutindu ya pwelele mpi ya pete. Mu mbandu, mambu mingi yina Longi ya Nene, Yezu Kristu, kutubaka vandaka kusimba mingimingi ntima ya bantu sambu yo vandaka pete. Ziku nge keyibuka bansa yai ya Yezu: “Beno bumba kimvwama na zulu.” “Kima yina kele ya santu, beno lenda pesa yo ve na bambwa.” “Mayele ya Nzambi ke monikaka ya kieleka na bisalu na yo.” “Ya ntotila ya nene, beno pesa na ntotila ya nene; ya Nzambi, beno pesa na Nzambi.” (Matayo 6:20; 7:6; 11:19; 22:21) Ya kyeleka, Yezu kutubaka kaka ve bansa ya nkufi. Yandi longaka na mutindu ya pwelele mpi vandaka kutendula mambu na ntangu yo vandaka mfunu. Inki mutindu nge lenda landa mbandu ya kulongila ya Yezu?
16 Sambu na kulonga na mutindu ya pete mpi ya pwelele, yo kele mfunu na kudibongisa mbote. Nsamuni yina mekudibongisa ve kevandaka ti kikalulu ya kutuba mingi. Yandi lenda konda kubasisa bangindu ya mfunu sambu yandi tatuba mambu yonso ya yandi mezaba yina metala disolo ya bo ketadila. Kansi, nsamuni yina mekudibongisa mbote keyindulaka bampusa ya muntu yina yandi kelonga, keyindululaka disolo ya bo tatadila, mpi ketubilaka kaka mambu yina kele mfunu. (Bingana 15:28; 1 Korinto 2:1, 2) Yandi keyibukaka mambu yina longoki kezaba dezia mpi bangindu yina yandi fwete benda dikebi na yo na ntangu bo talonguka. Nsamuni lenda zaba mambu mingi ya ketadila disolo yango, kansi sambu na kulonga na mutindu ya pwelele, yo kelomba kukatula mambu yankaka ya kukonda mfunu.
17. Inki mutindu beto lenda sadisa bantu na kuyindula na Masonuku?
17 Na kisika ya kulonga bantu kaka bakyeleka, Yezu vandaka kusadisa bo mpi na kuyindula. Mu mbandu, kilumbu mosi yandi yulaka nde: “Simoni, nki nge ke banza? Banani ke futaka mpaku na bamfumu ya nsi-ntoto? Basitwaye to banzenza?” (Matayo 17:25) Mbala yankaka, beto kesepelaka mingi na kutendula baverse ya Biblia na mpila nde, yo lenda lomba nde beto kudiyala sambu na kupesa longoki nzila ya kutuba to ya kutendula dyambu ya beto ketadila na ntangu beto kelonguka. Na kutuba mbote, beto fwete yulaka ve bantu bangyufula mingi. Kansi, beto lenda sadisa bo na kubakisa bangindu ya Masonuku yina kele na mikanda ya beto kelongukilaka Biblia, na mayele yonso, mpi na nsadisa ya bingana ya mbote ti ya bangyufula ya kepusa na kuyindula.
18. Kuyedisa mayele ya ‘kulongila’ kelombaka inki?
18 Masonuku ketubila mayele ya ‘kulongila.’ (2 Timoteo 4:2; Tito 1:9) Mayele ya mutindu yina kelombaka kaka ve kusadisa muntu na kukanga mambu na ntu. Yo kelombaka mpi kusosa na kusadisa longoki ya Biblia na kubakisa luswaswanu yina kele na kati ya kyeleka ti luvunu, mambu ya mbote ti ya mbi, mayele ti buzoba. Na ntangu beto kesala mambu yai mpi kesala kikesa na kusadisa muntu na kuyedisa zola sambu na Yehowa na ntima na yandi, yandi lenda bakisa kikuma ya yandi fwete lemfukila Yehowa.
Sala Kisalu ya Kukumisa Bantu Balongoki ti Kikesa Yonso
19. Inki mutindu Bakristu yonso kepesaka maboko na kisalu ya kukumisa bantu balongoki?
19 Dibundu ya Bukristu kele organizasio ya kekumisaka bantu balongoki. Ntangu muntu kekumaka longoki, muntu fwete wa kyese kele kaka ve Mbangi ya Yehowa yina kukutanaka ti yandi mpi kusadisaka yandi na kulonguka mambu yina Biblia kelongaka. Kana mwana mosi mevila, kimvuka mosi ya bantu lenda kwenda kusosa yandi. Kansi, kaka muntu mosi mpamba ya kimvuka yina lenda mona mwana yango. Ata mpidina, ntangu bo tavutula mwana na bibuti na yandi, bantu yonso yina kwendaka kusosa mwana yango tasepela. (Luka 15:6, 7) Mutindu mosi, kisalu ya kukumisa bantu balongoki kele kisalu ya kimvuka. Bakristu yonso kesalaka kisalu ya kusosa bantu yina lenda kuma balongoki ya Yezu. Mpi ntangu muntu mosi ya mpa keyantikaka kukwenda na balukutakanu na Nzo ya Kimfumu, Bakristu yonso ya dibundu kesadisaka yandi na kubaka lusambu ya kyeleka na valere. (1 Korinto 14:24, 25) Yo yina, Bakristu yonso kesepelaka na kumona nde bantu mingi kekuma balongoki konso mvula.
20. Inki nge fwete sala kana nge kezola kulonga bantu yankaka kyeleka ya Biblia?
20 Bakristu mingi ya kwikama tasepela na kulonga muntu mambu ya metala Yehowa ti lusambu ya kyeleka. Kansi, ata konso bikesa yina bo lenda sala, mbala yankaka bo kekukaka ve kulungisa lukanu yina. Kana yo kele mutindu yina sambu na nge, landa na kuyedisa zola na nge sambu na Yehowa, na kudibanza sambu na bantu, na kumonisa mpeve ya kuditambika, na kukanga ntima, mpi na kusosa kutomisa mayele na nge ya kulongila. Kuluta yonso, samba Yehowa mpi zabisa yandi mpusa na nge ya kulonga kyeleka. (Longi 11:1) Baka kikesa na kuzaba nde konso kima ya nge kesala na kisalu ya Yehowa kepesa maboko na kisalu ya kukumisa bantu balongoki yina kepesa Nzambi lukumu.
Keti Nge Lenda Tendula?
• Sambu na nki kisalu ya kukumisa bantu balongoki ketulaka zola na beto sambu na Nzambi na mumekamu?
• Inki bikalulu bansamuni kele na yo mfunu sambu na kukumisa bantu balongoki?
• Kuyedisa mayele ya ‘kulongila’ kelombaka inki?
[Kifwanisu ya kele na lutiti 20]
Ntangu Bakristu kesalaka kisalu ya kukumisa bantu balongoki, bo kemonisaka zola na bo ya mingi sambu na Nzambi
[Kifwanisu ya kele na lutiti 22]
Sambu na nki bansamuni fwete kudibanza sambu na bankaka?
[Kifwanisu ya kele na lutiti 23]
Inki kele mwa bikalulu yina bansamuni kele na yo mfunu sambu na kukumisa bantu balongoki?
[Kifwanisu ya kele na lutiti 24]
Bakristu yonso kesepelaka na kumona mbuma ya mbote na kisalu ya kukumisa bantu balongoki