Keti Nge Ketadilaka Bankaka Mutindu Yehowa Ketadilaka Bo?
“Nitu [fwete vanda] ya kukabana ve . . . Bandambu yonso ya nitu fweti yindula bandambu ya nkaka ya nitu kiteso mosi.”—1 KOR. 12:25.
1. Inki mutindu nge kudiwaka ntangu nge kotaka sambu na mbala ya ntete na paladisu ya kimpeve?
NTANGU beto kabwanaka ti nsi-ntoto yai ya mbi mpi kuyantikaka kuvukana ti bansadi ya Yehowa, ntembe kele ve nde beto sepelaka na kumona zola ya ngolo mpi dikebi ya bo kekuditudilaka na kati na bo. Yo meswaswana mpenza ti kukonda luzitu, kuyinana, mpi kimbeni yina kemonanaka na bantu yina kele na nsi ya luyalu ya Satana! Beto mekotaka na paladisu ya kimpeve yina mefuluka na ngemba mpi bumosi.—Yez. 48:17, 18; 60:18; 65:25.
2. (a) Inki kima lenda vanda na bupusi na mutindu na beto ya kutadila bankaka? (b) Yo lenda lomba nde beto sala inki?
2 Kansi, mutindu ntangu keluta, kukonda kukuka na beto lenda sala nde beto yantika kutadila bampangi na beto ti bangindu ya mbi. Na kisika ya kumona bikalulu na bo ya mbote ya kimpeve, kukonda kukuka na beto lenda pusa beto na kukumisa nene bifu na bo. Na bunkufi, beto lenda tuba nde beto kevilaka na kutadila bo mutindu Yehowa ketadilaka bo. Kana dyambu yai mekumina beto, yo kelomba kutadila mabanza na beto na dikebi mpi kuwakanisa yo ti mabanza ya pwelele ya Yehowa.—Kub. 33:13.
Mutindu Yehowa Kemonaka Bampangi na Beto
3. Biblia kefwanisa dibundu ya Bukristu ti inki?
3 Mutindu yo kemonana na 1 Korinto 12:2-26, ntumwa Polo kufwanisaka dibundu ya Bakristu ya kupakulama ti nitu yina kele na “bandambu mingi.” Kaka mutindu binama ya nitu kevandaka ya kuswaswana, bantu ya dibundu kevandaka mpenza ya kuswaswana na bikalulu mpi na mayele. Ata mpidina, Yehowa kendimaka luswaswanu yai. Yandi kezolaka mpi kebakaka na valere konso muntu na kati ya dibundu. Yo yina mpi Polo kepesa ndongisila nde bantu ya dibundu ‘fweti yindula bantu ya nkaka kiteso mosi.’ Dyambu yai lenda vanda mpasi sambu bikalulu ya bantu yankaka lenda swaswana ti bikalulu na beto.
4. Sambu na nki yo lenda vanda mfunu nde beto soba mutindu na beto ya kutadila bampangi na beto?
4 Beto lenda vanda nkutu ti kikalulu ya kutala kaka bifu ya bampangi na beto. Na ntangu beto kesala mpidina, yo kele bonso beto kesadila kamera sambu na kutala kaka kisika mosi ya fyoti. Kansi, Yehowa ketalaka bisika yonso, yandi kemonaka muntu mpi bima yina kele na nzyunga na yandi. Beto lenda vanda na kikalulu ya kutala kaka kakima ya fyoti yina beto kezolaka ve, kansi Yehowa kemonaka muntu ya mvimba ti bikalulu na yandi yonso ya mbote. Kana beto kesala ngolo sambu na kulanda mbandu ya Yehowa, mpeve ya zola ti ya bumosi tavanda mpi na kati ya dibundu.—Ef. 4:1-3; 5:1, 2.
5. Sambu na nki yo mefwana ve na kusambisa bankaka?
5 Yezu kuzabaka mbote nde bantu ya kukonda kukuka kevandaka ntangu yonso ti kikalulu ya kusambisa bankaka. Yandi longisilaka beto nde: “Beno sambisa ve bantu ya nkaka, mpidina Nzambi ta sambisa beno ve.” (Mat. 7:1) Simba nde na ndinga ya kisina, Yezu kutubaka nde: “Beno yambula kusambisa bantu ya nkaka.” Yandi zabaka nde mingi na kati ya bawi na yandi kuvandaka ti kikalulu ya kusambisa bankaka. Keti beto meyedisaka kikalulu ya mutindu yai? Kana beto kele ti kikalulu yina, beto fwete sala ngolo sambu na kusoba na mpila nde bo sambisa beto ve. Ya kyeleka, beto kele banani sambu na kusambisa muntu mosi yina Yehowa mepesa mukumba to kutuba nde yandi fwete katuka na dibundu? Mpangi mosi lenda vanda ti bifu, kansi kana Yehowa kelanda na kundima yandi, keti yo mefwana nde beto buya yandi? (Yoa. 6:44) Keti beto kendima mpenza nde Yehowa ketambwisa organizasio na yandi mpi nde kana yo kelomba kusala bansoba, yandi mosi tasala yo na ntangu yina yandi mezola?—Tanga Roma 14:1-4.
6. Inki mutindu Yehowa ketadilaka bansadi na yandi?
6 Kima ya kuluta mbote ya metala Yehowa kele nde yandi lenda mona mambu yina konso Mukristu lenda sala ntangu yandi takuma ti nitu ya kukuka na ntoto ya mpa. Yehowa kezabaka mpi tii na nki kiteso konso Mukristu meyelaka na kimpeve. Yo yina, yandi kele ve na mfunu ya kutula dikebi na konso kifu na beto. Beto ketanga na Nkunga 103:12 nde: “Mutindu este kele ntama na weste, mutindu yo yina mpi yandi ke losa ntama masumu na beto.” Konso muntu na kati na beto fwete monisa ntonda kibeni sambu na dyambu yai!—Nk. 130:3.
7. Inki dilongi beto kebaka na mutindu Yehowa vandaka kutadila Davidi?
7 Beto kemona na kati ya Masonuku banzikisa ya kendimisa nde Yehowa mefwana na kutula dikebi kaka na bikalulu ya mbote ya muntu. Nzambi kubingaka Davidi nde: “Muntu na mono Davidi, yina vandaka kulemfukila mono mpenza ti kulanda bansiku na mono yonso, yina vandaka kusala kaka mambu yina ke pesaka mono kiese.” (1 Bant. 14:8) Ya kyeleka, beto mezaba nde Davidi kusalaka mambu yankaka yina kuvandaka mbi. Ata mpidina, Yehowa kuponaka na kutula dikebi kaka na bikalulu ya mbote ya Davidi sambu yandi zabaka nde ntima na yandi kuvandaka ya mbote.—1 Bans. 29:17.
Mona Bampangi na Nge Mutindu Yehowa Kemonaka Bo
8, 9. (a) Na nki mutindu beto lenda vanda bonso Yehowa? (b) Inki mbandu beto lenda baka sambu na kumonisa dyambu yai, mpi nki dilongi beto kebaka?
8 Yehowa lenda tanga ntima ya muntu, kansi beto ve. Dyambu yai yo mosi kele kikuma ya mbote sambu na kusambisa ve bankaka. Beto kezabaka mpi ve bikuma yonso ya kepusaka muntu na kusala mambu. Beto fwete sala ngolo sambu na kulanda mbandu ya Yehowa na kutulaka ve dikebi kaka na kukonda kukuka ya bantu. Kulanda mbandu ya Yehowa mutindu yina tavanda lukanu mosi ya mbote mpenza! Kana beto kesala mpidina, yo tasadisa beto na kuvanda ti bangwisana ya ngemba ti bampangi na beto ya babakala mpi ya bankento.—Ef. 4:23, 24.
9 Beto baka mbandu, yindula nde nzo mosi kele ya kubeba, mudidi ya manzanza yina kelutisaka masa ya mvula kele ya kupanzana, bafenetre ya kubukana, mpi plafon ya kubeba na masa ya mvula. Bantu mingi lenda tala nzo yina mpi kutuba nde bo fwete buka yo sambu yo kele kitoko ve. Kansi, muntu mosi lenda tala nzo yina mpi kuvanda ti mabanza ya kuswaswana. Yandi kemona kaka ve mutindu nzo yina kele ya kubeba, kansi yandi kemona nde bibaka na yo kele ngolo mpi bo lenda yidika yo dyaka. Yandi mesumba nzo yina mpi mesadisa mwa bisalu sambu na kubongisa bisika yina kele ya kubeba mpi kutomisa kitoko ya nzo yango. Na nima na yo, bantu ya kelutaka na nzila yina takuma kutuba nde nzo yango kele kitoko mpenza. Keti beto lenda vanda bonso muntu yai ya kusadisaka mwa bisalu sambu na kuyidika dyaka nzo? Na kisika ya kumona kaka bifu ya bampangi na beto, keti beto lenda mona bikalulu na bo ya mbote mpi bikesa ya bo kesala sambu na kulanda na kuyela na kimpeve? Kana beto kesala mutindu yina, beto tazolaka bampangi na beto sambu na bikalulu na bo ya mbote, mutindu Yehowa kezolaka bo.—Tanga Baebreo 6:10.
10. Inki mutindu ndongisila yina kele na Filipi 2:3, 4 lenda sadisa beto?
10 Ntumwa Polo kupesaka mwa bandongisila yina lenda sadisa beto na bangwisana na beto ti bampangi yonso na kati ya dibundu. Yandi longisilaka Bakristu nde: “Konso mambu yina ya beno ke sala, beno sala yo ve sambu na lukumu na beno mosi, to sambu na mabanza ya mpamba-mpamba ya kudisonga; kansi beno kudikulumusa na meso ya bantu ya nkaka, konso muntu kubaka bantu ya nkaka nde bo me luta yandi na mbote. Konso muntu na kati na beno kusosa mpi mambote ya bantu ya nkaka kansi mambote na yandi mosi mpamba ve.” (Filp. 2:3, 4) Kudikulumusa tasadisa beto na kuvanda ti mabanza ya mbote sambu na bantu yankaka. Kudibanza sambu na mambote ya bantu yankaka mpi kusosa kumona bikalulu na bo ya mbote tasadisa beto mpi na kutadila bo mutindu Yehowa ketadilaka bo.
11. Inki bansoba ya mesalama ya kele ti bupusi na mabundu mingi?
11 Bansoba ya mesalama na nsi-ntoto ya mvimba na bamvula ya mekatuka kuluta mepusaka bantu mingi na kukwenda kuzinga na bisika yankaka. Bantu ya mekatuka na bansi ya kuswaswana kezinga na bambanza yankaka ntangu yai. Bantu yankaka ya mekwisa na teritware na beto kesepela na kyeleka ya Biblia, mpi kevukana ti beto na lusambu ya Yehowa. Bo kele bantu “ya makanda yonso ti ya bandinga yonso ti ya bansi yonso.” (Kus. 7:9) Yo yina, mabundu na beto mingi mefuluka ti bantu ya mekatuka na bansi ya kuswaswana.
12. Inki mabanza beto fwete landa na kuvanda ti yo sambu na bantu yankaka, mpi sambu na nki yo lenda vanda mpasi na bantangu yankaka?
12 Kana yo kele mpidina na dibundu na beto, yo lenda lomba nde beto tula dikebi kuluta sambu na kulanda na kuvanda ti mabanza ya mbote sambu na bantu yankaka. Dyambu yai kelomba beto na kutadila ndongisila yina ntumwa Piere kupesaka ya ‘kuzola bampangi na beto bakristo na ntima ya kieleka’ mpi ‘kuzolana ngolo mpenza.’ (1 Pie. 1:22) Kuyedisa zola ya masonga lenda vanda mpasi na kimvuka yina bantu mekatuka na bisika ya kuswaswana. Mutindu ya kuzinga ya bampangi na beto lenda swaswana mingi mpenza ti yina ya beto, luswaswanu yina lenda vanda mpi na banzo-nkanda ya bo salaka, nivo na bo ya luzingu, mpi kinkulu na bo. Keti nge kemonaka mpasi sambu na kubakisa bangindu to mambu yankaka yina bo kesalaka? Bo mpi lenda mona mpasi sambu na kubakisa nge. Kansi, Biblia kelonga beto yonso nde: “Beno zola kimvuka yonso ya bampangi.”—1 Pie. 2:17, NW.
13. Na yina metala mutindu na beto ya kuyindula, inki bansoba lenda vanda mfunu na kusala?
13 Yo lenda vanda mfunu na kusala mwa bansoba na mutindu na beto ya kuyindula na mpila nde beto zola bampangi na beto yonso. (Tanga 2 Korinto 6:12, 13.) Keti yo mekwisilaka beto dezia na kutuba nde “Mu kebakila bo ve bangindu ya mbi, kansi . . . “ mpi na nima kutubila mwa bikalulu ya mbi yina beto keyindulaka nde yo kevandaka mingi na bantu ya kikanda mosi buna? Mawi ya mutindu yai kemonisa nde beto fwete katula bangindu ya mbi yina beto kevandaka na yo na ntima na beto. Beto lenda kudiyula nde, ‘Keti mu kesalaka kikesa mbala na mbala sambu na kuzaba bantu yina kele ti kinkulu ya kuswaswana ti ya munu?’ Kuditadila mutindu yai lenda sadisa beto na kusala bansoba sambu na kundima mpi kuzola bampangi na beto ya ntoto ya mvimba.
14, 15. (a) Pesa bambandu ya bantu yina kusobaka mutindu na bo ya kutadila bankaka. (b) Inki mutindu beto lenda landa mbandu na bo?
14 Biblia kepesa beto bambandu ya mbote ya bantu yina kusalaka bansoba, mosi na kati na bo kuvandaka ntumwa Piere. Sambu yandi vandaka Muyuda, Piere kuvandaka ve ti nswa ya kukota na nzo ya muntu yina kuvandaka ve Muyuda. Yindula mutindu yandi kudiwaka ntangu Nzambi kulombaka yandi na kukwenda na nzo ya Korneye, yina kuvandaka ve Muyuda mpi ya kukonda kuyotisa! Piere kusalaka bansoba, yandi bakisaka nde luzolo ya Nzambi kuvandaka nde bantu ya makanda yonso kukuma bantu ya dibundu ya Bukristu. (Bis. 10:9-35) Saule, yina kukumaka na nima ntumwa Polo, kusalaka mpi bansoba sambu na kukatula mabanza ya mbi. Yandi ndimaka nde yandi vandaka kumenga Bakristu ngolo kibeni na mpila nde yandi “vandaka kumonisa bantu ya dibundu ya Nzambi mpasi mingi, [yandi] vandaka kusosa mpi mpila ya kufwa dibundu.” Kansi, ntangu Mfumu Yezu kusongisaka Polo, yandi salaka bansoba ya nene mpi nkutu yantikaka kundima lutwadisu ya bantu yina yandi vandaka kunyokula ntete.—Gal. 1:13-20.
15 Ntembe kele ve nde, na lusadisu ya mpeve ya Yehowa, beto lenda sala bansoba na nkadilu na beto. Kana beto mona nde na ntima na beto kele ti bidimbu ya kubumbana ya bikalulu ya kubakila bankaka bangindu ya mbi, beto sala ngolo sambu na kukatula yo mpi “kusimba kimvuka yina ya mpeve ke pesaka, na lusadisu ya ngemba yina ke vukisaka” beto. (Ef. 4:3-6) Biblia kesyamisa beto na kulwata “zola, sambu yo kele kikangilu ya kukuka ya bumosi.”—Kol. 3:14, NW.
Beto Landa Mbandu ya Yehowa na Kisalu na Beto ya Kusamuna
16. Lukanu ya Nzambi kele nki sambu na bantu?
16 Ntumwa Polo kusonikaka nde: “Nzambi ke zolaka bantu yonso kiteso mosi.” (Roma 2:11) Lukanu ya Yehowa kele ya kukotisa mpi bantu ya makanda yonso na lusambu na yandi. (Tanga 1 Timoteo 2:3, 4.) Sambu na kulungisa lukanu yai, yandi mesalaka bangidika sambu nde bo zabisa “nsangu ya mbote ya mvula na mvula” na “bantu ya nsi-ntoto, na bantu ya makanda yonso ti ya bandinga yonso ti ya bansi yonso.” (Kus. 14:6) Yezu kutubaka nde: “Bilanga kele nsi-ntoto ya mvimba.” (Mat. 13:38) Dyambu yai ketendula nki sambu na nge mpi bantu ya dibuta na nge?
17. Inki mutindu beto lenda sadisa bantu ya mitindu yonso?
17 Beto yonso ve lenda kwenda na bisika ya ntama ya nsi-ntoto sambu na kuzabisa nsangu ya Kimfumu. Ata mpidina, beto lenda kuka kuzabisa nsangu yango na bantu yina mekatuka na bisika ya kuswaswana ya nsi-ntoto mpi ya kezinga na teritware na beto. Keti beto ketulaka dikebi na mabaku ya kuta kimbangi na bantu ya mitindu yonso, kansi kaka ve na bantu yina beto kelongaka banda ntama? Sambu na nki ve kubaka lukanu ya kusosa bantu yina mewaka ntete ve nsangu?—Roma 15:20, 21.
18. Inki mpusa Yezu kumonisaka sambu na bantu?
18 Yezu kuvandaka mpenza ti mpusa ya kusadisa bantu yonso. Yandi samunaka ve kaka na bwala mosi. Disolo mosi ya Biblia kesonga beto nde yandi “vandaka kwenda kutambula na babwala yonso ya nene ti ya fioti.” Ebuna, “ntangu yandi monaka bantu mingi-mingi, yandi wilaka bo mawa” mpi yandi monisaka mpusa ya kusadisa bo.—Mat. 9:35-37.
19, 20. Tanga mwa mitindu yina beto lenda monisa mpusa yina Yehowa ti Yezu kele na yo sambu na bantu ya mitindu yonso.
19 Na nki mitindu nge lenda monisa nkadilu ya mutindu mosi? Bankaka mesalaka kikesa sambu na kuta kimbangi na bisika yankaka ya teritware na bo yina bo mesalaka mingi ve. Yo lenda vanda bisika ya mumbongo, baparke, baparkingi, to na ntwala ya banzo ya bantu ya nene yina kevandaka mpasi na kukota. Bankaka mesalaka kikesa na kulonguka ndinga ya mpa sambu na kuzabisa nsangu na bantu ya kikanda mosi buna yina kezingaka na teritware na bo to na bimvuka yina bo mezabisaka ve nsangu na ntangu ya ntama. Kulonguka mutindu ya kupesa bantu mbote na ndinga na bo lenda vanda mutindu ya kumonisa nde nge kekudibanza sambu na mambote na bo. Kana beto lenda kuka ve kulonguka ndinga yankaka, keti beto lenda syamisa bantu yina kesala yo? Ya kyeleka, beto lenda tuba mbi ve sambu na bantu ya kesala mutindu yina, to kumonisa badute sambu na bikuma ya kepusa bo na kusala kikesa ya mutindu yina sambu na kusamuna na bantu ya nsi yankaka. Luzingu ya bantu yonso kele mfunu na meso ya Nzambi, mpi beto fwete mona mambu mutindu mosi ti yandi.—Kol. 3:10, 11.
20 Kutadila bantu mutindu Nzambi ketadilaka bo ketendula mpi kusamuna na bantu yonso, ata luzingu na bo kele nki mutindu. Ziku, bankaka kekonda banzo, bo kele mvindu, to kemonana nde bo kele na luzingu ya mansoni. Kana bantu ya kimvuka mosi buna kusadila beto mbi, yo fwete pusa beto ve na kuvanda ti bangindu ya mbi sambu na nsi na bo to kikanda na bo ya mvimba. Bantu yankaka ya kimvuka mosi kusalaka Polo mbi, kansi yandi bikaka ve nde yo pusa yandi na kuyambula kusamuna nsangu na bantu ya kimvuka yina. (Bis. 14:5-7, 19-22) Yandi vandaka kutula ntima nde bantu yankaka ya kimvuka yina tandima nsangu mpi tamonisa ntonda.
21. Inki mutindu kutadila bankaka mutindu Yehowa ketadilaka bo tasadisa nge?
21 Yo kele pwelele ntangu yai nde kuvanda ti mabanza ya mbote bonso ya Yehowa kele mfunu sambu na kuvanda ti bangwisana ya mbote ti bampangi yina beto kele na bo dibundu mosi, bampangi na beto ya ntoto ya mvimba, mpi bantu yina beto kekutanaka ti bo na kisalu ya kusamuna. Kana beto kesala ngolo sambu na kumonisa mabanza ya Yehowa na kiteso ya kuluta, beto tavanda bantu ya ketula ngemba ti bumosi. Beto takuka kusadisa bankaka na kuzola Yehowa, Nzambi yina “ke talaka [bantu] kiteso mosi” mpi kezolaka bantu yonso “sambu yandi muntu salaka bantu yonso.”—Yobi 34:19.
Keti Nge Lenda Pesa Mvutu?
• Inki mutindu ya mbi ya kutadila bampangi na beto, beto fwete sala ngolo na kubuya?
• Inki mutindu beto lenda landa mbandu ya Yehowa na mutindu na beto ya kutadila bampangi na beto?
• Inki malongi nge mebaka na yina metala mutindu na beto ya kutadila bampangi na beto ya nsi-ntoto ya mvimba?
• Inki mutindu beto lenda landa mbandu ya mutindu yina Yehowa ketadilaka bantu ntangu beto kele na kisalu ya kusamuna?