Ndima Kiyeka ya Yehowa

“Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.”​—1 YOA. 5:3.

1, 2. (a) Sambu na nki bantu mingi bubu yai kezolaka ve kulemfuka na kiyeka ya bantu yankaka? (b) Keti bantu yina kezolaka ve kuzitisa kiyeka ya bantu yankaka kekuditwadisaka mpenza bo mosi? Tendula.

BUBU yai bantu mingi kezolaka ve ngogo “kiyeka.” Bo kezolaka ve kulemfuka na luzolo ya muntu yankaka. Bantu yina kezolaka ve kuzitisa kiyeka ya bantu yankaka ketubaka nde: “Ata muntu mosi ve fwete songa mono mambu ya mu fwete sala.” Kansi, keti bantu yai kekuditwadisaka mpenza bo mosi? Ata fyoti ve! Mingi na kati na bo kelandaka minsiku ya bantu mingi yankaka yina ‘kelandaka bikalulu ya bantu ya ntangu yai.’ (Roma 12:2) Na kisika ya kuditwadisa bo mosi, bo kele “bampika ya mambu ya kisakasaka,” kana beto vutukila bangogo ya ntumwa Piere. (2 Pie. 2:19) Bo kelandaka ‘luzingu ya mbi ya nsi-ntoto yai; bo kelemfukaka na mfumu yina ke yalaka bampeve kele na mupepe,’ Satana Dyabulu.​—Ef. 2:2.

² Nsoniki mosi kutubaka na lulendo yonso nde: ‘Mu kepesa ve bibuti na mono to bantu yina kele ti kimfumu to Biblia kiyeka ya kuponina munu mambu yina kele kyeleka.’ Kansi, bantu yankaka lenda sadila ve mbote kiyeka na bo mpi lenda fwana ve na kubaka bulemfu na beto. Keti kubuya mpenza konso lutwadisu kele mvutu ya mbote? Kutadila fyoti bantu-dyambu ya bazulunalu kepesa ve mvutu ya mbote. Yo kele mawa na kumona nde na ntangu bantu kele mpenza na mfunu ya lutwadisu, bantu mingi kezolaka ve kundima yo.

Mutindu Beto Ketadilaka Kiyeka

3. Inki mutindu Bakristu ya mvu-nkama ya ntete kumonisaka nde bo vandaka ve kulemfuka na kiyeka ya bantu kukonda kuyindula?

³ Beto Bakristu, dibanza na beto meswaswana ti ya bantu ya nsi-ntoto. Yo ketendula ve nde beto kesalaka mambu yonso ya bo kesongaka beto kukonda kuyindula. Kansi, bantangu yankaka, beto kebuyaka kulemfuka na luzolo ya bantu yankaka ata bo kele ti kiyeka. Dyambu yai kukuminaka mpi Bakristu ya mvu-nkama ya ntete. Mu mbandu, ntangu bo songaka bantumwa na kuyambula kusamuna, bo lemfukaka ve na boma yonso na ntuma ya nganga-Nzambi ya nene mpi ya bamfumu yankaka yina kuvandaka na Sanedreni. Bo yambulaka ve kikalulu na bo ya mbote sambu na kulemfuka na kiyeka ya bantu.​—Tanga Bisalu 5:27-29.

4. Inki bambandu ya Masonuku ya Kiebreo kemonisa nde bansadi mingi ya Nzambi kulandaka luzingu yina bantu mingi vandaka kuzola ve?

⁴ Bansadi mingi ya Nzambi ya ntwala ya ntangu ya Bukristu kusalaka mambu ti lukanu ya mutindu mosi. Mu mbandu, Moize “zolaka ve nde bantu kubinga yandi mwana ya mwana ya mfumu ya nene ya nsi ya Ezipte. . . . kansi yandi zolaka kumona mpasi nzila mosi ti bantu ya Nzambi,” ata kusala mutindu yina kusalaka nde “mfumu ya nene [kuwa] makasi mingi.” (Baeb. 11:24, 25, 27) Ntangu nkento ya Potifare kusongaka yandi nde bo vukisa nitu, Yozefi kubuyaka, ata yandi zabaka nde nkento yina vandaka ti kiyeka ya kusala yandi mbi. (Kuy. 39:7-9) Daniele “zengaka na nsi ya ntima nde: ‘Mono lenda dia ve madia ti kunwa vinu ya ntotila,’” ata yo vandaka mpasi sambu mfumu ya bantu ya kisalu ya Babilone kundima lukanu na yandi sambu na dyambu yai. (Dan. 1:8-14) Bambandu yai kemonisa nde, na ntangu ya ntama, bantu ya Nzambi vandaka kubaka lukanu ya ngolo sambu na mambu ya mbote, ata malanda na yo kuvandaka nki mutindu. Bo vandaka kulemfukila ve bantu kaka sambu bo ndima bo. Beto mpi fwete landa mbandu na bo.

5. Inki mutindu mpila na beto ya kutadila kiyeka meswaswana ti ya nsi-ntoto?

⁵ Lukanu na beto ya ngolo mefwanana ve ti ntu-ngolo ya mpamba. Beto kele mpi ve bonso bantu yina kekolamaka kaka sambu na kumonisa nde bo kendima ve ngidika mosi ya politiki. Kansi, lukanu na beto kele ya kundima kiyeka ya Yehowa kuluta kiyeka ya konso muntu yina. Kana bansiku ya bantu kewakana ve ti nsiku ya Nzambi, desizio ya metala mambu ya beto fwete sala kele ve mpasi. Bonso bantumwa na mvu-nkama ya ntete, beto kelemfukaka ntete na Nzambi kansi na bantu ve.

6. Sambu na nki yo kele ntangu yonso mfunu na kulemfuka na bansiku ya Yehowa?

⁶ Inki mesadisaka beto na kundima kiyeka ya Nzambi? Beto kendimaka mambu yina Biblia ketuba na Bingana 3:5, 6: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.” Beto kendimaka nde mambu yonso yina Nzambi kelombaka beto kevandaka ntangu yonso sambu na mambote na beto mosi. (Tanga Kulonga 10:12, 13.) Ya kyeleka, Yehowa kusongaka bantu ya Izraele nde: “Mono muntu ke longa nge sambu na mambote na nge, mono muntu ke nata nge na nzila ya nge fweti landa.” Na nima, yandi yikaka nde: “Kana nge landaka bansiku na mono mbote-mbote, nge zolaka kuvanda na ngemba kimakulu, nge zolaka kununga mpenza; yo zolaka kuvanda bonso masa ke luta mingi, yo ke yuma ve.” (Yez. 48:17, 18) Beto kekwikilaka bangogo yina. Beto kendimaka nde kulemfuka na bansiku ya Nzambi kevandaka ntangu yonso sambu na mambote na beto mosi.

7. Inki beto fwete sala kana beto kebakisa ve mbote-mbote nsiku mosi ya kele na Ndinga ya Nzambi?

⁷ Beto kendimaka kiyeka ya Yehowa mpi kelemfukilaka yandi ata beto mebakisa ve mbote-mbote kikuma ya mambu yankaka ya yandi kelombaka yina kele na Ndinga na yandi. Yo kele ve bindima-ndima, kansi yo kele kutula ntima. Yo kemonisaka kutula ntima ya masonga nde Yehowa kezabaka mambu yina kele mbote sambu na beto. Bulemfu na beto kemonisaka mpi zola na beto, sambu ntuma Yoane kusonikaka nde: “Kana beto ke zolaka Nzambi, yo ke songa nde beto ke landaka bansiku na yandi.” (1 Yoa. 5:3) Kansi kele ti kima yankaka ya ketadila bulemfu na beto yina beto fwete mona ve mpamba.

Kulonga Mayele na Beto ya Kuyindula

8. Inki mutindu kulonga mayele na beto ya kuyindula kewakana ti kundima kiyeka ya Yehowa?

⁸ Biblia kesonga beto nde beto fwete longa mayele na beto ya kuyindula sambu “na kuswasisa mambu ya mbote ti mambu ya mbi.” (Baeb. 5:14) Yo yina, lukanu na beto kele ve ya kulemfukila bansiku ya Nzambi kukonda kuyindula. Kansi, beto kezolaka kukuka na “kuswasisa mambu ya mbote ti mambu ya mbi,” na nsadisa ya minsiku ya Yehowa. Beto kezolaka kubakisa mayele ya banzila ya Yehowa, mpidina beto lenda tuba bonso muyimbi-bankunga nde: “Malongi na nge kele na ntima na mono.”​—Nk. 40:9.

9. Inki mutindu beto lenda wakanisa kansansa na beto ti minsiku ya Yehowa, mpi sambu na nki yo kele mfunu nde beto sala yo?

⁹ Sambu na kubakisa bansiku ya Nzambi bonso muyimbi-bankunga, beto fwete yindulula mambu ya beto ketanga na Biblia. Mu mbandu, kana beto melonguka dyambu mosi ya Yehowa kelombaka, beto lenda kudiyula nde: ‘Sambu na nki nsiku to munsiku yai kele ya mayele? Sambu na nki kulemfuka na yo kele sambu na mambote na mono? Inki malanda ya mbi mebwilaka bantu yina mezitisaka ve ndongisila ya Nzambi na dyambu yai?’ Kana kansansa na beto kele na kuwakana ti banzila ya Yehowa, ntembe kele ve nde beto tabaka badesizio ya kewakana ti luzolo na yandi. Beto takuka kulanda “na kuzaba kana luzolo ya Yehowa kele inki,” mpi na nima kulemfukila yo na luzingu na beto. (Ef. 5:17, NW) Yo kevandaka ve pete ntangu yonso.

Satana Kesosaka Kufwa Kiyeka ya Yehowa

10. Na nki dyambu Satana mesosaka kufwa kiyeka ya Nzambi?

¹⁰ Banda ntama Satana kesosaka kufwa kiyeka ya Nzambi. Mpeve na yandi ya dipanda kemonanaka na mitindu mingi. Mu mbandu, kukonda kuzitisa ngidika ya Nzambi ya makwela. Bantu yankaka kewakanaka na kuzinga kumosi kukonda kukwelana, kansi bankaka kesosaka mitindu ya kufwa makwela na bo. Bantu yai yonso lenda ndima mambu yai ya kutubaka mwana-nkento mosi ya mezabanaka mingi yina kesalaka bansaka: “Mpila kele ve ata fyoti na kuvanda ti nkwelani mosi sambu na bankento ti babakala.” Yandi yikaka nde: “Mu mezaba ve ata muntu mosi yina kele ya kwikama, to kezola kuvanda ya kwikama na nkwelani na yandi.” Ntangu bakala mosi ya kesalaka bansaka ya mezabanaka mingi kuyindulaka makwela na yandi yina kunungaka ve, yandi tubaka mambu ya mutindu mosi nde: “Mu kendimaka ve nde beto mesalamaka mpenza sambu na kuvanda kaka na nkwelani mosi na luzingu na beto ya mvimba.” Yo yina, beto fwete kudiyula nde: ‘Keti mu kendimaka kiyeka ya Yehowa na mambu ya metala makwela, to keti dibanza ya nsi-ntoto ya kemonisaka nde makwela fwete zinga ve kimakulu mebebisaka mabanza na munu?’

11, 12. (a) Sambu na nki yo lenda vanda mpasi na baleke na kundima kiyeka ya Yehowa? (b) Ta eksperiansi ya kemonisa buzoba ya kukonda kulemfuka na bansiku mpi minsiku ya Yehowa.

¹¹ Keti nge kele leke ya kele na organizasio ya Yehowa? Kana mpidina, Satana kezola nde nge yindula nde kiyeka ya Yehowa kele ve sambu na mambote na nge. “Nzala ya kileki” kumosi ti bupusi ya banduku lenda pusa nge na kuyindula nde bansiku ya Nzambi kele kizitu. (2 Tim. 2:22) Kubika ve nde yo salama mutindu yina. Sala kikesa na kubakisa mayele ya kele na minsiku ya Nzambi. Mu mbandu, Biblia kesonga nge nde tina “pite.” (1 Kor. 6:18) Awa dyaka, nge fwete kudiyula bangyufula yai: ‘Sambu na nki nsiku yai kele ya mayele? Inki mutindu kulemfuka na dyambu yai tanatila munu mambote?’ Nge lenda zaba bantu yankaka yina kulemfukaka ve na bandongisila ya Nzambi mpi bo bakaka malanda ya mbi sambu na kifu na bo. Keti bo kele na kyese mpenza ntangu yai? Keti bo kele ti luzingu ya mbote kuluta luzingu yina bo vandaka na yo ntangu bo vandaka na organizasio ya Yehowa? Keti bo mezwaka mpenza kinsweki ya kyese yina bansadi ya Nzambi mezwaka ve?​—Tanga Yezaya 65:14.

¹² Tala mambu yina Mukristu mosi na zina ya Sharon kutubaka ntama mingi ve: “Sambu mu lemfukaka ve na nsiku ya Yehowa, mu bakaka maladi yai ya mbi ya SIDA. Mbala mingi mu keyindulaka bamvula mingi ya kyese yina mu lutisaka na kusadila Yehowa.” Yandi kendima nde yo vandaka buzoba na kufwa bansiku ya Yehowa mpi nde yo lombaka nde yandi baka yo na valere mingi kibeni. Bansiku ya Yehowa kele sambu na lutaninu na beto. Sharon kufwaka kaka bamposo nsambwadi na nima ya kusonika mambu ya beto mekatuka kutubila. Mutindu mambu ya mbi yina kukuminaka yandi kemonisa yo, Satana kele ve ata ti kima mosi ya mbote ya kupesa bantu yina kelandaka ngidika yai ya mbi. Sambu yandi kele “tata ya luvunu,” yandi kepesaka balusilu mingi, kansi yandi kelungisaka yo ve, kaka mutindu yandi lungisaka ve lusilu ya yandi pesaka na Eva. (Yoa. 8:44) Ya kyeleka, yo kele ntangu yonso mbote na kundima kiyeka ya Yehowa.

Keba na Mpeve ya Dipanda

13. Na nki dyambu beto fwete keba na mpeve ya dipanda?

¹³ Sambu na kundima kiyeka ya Yehowa, beto fwete keba na mpeve ya dipanda. Lulendo lenda pusa beto na kuyindula nde beto kele ve na mfunu ya lutwadisu ata ya muntu mosi. Mu mbandu, beto lenda buya ndongisila ya mekatuka na bantu yina ketwadisaka bantu ya Nzambi. Nzambi metulaka ngidika yina kesalaka nde kimvuka ya mpika ya kwikama mpi ya mayele kupesa madya ya kimpeve na ntangu ya mbote. (Mat. 24:45-47, NW) Beto fwete ndima na kudikulumusa yonso nde yai kele mutindu Yehowa kelungisaka bampusa ya bantu na yandi bubu yai. Vanda bonso bantumwa ya kwikama. Ntangu balongoki yankaka kubulaka dibaku, Yezu kuyulaka bantumwa nde: “Beno mpi, keti beno ke zola kwenda?” Piere kuvutulaka nde: “Mfumu, na nani beto ta kwenda? Mambu ya nge ke tubaka yo ke pesaka moyo ya mvula na mvula.”​—Yoa. 6:66-68.

14, 15. Sambu na nki beto fwete lemfuka na kudikulumusa yonso na bandongisila ya Biblia?

¹⁴ Kundima kiyeka ya Yehowa kelombaka kulemfuka na bandongisila ya kekatuka na Ndinga na yandi. Mu mbandu, kimvuka ya mpika ya kwikama mpi ya mayele mekebisaka beto na ‘kukangula meso mpi na kudiyala.’ (1 Tes. 5:6) Ndongisila yai mefwana mpenza na bilumbu yai ya nsuka yina bantu mingi ‘kezolaka bantu ya nkaka ve, bo kezolaka kaka mbongo.’ (2 Tim. 3:1, 2) Keti nkadilu ya mutindu yai lenda vanda na bupusi na luzingu na beto? Ee. Kulanda balukanu ya kinsuni lenda bwisa beto na mpongi ya kimpeve, to beto lenda kuma kusosa kuvanda ti bima mingi ya kinsuni. (Luka 12:16-21) Yo yina, yo kele mayele mpenza na kundima bandongisila ya Biblia mpi kubuya luzingu ya kusosa kaka mambote na beto mosi yina kemonana mingi na nsi-ntoto ya Satana!​—1 Yoa. 2:16.

¹⁵ Bankuluntu ya bo meponaka na mabundu kekabulaka madya ya kimpeve ya kekatukaka na kimvuka ya mpika ya kwikama mpi ya mayele. Biblia kelongisila beto nde: “Beno lemfuka na bambuta na beno ya dibundu, beno wila bo mpi. Bo ke langidilaka moyo na beno, sambu bo fweti futa rapore na Nzambi sambu na kisalu na bo. Kana beno ke lemfukila bo, bo ta sala kisalu na bo na kiese; kana mpidina ve, bo ta sala kisalu na bo na mawa, ebuna mambu ya mutindu yina ta sadisa beno ve ata fioti.” (Baeb. 13:17) Keti yo ketendula nde bankuluntu ya dibundu kesalaka ve bifu? Ve! Nzambi kemonaka bifu na bo mbote kuluta konso muntu yina. Ata mpidina, yandi kezola nde beto lemfukila bo. Kusala kumosi ti bankuluntu, ata bo kele bantu ya kukonda kukuka, kemonisaka nde beto kendimaka kiyeka ya Yehowa.

Mfunu ya Kudikulumusa

16. Inki mutindu beto lenda monisa luzitu na Yezu yina kele Mfumu ya dibundu ya Bukristu?

¹⁶ Beto fwete yindula ntangu yonso nde Yezu kele Mfumu ya kyeleka ya dibundu. (Kol. 1:18) Yai kele kikuma mosi ya beto fwete lemfuka na kudikulumusa yonso na lutwadisu ya bankuluntu ya bo meponaka, mpi kupesa bo “luzitu ya kuluta nene.” (1 Tes. 5:12, 13) Ya kyeleka, bankuluntu ya dibundu lenda monisa nde bo mpi kelemfukaka kana bo kelonga dibundu na dikebi yonso nsangu ya Nzambi, kansi bangindu na bo mosi ve. Bo ‘kesalaka kaka mambu yina ya bo mesonikaka’ sambu na kusyamisa ve bangindu na bo mosi.​—1 Kor. 4:6.

17. Sambu na nki lulendo kele kigonsa?

¹⁷ Bantu yonso na dibundu fwete keba na mpila nde bo sosa ve lukumu na bo mosi. (Bing. 25:27) Yo ke pwelele nde, yo vandaka mutambu sambu na longoki mosi yina ntumwa Yoane kukutanaka ti yandi. Yandi sonikaka nde: “Diotrefesi, muntu yina ke zolaka kuvanda mutwadisi na beno, yandi ke buyaka beto. Yo yina, kana mono kwisa kuna na beno, mono ta tubila beno mambu yina yonso ya yandi ke salaka: Yandi ke tubaka mambu ya mbi ti ya luvunu sambu na beto!” (3 Yoa. 9, 10) Kele ti dilongi mosi na dyambu yai ata sambu na beto bubu yai. Beto kele ti kikuma ya mbote ya kutumuna konso dibanza ya lulendo yina beto lenda vanda na yo. Biblia kezabisa beto nde: “Lulendo ke bwisaka muntu, yo ke fwaka muntu.” Bantu yina kendimaka kiyeka ya Nzambi fwete tina mutambu ya lulendo, sambu kana bo sala mpidina ve, bo tamona nsoni.​—Bing. 11:2; 16:18.

18. Inki tasadisa beto na kundima kiyeka ya Yehowa?

¹⁸ Yo yina, baka lukanu ya kununga mpeve ya dipanda ya nsi-ntoto yai mpi ya kundima kiyeka ya Yehowa. Yindulula mbala na mbala ti ntonda yonso dibaku ya nene ya nge kele na yo ya kusadila Yehowa. Mutindu nge kele na kati ya bantu ya Nzambi kemonisa nde yandi mebendaka nge na nsadisa ya mpeve santu na yandi. (Yoa. 6:44) Kumona ve mpamba bangwisana na nge ti Nzambi. Na mambu yonso ya luzingu na nge, sala kikesa na kumonisa nde nge kebuyaka mpeve ya dipanda mpi nde nge kendimaka kiyeka ya Yehowa.

Keti Nge Keyibuka?

• Kundima kiyeka ya Yehowa kelombaka inki?

• Inki mutindu kulonga mayele na beto ya kuyindula kewakana ti kundima kiyeka ya Yehowa?

• Na nki mambu Satana kesosaka kufwa kiyeka ya Nzambi?

• Sambu na nki kudikulumusa kele mfunu sambu na kundima kiyeka ya Yehowa?

[Kifwanisu ya kele na lutiti 24]

“Beto fweti lemfuka ntete na Nzambi, kansi na bantu ve”

[Kifwanisu ya kele na lutiti 26]

Yo kele ntangu yonso mayele na kulanda minsiku ya Nzambi