Ntama Ve Ntoto Takuma Paladisu!

“Tata na beto kele na zulu, zina na nge ya santu kuvanda ya lukumu, Kimfumu na nge kwisa, luzolo na nge kusalama awa na ntoto bonso na zulu.”​—Matayo 6:9, 10.

KISAMBU yai ya mezabanaka mingi, ya bantu mingi kebingaka nde Tata na Beto, Kisambu ya Mfumu to Tatetu, kepesa bantu kivuvu. Inki mutindu?

Mutindu kisambu yina kemonisa yo, Kimfumu ya Nzambi tasala nde luzolo ya Nzambi kusalama na ntoto kaka mutindu yo kesalama mpenza ntangu yai na zulu. Mpi luzolo ya Nzambi kele ya kuvutula Paladisu. (Kusonga 21:1-5) Kimfumu ya Nzambi kele mpenza inki, mpi nki mutindu yo tavutula Paladisu na ntoto?

Luyalu Mosi ya Kyeleka

Kimfumu ya Nzambi kele luyalu mosi ya kyeleka. Sambu konso luyalu yina kusala kisalu, yo kelombaka kuvanda ti bamfumu, bansiku, mpi bantu. Keti Kimfumu ya Nzambi kele ti mambu yai? Tala bamvutu ya Biblia kepesa na bangyufula tatu yai ya melanda:

Banani kele bamfumu ya Kimfumu ya Nzambi? (Yezaya 33:22) Yehowa Nzambi meponaka Mwana na yandi, Yezu Kristu, sambu na kutwadisa Kimfumu yango. (Matayo 28:18) Na lutwadisu ya Yehowa, Yezu meponaka ntalu fyoti ya bantu ya “makanda yonso, ya bandinga yonso ti ya bansi yonso” yina tayala ti yandi bonso bantotila “awa na nsi-ntoto.”​—Kusonga 5:9, 10.

Inki bansiku Kimfumu ya Nzambi metulaka sambu bantu na yo kuzitisa? Bansiku yankaka na kati ya bansiku yango kelombaka kusala mambu ya sikisiki. Yezu kumonisaka nsiku ya kuluta mfunu ya bansiku yango na bangogo yai: “‘Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.’ Yina kele nsiku me luta mfunu, yo kele mpi nsiku ya ntete. Nsiku ya zole kele mpi mfunu kiteso mosi na yina ya ntete, yo yai: ‘Nge fweti zola mpangi na nge bonso nge mosi.’”​—Matayo 22:37-39.

Bansiku yankaka kelomba nde bantu ya Kimfumu ya Nzambi kusala ve mambu yankaka. Mu mbandu, Biblia ketuba pwelele nde: “Beno kudikusa ve; bantu yina ke salaka pite na bantu yina me kwelaka to na bayina me kwelaka ve, bantu yina ke sambaka banzambi ya biteki, babakala yina ke ladisaka babakala ya nkaka, bamiyibi, bantu yina ke vandaka na nzala ya kuvanda na konso kima yina, bantu yina ke laukaka malafu, bantu yina ke fingaka bantu ya nkaka, bantu yina ke kusaka bantu ya nkaka sambu na kubaka mbongo na bo ata muntu mosi ve na kati ya bantu yina ta vanda muntu ya Kimfumu ya Nzambi.”​—1 Korinto 6:9, 10.

Banani kele bantu ya Kimfumu ya Nzambi? Yezu kufwanikisa bantu ya Kimfumu ya Nzambi ti mameme. Yandi tubaka nde: “Bo ta wa ndinga na mono, ebuna bo yonso ta vanda kisika mosi kaka, bo ta vanda mpi na ngungudi mosi kaka na kukeba bo.” (Yoane 10:16) Sambu na kuvanda muntu ya Kimfumu ya Nzambi, beto fwete tuba kaka ve nde beto kelanda Ngungudi ya Mbote, Yezu, kansi beto fwete sala mambu ya yandi ketuma. Yezu kutubaka nde: “Bantu yina ke bingaka mono nde: ‘Mfumu, Mfumu’, bo yonso ve ta kota na Kimfumu ya Nzambi, kansi bantu yina ke salaka luzolo ya Tata na mono yina kele na zulu, bo kaka bantu ta kota na Kimfumu ya Nzambi.”​—Matayo 7:21.

Yo yina, bayina kele bantu ya Kimfumu ya Nzambi kesadilaka zina ya Nzambi Yehowa mpi kekumisaka yo, kaka mutindu Yezu kusalaka. (Yoane 17:26) Bo kelemfukaka na ntuma ya Yezu ya kulonga bankaka “nsangu yai ya mbote ya Kimfumu.” (Matayo 24:14; 28:19, 20) Mpi bo kemonisaka zola ya masonga bo na bo.​—Yoane 13:35.

Kufwa ‘Bantu Yina Kebebisa Ntoto’

Mambu ya kesalama sesepi yai na ntoto ketendula nde ntama mingi ve Kimfumu ya Nzambi tasala sambu na kunata bansoba ya nene na ntoto. Inki mutindu beto mezaba yo? Bamvula mafunda zole meluta, Yezu kutubilaka kidimbu mosi ya kele ti bitini mingi yina zolaka kumonisa nde “Kimfumu ya Nzambi me kuma penepene.” (Luka 21:31) Mutindu beto monisaka yo na disolo yina meluta, ntangu yai bitini ya kidimbu yango kemonana pwelele na ntoto ya mvimba.

Inki tasalama na nima? Yezu kepesa mvutu yai : “Na bilumbu yina, mpasi mingi ta vanda. Yo ta vanda mpasi mosi ya ngolo yina me bwaka ntete ve katuka kuna ya Nzambi salaka bima yonso tii bubu yai. Ata mpasi ya nkaka ya mutindu yina ta vanda diaka ve.” (Matayo 24:21) Yo kele ve kisumbula ya bantu tabasisa. Kansi, Nzambi muntu tasala sambu na ‘kufwa bantu yina ke bebisaka nsi-ntoto.’ (Kusonga 11:18) Bantu ya mbi, yina bisalu na bo ya bwimi mebebisaka mpenza planete na beto, “Nzambi ta katula bo na ntoto.” Kansi bantu ya mbote, bayina kesadilaka Nzambi mutindu yandi kezolaka, “ta zinga na ntoto.”​—Bingana 2:21, 22.

Yehowa Nzambi kele mpenza ti bikuma ya mbote ya kusala mambu ya mutindu yai. Sambu na nki? Beto tadila mbandu yai: Yindula nzo mosi ya nda yina kele ti banzo ya bantu kefutilaka. Bantu yankaka ya kefutila kesala mambu mbote mpi ti luzitu; bo kefuta mbongo na bo mpi ketanina banzo na bo mbote. Kansi, bankaka kele mavwanga mpi bwimi; bo kebuya kufuta mbongo na nsuka ya ngonda mpi bo kebebisa mpenza nzo ya nene. Ata nge mepesaka bo balukebisu mbala mingi, bo kelanda kaka na kusala mambu na mutindu ya mbi. Nge tasala inki? Ntembe kele ve nde nge, nkwa ya nzo, nge tabasisa bantu yina.

Mutindu mosi, Yehowa Nzambi, yina kele Ngangi ya ntoto mpi ya bima yonso ya kele na zulu na yo, kele ti nswa ya kupona bantu yina yandi tapesa nzila ya kuzinga na ntoto. (Kusonga 4:11) Lukanu ya Yehowa kele ya kukatula na ntoto bantu ya mbi yina kesalaka ve luzolo na yandi mpi yina kebebisaka banswa ya bantu yankaka.​—Nkunga 37:9-11.

Ntoto Takuma Dyaka Paladiso

Kubika fyoti, Kimfumu ya Nzambi ya kele na maboko ya Yezu Kristu tayala ntoto. Yezu kubingaka luyantiku yai ya mpa nde “ntangu ya mpa.” (Matayo 19:28) Mambu tavanda nki mutindu? Tala balusilu yai ya Biblia ya melanda:

Nkunga 46:10. “Yandi ke sukisaka bitumba na nsi-ntoto yonso.”

Yezaya 35:1. “Nseke ke na kiese mingi, ntoto ya kuyuma ke sepela, bintuntu me yantika kumena na ntoto ya zelo na zelo.”

Yezaya 65:21-23. “Bo ta mona kiese na bisalu ya maboko na bo. Bisalu ya bo ta sala yo ta vanda ya mpamba ve, bana ya bo ta buta bo ta butuka ve sambu na kufwa.”

Yoane 5:28, 29. “Na ntangu ke kwisa, bantu yonso yina me fwaka kele na maziamu, bo ta wa ndinga na yandi; ebuna bo ta basika na maziamu na bo.”

Kusonga 21:4. “[Nzambi] ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.”

Bikuma ya Kutula Ntima

Keti nge kekwikilaka na balusilu ya Biblia? Biblia kutubaka na ntwala nde bantu mingi takwikilaka ve na balusilu na yo. Yo ketuba nde: “Na bilumbu [ya nsuka], bantu ta kwisa kubasika, bo ta zingaka mutindu nzala na bo ke tindaka bo na kusala. Bo ta sekaka beno ebuna bo ta tubaka nde: ‘Mfumu Yesu silaka nde yandi ta kwisa kuvutuka diaka si! Ebuna wapi yandi ko? Bankaka na beto me fwaka ntama, kansi mambu yonso kele kaka kiteso mosi, katuka ntangu ya Nzambi salaka bima yonso tii bubu yai!’” (2 Piere 3:3, 4) Kansi bantu yai ya kesekaka beto kekudikusaka mpenza. Beto tadila kaka bikuma iya ya fwete pusa beto na kukwikila na mambu yina Biblia ketuba:

(1) Nzambi kukotaka na makambu ya bantu na ntangu ya ntama. Mvula ya Ngolo ya bilumbu ya Noa kele mbandu mosi ya mefwana mpenza.​—2 Piere 3:5-7.

(2) Ndinga ya Nzambi kutubaka na ntwala na sikisiki yonso mambu ya kesalama bubu yai na ntoto ya mvimba.

(3) Mambu yonso kele ve “kaka kiteso mosi, katuka ntangu ya Nzambi salaka bima yonso tii bubu yai.” Na mutindu yina mesalamaka ntete ve, planete na beto kebeba na mambu ya metala luzingu ya bantu, bikalulu, mpi mupepe.

(4) Bubu yai bo kelonga ‘nsangu ya mbote ya Kimfumu’ na ntoto ya mvimba, kima yina kemonisa nde “nsuka ya ntoto ta kwisa” ntama mingi ve.​—Matayo 24:14.

Bambangi ya Yehowa kelomba nge na kulonguka Ndinga ya Nzambi, Biblia, ti bo na mpila nde nge zaba mambu mingi ya ketala kivuvu ya luzingu ya mvula na mvula na nsi ya luyalu ya Kimfumu ya Nzambi. (Yoane 17:3) Ee, makwisa ya kitoko kele na ntwala ya bantu yonso. Ntangu ya mbote kuluta bantangu yonso tamonana ntama mingi ve! Keti nge tavanda na makwisa yai?

[Bangogo sambu na kubenda dikebi ya kele na lutiti 7]

Bantu yina ketubaka nde mambu tavanda kaka mutindu yo kevandaka banda ntama kekudikusa mpenza

[Kifwanisu ya kele na lutiti 8]

Keti nge tavanda na makwisa yai?