Malongi ya Beto Kebaka na Yina Metala Yezu
Na Yina Metala Mutindu ya Kusadila Bankaka Mambu
Sambu na nki kusala mambote?
Keti nge kesalaka mambote ata ntangu bantu kesadilaka nge ve mambote? Kana beto kezola kulanda mbandu ya Yezu, beto fwete sala mambote ata na bantu yina kemengaka beto. Yezu kutubaka nde: “Kana beno ke zolaka kaka bantu yina ke zolaka beno, nki mfunu ya kusosa diaka matabisi? Sambu ata bantu ya masumu mpi ke zolaka bantu yina ke zolaka bo! . . . Kansi beno zola bambeni na beno . . . , ebuna . . . beno ta vanda mpi bana ya Nzambi. Sambu yandi mpi ke zolaka bantu yina ke pesaka mersi ve ti bantu ya mbi.”—Luka 6:32-36; 10:25-37.
Sambu na nki kuvanda ti kikalulu ya kulolula?
Ntangu beto kesalaka bifu, beto kezolaka nde Nzambi kulolula beto. Yezu kulongaka nde yo kele mbote na kusamba Nzambi sambu yandi lolula beto. (Matayo 6:12) Kansi, Yezu kutubaka mpi nde Nzambi talolula beto kaka kana beto kele na luzolo ya kulolula bankaka. Yandi tubaka nde: “Bantu ya nkaka yina me salaka beno mbi, kana beno ke lolula bo, Tata na beno kele na zulu mpi ta lolula beno. Kansi kana beno ke lolula bantu ya nkaka ve, Tata na beno mpi ta lolula beno ve.”—Matayo 6:14, 15.
Inki mutindu mabuta lenda vanda na kyese?
Ata Yezu kukwelaka ve, beto lenda baka malongi mingi na yina metala mutindu ya kuvanda na luzingu ya kyese na dibuta. Na bangogo mpi na bisalu na yandi, Yezu kupesaka beto mbandu ya mbote ya kulanda. Beto tadila mambu tatu ya kelanda:
1. Bakala fwete zola nkento na yandi mutindu yandi kezolaka nitu na yandi mosi. Yezu kupesaka babakala mbandu ya kulanda. Yandi tubaka na balongoki na yandi nde: “Nsiku mosi ya mpa ya mono ke pesa beno yo yai: Beno zolana beno na beno.” Tii na nki kiteso? “Mutindu mono ke zolaka beno, beno mpi beno zolana beno na beno.” (Yoane 13:34) Sambu na kusadila munsiku yai na babakala, Biblia ketuba nde: “Beno babakala, beno zola bankento na beno mutindu Kristo zolaka dibundu ntangu yandi fwaka sambu na yo. Mutindu mosi, babakala mpi fweti zola bankento na bo, mutindu bo ke zolaka nitu na bo mosi. Bakala yina ke zolaka nkento na yandi, yandi ke kudizolaka yandi mosi. Sambu ata muntu mosi ve ke yinaka nitu na yandi mosi. Kansi bantu yonso ke pesaka nitu na bo madia, bo ke kebaka yo mutindu Kristo ke salaka sambu na dibundu.”—Efezo 5:25, 28, 29.
2. Konso nkwelani fwete vanda ya kwikama na nkwelani na yandi. Kuvukisa nitu na nganda ya makwela kele disumu na meso ya Nzambi mpi yo kebebisaka bangwisana ya mabuta. Yezu kutubaka nde: “Keti beno me tangaka ve mambu yai na Mukanda ya Nzambi? . . . ‘Yo yina, bakala ta bikisa tata na yandi ti mama na yandi, yandi ta kwenda kuvukana na nkento na yandi. Ebuna bo zole ta kuma muntu mosi.’ Mpidina bo kele diaka bantu zole ve kansi kaka muntu mosi mpamba. Yo yina, muntu lenda kabula ve yina ya Nzambi me vukisaka. . . . Mono ke tubila beno: Konso muntu yina ta bikisa nkento na yandi kana nkento yina me sala pite ve, ebuna muntu yina kukwela nkento ya nkaka, muntu yango me sala pite.”—Matayo 19:4-9.
3. Bana fwete lemfukila bibuti na bo. Ata Yezu kuvandaka muntu ya kukuka mpi bibuti na yandi kuvandaka bantu ya kukonda kukuka, yandi lemfukilaka bo sambu yandi vandaka mwana. Biblia ketuba sambu na yandi ntangu yandi vandaka na bamvula 12 nde: “Yesu vutukaka ti [bibuti na yandi] na Nazareti. Yandi vandaka kulemfuka na bo.”—Luka 2:51; Efezo 6:1-3.
Sambu na nki beto fwete sadila minsiku yai?
Na yina metala malongi yina yandi longaka balongoki na yandi, Yezu kutubaka nde: “Ntangu yai beno me zaba mambu yina; kana beno sala mpidina, beno ta vanda na kiese.” (Yoane 13:17) Sambu na kuvanda balongoki ya kyeleka, beto fwete sadila bandongisila ya Yezu mepesa beto na yina metala mutindu ya kusadila bankaka mambu. Yandi tubaka nde: “Kana beno ke zolana beno na beno, bantu yonso ta zaba nde beno kele balonguki na mono.”—Yoane 13:35.
Sambu na kuzaba mambu mingi, tala kapu 14 ya mukanda Inki Biblia Kelongaka Mpenza?a
[Noti na nsi ya lutiti]
a Yina Bambangi ya Yehowa mebasisaka.
[Kifwanisu ya kele na lutiti 18, 19]
Kingana ya Yezu ya mwana yina kuvilaka kelonga beto mfunu ya kusala mambote mpi ya kulolula.—Luka 15:11-32
[Kifwanisu ya kele na lutiti 19]
Konso nkwelani fwete vanda ya kwikama na nkwelani na yandi