Keti Nge Zaba Tata na Nge ya Zulu?

KETI nge zaba tata na nge mbote? Ngyufula yai lenda yitukisa nge kana nge meyelaka na dibuta mosi ya zola. Nge lenda pesa mvutu nde: ‘Ee, mu zaba yandi mbote mpenza!’ Ya kyeleka, bantu mingi kezabaka mambu yina tata na bo kezolaka mpi yina yandi kezolaka ve, nki kevandaka nkadilu na yandi ntangu dyambu mosi mebasika, mpi mutindu yandi kelungisaka bampusa ya dibuta na yandi.

Ziku bantangu yankaka nge yitukaka na kumona kikalulu mosi yina nge memonaka ntete ve na tata na nge. Mu mbandu, mwana lenda zaba tata na yandi bonso muntu mosi ya pima mpi ya mawete. Kansi, kilumbu dyambu mosi ya kintulumukina tasalama, mwana tamona nde tata na yandi kezabaka kubaka balukanu ya ngolo sambu na kutanina dibuta na yandi.

Inki beto lenda tuba sambu na Ngangi na beto? Biblia kezabisa beto sambu na yandi nde: “Na ngolo na yandi beto ke na moyo, beto ke mona mpila ya kutambula, beto mpi ke na luzingu na beto.” (Bisalu 17:28) Luzingu na beto mekatukaka na Nzambi sambu yandi kele Tata ya bantu yonso yina kele na luzingu. (Yezaya 64:7) Ziku yo kele mutindu nge kekudiwaka sambu na Nzambi, mpi yo kele mbote. Kansi, na yina metala Nzambi, beto kele ti mambu mingi ya kuzaba mpi ya kulonguka sambu na mambote mpi kyese na beto.

Kuzaba tata na nge mbote kevandaka na bupusi na mutindu yina nge kekudiwaka sambu na yandi mpi kezitisaka yandi. Mutindu mosi, kana nge zaba Nzambi mbote mpenza, bangwisana na nge ti yandi takuma ngolo. Kana nge longuka na kuzaba Nzambi mbote mpi kusala luzolo na yandi, yandi lenda sadisa nge na kukanga ntima na bampasi ya luzingu.

Nzambi kele muntu ya nki mutindu? Inki mutindu bikalulu na yandi fwete vanda na bupusi na mawi na beto? Keti kuzaba yandi kepesa nge mikumba? Nge tabaka bamvutu na bangyufula yai na disolo yina kelanda.

[Bangogo sambu na kubenda dikebi ya kele na lutiti 3]

Kuzaba bantu yankaka mbote lenda vanda na bupusi na mutindu nge ketadilaka bo