Beno Longa Bana na Beno

Keti Nge Mewaka Dezia Kimpala? Bampangi ya Yozefi Kuwaka Kimpala

BETO tubila nki yo ketendula kuwa kimpala. Keti nge memonaka dezia mpasi na kuzola muntu mosi sambu bankaka ketubaka nde yandi kele mbote, kitoko, to mayele?a​— Mambu yai lenda salama kana nge kewila muntu mosi kimpala.

Kimpala lenda monana na kati ya dibuta kana bibuti kezola mwana mosi kuluta yankaka. Biblia ketubila dibuta mosi yina kimpala kubasisaka dikambu mosi ya nene. Bika beto tadila mpasi yina yo basisaka mpi dilongi yina beto lenda baka na mambu yina kusalamaka.

Yozefi kuvandaka mwana ya 11 ya Yakobi, mpi bampangi na yandi ya kitata vandaka kuwila yandi kimpala. Keti nge kezaba sambu na nki?​— Yo vandaka sambu tata na bo, Yakobi, vandaka kuzola Yozefi mingi. Mu mbandu, Yakobi kusadilaka Yozefi lele mosi ya kitoko ya nzila-nzila. Yakobi vandaka kuzola mingimingi Yozefi “sambu Yozefi vandaka mwana yina ya yandi butaka na kimununu na yandi” mpi mwana ya ntete ya nkento na yandi yina yandi vandaka kuzola mingi, Rashele.

Biblia ketuba nde ‘ntangu bampangi ya Yozefi monaka nde tata na bo ke zola Yozefi mingi kuluta, bo mengaka Yozefi.’ Ebuna, kilumbu mosi Yozefi kutelaka dibuta na yandi ndosi mosi ya yandi lalaka, nde bo yonso, ti tata na bo mpi, kufukiminaka yandi. Biblia ketuba nde, “Bampangi ya Yozefi wilaka yandi kimpala mingi,” mpi nkutu tata ya Yozefi kunganinaka yandi na mutindu yandi taka ndosi ya mutindu yina.​—Kuyantika 37:1-11.

Ntangu fyoti na nima, ntangu Yozefi kuvandaka ti bamvula 17, bampangi na yandi kukwendaka na kitamina ya bakilometre mingi sambu na kukeba mameme ti bankombo ya dibuta na bo. Ebuna, Yakobi kutindaka Yozefi na kukwenda kutala kana bampangi na yandi kuvandaka mbote. Keti nge kezaba nki mingi na kati na bo kuvandaka na mpusa ya kusala ntangu bo monaka yandi kekwisa?​— Bo vandaka na mpusa ya kufwa yandi! Kansi zole na kati na bo, Rubeni ti Yuda, kuzolaka ve.

Ntangu bakomersa vandaka kuluta sambu na kukwenda na Ezipte, Yuda kutubaka nde: “Beto teka yandi.” Ebuna, bo tekaka yandi. Na nima, bo fwaka mwana-nkombo mosi mpi kukotisaka lele ya Yozefi na kati ya menga na yo. Na nima, ntangu bo songisaka lele yango na tata na bo, yandi tubaka na ndinga ya ngolo nde: ‘Mbisi ya makasi me dia Yozefi.’​—Kuyantika 37:12-36.

Na nima, Farao, mfumu ya Ezipte, kumaka kuzola Yozefi mingi. Yo vandaka sambu Yozefi kukukaka kutendula bandosi zole ya Farao na lusadisu ya Nzambi. Ndosi ya ntete kuvandaka ya bangombe nsambwadi ya mafuta mpi bangombe nsambwadi ya mikwa-mikwa. Ndosi ya zole kuvandaka ya masangu nsambwadi ya nene mpi masangu nsambwadi ya kuyuma na mupepe. Yozefi kutubaka nde bandosi yonso zole kutendulaka nde yo tavanda ti bamvula nsambwadi ya mbote ya kukatula bambuma, mpi na nima talanda bamvula nsambwadi ya nzala. Na lutwadisu ya Farao, bo pesaka Yozefi mukumba ya kubumba madya na bamvula ya madya mingi sambu na kudibongisa sambu na bamvula ya nzala.

Ntangu nzala kukotaka, dibuta ya Yozefi, yina vandaka kuzinga na kitamina ya bakilometre mingi, kuvandaka na mfunu ya madya. Yakobi kutindaka bambuta kumi ya Yozefi na Ezipte sambu na kusosa madya. Bo kumaka na ntwala ya Yozefi, kansi bo zabaka yandi ve. Kukonda kumonisa nani yandi vandaka, Yozefi kumekaka bampangi na yandi, mpi yandi bakisaka nde bo vandaka na mawa mpenza sambu na mambu ya mbi ya bo salaka yandi. Ebuna, Yozefi kuzabisaka bo nani yandi vandaka. Bo yambanaka mpi kuvandaka na kyese mingi!​—Kuyantika, bakapu 40 tii na 45.

Inki dilongi nge lenda baka na disolo yai ya Biblia sambu na yina metala kimpala?​— Kimpala lenda basisa mpasi mingi, mpi yo lenda pusa nkutu muntu na kuzola kusala mpangi na yandi mbi! Bika beto tanga Bisalu 5:17, 18 ti Bisalu 7:54-59, mpi beto tala mambu yina kimpala kupusaka bantu na kusala balongoki ya Yezu.​— Na nima ya kutanga yo, keti nge lenda mona sambu na nki beto fwete keba na kuvanda ve na kimpala?​—

Yozefi kuzingaka tii na bamvula 110. Yandi butaka bana, yina kubutilaka yandi bantekolo, mpi na nima bantekolo yina mpi kubutaka bana. Beto lenda ndima nde mbala mingi Yozefi kulongaka bo na kuzolana bo na bo mpi na kubuya kimpala.​—Kuyantika 50:22, 23, 26.

[Noti na nsi ya lutiti]

Bangyufula:

❍ Kuwa kimpala ketendula inki?

❍ Kimpala kupusaka bampangi ya Yozefi na kusala inki?

❍ Sambu na nki Yozefi kulolulaka bampangi na yandi?

❍ Inki dilongi beto lenda baka na disolo yai?