Dilongi Mosi ya Mepanzanaka Mingi

“Mu vandaka kulala bandosi ya mbi ya kuzika na bilungi! Mu vandaka kumona bo keyoka munu na tiya na bilungi, ebuna mu vandaka kutelama mpi kuboka. Yo yina, mu vandaka kusala ngolo sambu na kusala ve masumu.”​—Arline.

KETI nge kekwikilaka nde bilungi kele kisika ya mpasi mingi ya bo meyidikaka sambu na bantu ya masumu? Bantu mingi kekwikilaka mpidina. Mu mbandu, na mvu 2005, muntu mosi ya mayele ya Iniversite Saint Andrews na Écosse kumonaka nde mfumu mosi na kati ya tatu ya mabundu ya Écosse kekwikilaka nde bantu yina mekabwanaka ti Nzambi “tanyokwama na mabanza mvula na mvula na bilungi.” Mfumu mosi na kati ya tanu kekwikilaka nde bantu yina takwenda na bilungi tanyokwama na nitu.

Na bansi mingi, dilongi ya bilungi mepanzaka mingi. Mu mbandu, nsosa mosi ya kusalamaka na États-Unis na mvu 2007 kumonisaka nde kiteso ya bantu 70 na kati ya bantu nkama yina bo yulaka bangyufula kekwikilaka na bilungi. Ata na bansi yina bantu mingi ve kesepelaka ti mambu ya lusambu, bantu kelanda na kukwikila na bilungi. Nsosa mosi ya bo salaka na mvu 2004 kumonisaka nde na Canada, bantu 42 na kati ya nkama kekwikilaka na bilungi. Mpi na Grande-Bretagne, bantu 32 na kati ya nkama kundimaka nde bilungi kele.

Mambu Yina Bamfumu ya Mabundu Kelongaka

Bamfumu mingi ya mabundu meyambulaka kulonga nde bilungi kele kisika ya kyeleka ya mpasi mingi. Kansi, bo kelongaka ntendula mosi ya mefwanana ti yina kele na mukanda mosi (Catéchisme de l’Église Catholique), yina kubasikaka na mvu 1994. Mukanda yango ketuba nde, “Ndola ya ntetentete ya bilungi kele kukabwana ya kimakulu ti Nzambi.”

Ata mpidina, bantu mingi kelanda na kukwikila nde bilungi kele kisika ya bampasi ya mabanza to ya nitu. Bantu yina kelongaka dilongi yai ketubaka nde yo mesimbama na Biblia. R. Albert Mohler, prezida ya Séminaire théologique baptiste du Sud, ketuba pwelele nde: “Masonuku kendima yo, kima ya kuyika kele ve.”

Sambu na Nki Mambu ya Nge Kekwikila Kele Mfunu?

Kana bilungi kele mpenza kisika ya mpasi mingi, ntembe kele ve nde nge fwete wa yo boma. Kansi, kana dilongi yai kele ya luvunu, bantwadisi ya mabundu yina kelongaka yo kekotisaka mavwanga mpi kepesaka bantu yina kekwikilaka bo mpasi ya mabanza ya kukonda mfunu. Bo kevwezaka mpi Nzambi.

Inki mambu Ndinga ya Nzambi, Biblia, ketuba na dyambu yai? Masolo yina kelanda tasadila Babiblia ya bantu ya Katolika ti ya Misioni sambu na kupesa mvutu na bangyufula tatu yai: (1) Inki kekuminaka mpenza muntu na lufwa? (2) Yezu kulongaka nki na yina metala bilungi? (3) Inki mutindu kulonguka kyeleka ya metala bilungi lenda vanda ti bupusi na luzingu na nge?