Kusosa Kyeleka na Yina Metala Zulu

KIVUVU ya kukwenda na zulu lenda sepedisa mpenza bantu! Bamizuluma, Bahindu, Babudiste, bantu ya mabundu ya Kikristu, mpi nkutu bantu mingi yina ketulaka ve dikebi na mambu ya mabundu kele ti kivuvu na bo ya luzingu na nima ya lufwa. Bantu keyindulaka zulu mbala mingi bonso kisika mosi ya kitoko mpi ya kyese, kisika bantu kezwaka ndembikilu na bampasi mpi kevukanaka dyaka ti “bantu ya [bo] kezolaka yina mefwaka.” Kansi, sambu na bantu mingi, kingana yai ya ntama ke kyeleka: Konso muntu kezolaka kukwenda na zulu, kansi ata muntu mosi ve kezolaka kufwa sambu na kukwenda kuna. Sambu na nki yo kele mutindu yina?

Kana Nzambi kusalaka beto sambu na kufwa mpi kukwenda na zulu, nga bantu mingi kevingilaka yo mutindu mwana kevingilaka kuyela to leke mosi kevingilaka makwela? Kansi bantu mingi kezolaka ve kufwa.

Ata mpidina, bapastere ketubaka nde na nima ya kuzinga ntangu fyoti na ntoto, zulu kele kisika yina Nzambi kukanaka nde beto kwenda kuzinga. Mu mbandu, Cardinal Theodore McCarrick, yina kuvandaka mfumu ya baepisikopo ya Washington, D.C., kutubaka nde: “Beto mesalamaka ve sambu na luzingu yai. Beto mesalamaka sambu na zulu.” Mutindu mosi, presida mosi ya ntama ya kimvuka mosi ya États-Unis (Association américaine des mouvements évangéliques) kutubaka nde: “Lukanu ya luzingu kele ya kukumisa Nzambi mpi ya kukwenda na zulu . . . sambu zulu kele nzo na beto.”

Lukwikilu ya bantu yina kekwikilaka na kwenda kuzinga na zulu na nima ya lufwa kesimbamaka mbala mingi na bansangu fyoti mpenza. George Barna, presida ya kimvuka mosi ya kesalaka bansosa na bangindu ya mabundu, kumonaka nde “bangindu ya luzingu mpi ya kuzinga na nima ya lufwa yina bantu mingi kekumaka na yo mesimbama na bangindu yina bo kebakaka na bisika mingi, bonso bafilme, miziki, mpi mikanda.” Na Floride, pastere ya dibundu mosi (église épiscopalienne), kutubaka nde: “Beto mezaba ve ata kima mosi sambu na zulu katula kaka nde zulu kele kisika yina Nzambi kele.”

Kansi, zulu kele disolo mosi ya mfunu yina Biblia ketubilaka. Na kutadila Ndinga ya Nzambi, zulu kele nki mutindu? Keti muntu kusalamaka sambu na kuzinga na zulu? Kana bantu kekwendaka mpenza na zulu, inki bo takwenda kusala kuna?

[Bangogo sambu na kubenda dikebi ya kele na lutiti 3]

Sambu na nki bantu mingi kezolaka kukwenda na zulu, kansi fyoti mpamba kezolaka kufwa sambu na kukwenda kuna?