Kwenda Penepene na Nzambi

Yandi Mepesaka Beto Kimpwanza ya Kupona

2 BANTOTILA 18:1-7

BIBUTI fwete pesa mbandu ya mbote na bana na bo. Bupusi ya mbote ya bibuti lenda sadisa mwana na kuyedisa bikalulu ya kitoko mpi na kubaka badesizio ya mayele na luzingu. Kansi, yo ke mawa na kumona nde bibuti mingi kepesaka mbandu ya mbi na bana na bo. Keti yo ketendula nde bana ya mutindu yai lenda nunga ve? Beto kebaka mvutu na kyeleka mosi ya kebwisa mpenza ntima​—Yehowa Nzambi mepesaka konso muntu kimpwanza ya kupona. Beto tadila mbandu ya Ezekiasi yina kele na 2 Bantotila 18:1-7.

Ezekiasi kuvandaka “mwana ya Ahazi” ntotila ya Yuda. (Verse 1) Ahazi kukatulaka bantu ya kimfumu na yandi na nzila ya lusambu ya bunkete ya Yehowa. Ntotila yai ya mbi kumaka kusambila Baale mpi kusala mambu yina lusambu yango vandaka kulomba ya kupesa bimenga ya bantu. Yandi fwaka mpangi mosi to bampangi mingi ya Ezekiasi. Yandi kangaka bakyelo ya tempelo mpi “na konso kisika ya banzila me kutana na Yeruzalemi, yandi tungaka bamesa-kimenga” ya yandi mosi. Yandi ‘pesaka Mfumu Nzambi makasi.’ (2 Bansangu 28:3, 24, 25) Yo kele pwelele nde Ezekiasi kuvandaka ti tata mosi ya mbi mpenza. Kansi, keti yo lombaka kaka nde Ezekiasi kuvutukila bifu ya tata na yandi?

Ntangu fyoti na nima ya kuyinga Ahazi na kiti ya kimfumu, Ezekiasi kumonisaka nde yandi zolaka ve kubika nde mbandu ya mbi ya tata na yandi kusonga yandi mutindu ya muntu yina yandi zolaka kuvanda. Ezekiasi landaka na ‘kusala mambu yina ke pesaka Mfumu Nzambi kiese.’ (Verse 3) Yandi tulaka ntima na Yehowa, mpi “bantu ya Yuda me vandaka ntete ve ti ntotila bonso yandi.” (Verse 5) Na mvula ya ntete ya luyalu na yandi, ntotila yai ya leke yantikaka kampanye mosi sambu na lusambu ya kyeleka yina kusalaka nde bo fwa bisika yina bantu vandaka kusambila banzambi ya biteki ya mimpani. Bo kangulaka dyaka tempelo, mpi kuvutulaka lusambu ya bunkete. (Verse 4; 2 Bansangu 29:1-3, 27-31) Ezekiasi “vandaka kulanda luzolo ya Mfumu Nzambi na luzingu na yandi . . . Ebuna Mfumu Nzambi vandaka ti yandi.”​—Baverse 6, 7.

Inki kusadisaka Ezekiasi na kulanda ve mbandu ya mbi ya tata na yandi? Keti yo lenda vanda nde mama na yandi, Abiya​—yina beto mezaba ve mambu mingi ya metala yandi—​kuvandaka ti bupusi ya mbote na mwana na yandi? Keti mbandu ya mbote ya Yezaya, yina kuyantikaka kisalu na yandi ya kiprofete na ntwala nde Ezekiasi kubutuka, kuvandaka ti bupusi ya mbote na mwana-ntotila yai ya leke?a Biblia ketuba yo ve. Ata yo vandaka nki mutindu, dyambu mosi kele ya kyeleka: Ezekiasi kuponaka na kulanda mutindu ya luzingu yina kuswaswanaka mpenza ti ya tata na yandi.

Mbandu ya Ezekiasi kepesa kikesa na konso muntu yina kukutanaka ti mbandu ya mbi ya bibuti na yandi na bumwana. Mambu ya melutaka ntama kesobaka ve; beto lenda fwanza ve mambu ya mpasi yina beto mekutanaka ti yo na ntama. Kansi, mambu ya mutindu yai ketendula ve nde beto tanunga ve. Ntangu yai, beto lenda pona na kusala mambu yina lenda nata na makwisa ya kyese. Bonso Ezekiasi, beto lenda pona na kuzola mpi kusambila Nzambi ya kyeleka, Yehowa. Kusala mutindu yai kenataka na luzingu mosi ya kyese ntangu yai mpi lenda nata na luzingu ya mvula na mvula na nsi-ntoto ya mpa ya Nzambi. (2 Piere 3:13; Kusonga 21:3, 4) Beto fwete monisa mpenza ntonda na Nzambi ya zola yina mepesaka konso muntu dikabu mosi ya mfunu mingi: kimpwanza ya kupona!

[Noti na Nsi ya Lutiti]