Longuka na Ndinga ya Nzambi

Nzambi Kele Nani?

Disolo yai kebasisaka bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Nzambi kele nani?

Nzambi ya kyeleka kele Ngangi ya bima yonso. Biblia kebingaka yandi “Mfumu ya Nene” ya mvula na mvula, disongidila nde yandi kele ti luyantiku ve mpi yandi tavanda ti nsuka ve. (Kusonga 15:3) Sambu Nzambi kele Nto ya luzingu, beto fwete sambila kaka yandi.​—Tanga Kusonga 4:11.

2. Nzambi kele inki mutindu?

Ata muntu mosi ve memonaka Nzambi, sambu yandi kele Mpeve, disongidila nde yandi kele na mutindu ya luzingu yina meluta bigangwa ya kinsuni ya kezingaka na ntoto. (Yoane 1:18; 4:24) Kimuntu ya Nzambi kemonanaka na bima yina yandi megangaka. Mu mbandu, ntangu beto ketala mutindu yina yandi megangaka bima mpi bambuma ya mutindu na mutindu, ti bintuntu, beto kebakisaka zola mpi mayele ya Nzambi. Bunene ya luyalanganu kesongaka beto ngolo ya Nzambi.​—Tanga Roma 1:20.

Nkutu, beto lenda longuka mambu mingi na Biblia ya metala kimuntu ya Nzambi. Mu mbandu, Biblia kezabisaka beto mambu yina Nzambi kezolaka mpi yina yandi kezolaka ve, mutindu yandi kesadilaka bantu mambu, mpi mutindu yina yandi kewaka ntangu beto kesalaka mambu na bantangu mosi buna.​—Tanga Nkunga 103:7-10.

3. Keti Nzambi kele na zina?

Yezu kutubaka nde: “Tata na beto kele na zulu, zina na nge ya santu kuvanda ya lukumu.” (Matayo 6:9) Ata Nzambi kele ti batitre mingi, yandi kele kaka na zina mosi. Konso ndinga kele ti mutindu yina yo kebingaka zina yango. Na Kikongo, beto kebingaka mbala mingi “Yehowa” to bantangu yankaka “Yawe.”​—Tanga Nkunga 83:18, NW.

Babiblia mingi mekatulaka zina ya Nzambi mpi meyingisaka yo na batitre bonso Mfumu to Nzambi. Kansi, ntangu bo sonikaka Biblia, zina ya Nzambi kuvandaka bambala kiteso ya 7 000. Yezu kuzabisaka zina ya Nzambi ntangu yandi vandaka kutendudila bantu Ndinga ya Nzambi. Yandi sadisaka bantu na kuzaba Nzambi.​—Tanga Yoane 17:26.

4. Keti Yehowa kekudibanzaka sambu na beto?

Yehowa kemonisaka nde yandi ketudilaka beto dikebi na kuwidikilaka yandi mosi bisambu na beto. (Nkunga 65:3) Keti mutindu bampasi kele mingi ketendula nde Nzambi kekudibanzaka ve sambu na beto? Bantu yankaka ketubaka nde, Nzambi kemonisaka beto mpasi sambu na kumeka beto, kansi yo kele ve kyeleka. Biblia ketubaka nde: “Keti Nzambi lenda sala mbi?”​—Yobi 34:10; Tanga Yakobo 1:13.

Nzambi mepesaka bantu lukumu na mutindu yandi mepesaka bo kimpwanza ya kupona mambu. Keti beto kesepelaka ve na kimpwanza yina beto kele na yo ya kupona kusadila Nzambi? (Yozue 24:15) Bampasi kekuma mingi sambu bantu mingi meponaka kusadila bantu yankaka mambu ya mbi. Yehowa kewaka mpasi ntangu yandi kemonaka kukonda lunungu ya mutindu yina.​—Tanga Kuyantika 6:5, 6.

Ntama mingi ve, Yehowa tasadila Yezu sambu na kumanisa bampasi mpi kufwa bantu yina kele na kisina na yo. Kansi na ntwala ya kusala mpidina, Yehowa kele na kikuma ya mbote yina yandi mepesaka nzila na bampasi sambu na mwa ntangu. Dilongi mosi na kati ya masolo yina talanda na nima tatendula kikuma yina Nzambi mepesaka nzila na bampasi.​—Tanga Yezaya 11:4.

5. Inki Nzambi kelombaka beto na kusala?

Yehowa kugangaka beto ti makuki ya kuzaba yandi mpi ya kuzola yandi. Yandi kezolaka nde beto longuka kyeleka ya metala yandi. (1 Timoteo 2:4) Kana beto longuka Biblia, beto tazaba Nzambi mpi yandi takuma nduku na beto.​—Tanga Bingana 2:4, 5.

Sambu Yehowa mepesaka beto luzingu, beto fwete zola yandi mingi kuluta bantu yonso. Beto lenda monisa nde beto kezolaka Nzambi na kusolulaka ti yandi na nzila ya kisambu mpi na kusalaka mambu yina yandi kelombaka beto na kusala. (Bingana 15:8) Yehowa kelombaka beto na kusadila bankaka mambu ti zola.​—Tanga Marko 12:29, 30; 1 Yoane 5:3.

Sambu na kuzaba mambu mingi, tala kapu 1 ya mukanda yai, Inki Biblia Kelongaka Mpenza? yina Bambangi ya Yehowa mebasisaka.

[Kifwanisu ya lutiti 23]

Keti yo kele ti kikuma ya mbote ya kupesa nzila na bampasi sambu na mwa ntangu?