Mutindu ya Kulonga Bana Mambu ya Nzambi—Inki Kele Mutindu ya Kuluta Mbote?

“Bansiku ya mono ke pesa beno bubu, beno kanga yo na ntima na beno. Beno fweti longa yo na bana na beno. Ntangu beno kele na nzila to na nzo, ntangu beno kele na kisalu to beno ke pema, beno fweti longa yo kaka na bana na beno.”​—KULONGA 6:6, 7.

BANTANGU yankaka, bibuti lenda kudiwa bonso nde mukumba ya kulonga bana na bo kele mpasi. Kansi, ntangu bo kesosaka bandongisila, mambu ya kuswaswana yina bo kewaka to ketangaka lenda vwalangasa mabanza na bo. Mbala mingi bantu ya dibuta mpi banduku kenwaninaka na kupesa mabanza na bo. Dyaka, mikanda, masolo yina kele na bazulunalu mpi basite ya Internet kepesaka bibuti bandongisila yina bantangu yankaka kevandaka ya kuswasana.

Kansi, Biblia kepesaka bibuti kaka ve bandongisila ya mefwana na mambu yina bo fwete longa bana kansi mpi lutwadisu ya mbote na mutindu ya kulonga bo. Mutindu baverse yina beto metubila na zulu kemonisa yo, konso kilumbu bibuti fwete sosa mitindu ya kuzabisa bana na bo mambu ya Nzambi. Mambu yai melanda kele kaka bandongisila iya ya Biblia, ya mesadisaka bibuti mingi sambu na kulonga bana na bo mambu ya Nzambi.

1. Sadila lugangu sambu na kulonga. Ntumwa Polo kusonikaka nde: ‘Bikalulu ya Nzambi yina kemonikaka ve kemonanaka pwelele katuka na ntangu yandi salaka bima yonso, sambu yo kemonikaka na bima yina yandi salaka mpi bantu lenda mona nde ngolo na yandi kemanaka ve, mpi nde yandi kele Nzambi mpenza.’ (Roma 1:20) Bibuti lenda sadisa bana na bo na kubakisa nde bo lenda vanda na bangwisana ya kyeleka ti Nzambi, na kubendaka dikebi na bo na bima yina Nzambi megangaka mpi na kusadisaka bo na kubakisa bikalulu na yandi yina kemonanaka na bima yango.

Yezu kusalaka dyambu ya mutindu mosi ntangu yandi vandaka kulonga balongoki na yandi. Mu mbandu yandi tubaka nde: “Beno tala bandeke: Bo ke kunaka ve, bo ke katulaka bima mpi ve na bilanga, bo ke bumbaka yo na nzo ve. Kansi Tata na beno yina kele na zulu ke pesaka bo madia! Keti beno me luta bandeke ve na mfunu?” (Matayo 6:26) Awa, Yezu kumonisaka bikalulu zole ya Yehowa, zola mpi mawa. Kansi yandi sukaka kaka pana ve, yandi sadisaka balongoki na yandi na kubakisa mutindu Nzambi kemonisaka bikalulu yina na bana na yandi.

Ntotila ya mayele Salomo, kutubilaka mayele yina Nzambi mepesaka bafurmi mpi yandi sadilaka bigangwa yina ya fyoti sambu na kupesa dilongi mosi ya mfunu. Yandi sonikaka nde: “Nge muntu ya bumolo, kwenda kutala kaniama yai fourmi, ebuna nge baka mayele. Yandi ke na mbuta ve, mfumu ve, ata muntu ya kuyala yandi ve, kansi yandi ke bumbaka madia na yandi na mvula, ebuna na musibu yandi ke monaka mpasi ve.” (Bingana 6:6-8) Yai kele mutindu ya mbote mpenza ya kulonga bana mfunu ya kubaka balukanu ya mbote mpi kusadila ngolo yina Nzambi mepesaka beto sambu na kulungisa balukanu yango!

Bibuti lenda landa mutindu ya mbote ya kulonga ya Yezu mpi ya Salomo na kusalaka mambu yai kelanda: (1) Kuyula bana na bo banti mpi bambisi yina kesepedisaka bo. (2) Kulonguka mambu mingi ya metala banti mpi bambisi yango. (3) Kusadila banti mpi bambisi yango sambu na kulonga bo mambu ya Nzambi.

2. Landa nkadilu yina Yezu kumonisaka na bayina yandi vandaka kulonga. Na kati ya bantu yonso yina mezingaka na nsi-ntoto, Yezu kuvandaka ti mambu mingi ya mfunu sambu na kutuba. Ata mpidina, yandi sadilaka ntangu na yandi mingi na kuyulaka bangyufula. Yandi vandaka kutula dikebi na mabanza mpi na mawi ya bantu yina vandaka kuwidikila yandi. (Matayo 17:24, 25; Marko 8:27-29) Kiteso mosi, bibuti kele ti malongi mingi ya mfunu sambu na kulonga bana na bo. Kansi, sambu na kulonga na mutindu ya mbote bo fwete landa mbandu ya Yezu mpi kusyamisa bana na bo na kutuba mutindu yina bo kekudiwa.

Bibuti tasala nki kana bana kemonisa nkadilu ya mbi to kebakisa ve nswalu malongi ya mfunu? Beto tadila mutindu Yezu kusadilaka bantumwa na yandi mambu. Bantangu yankaka, bo vandaka kuswana mpi kubakisa ve nswalu mambote ya kumonisa kikalulu ya kudikulumusa. Kansi, Yezu vandaka kukanga-ntima mpi kuzabisa bo mbala na mbala mfunu ya kudikulumusa. (Marko 9:33, 34; Luka 9:46-48; 22:24, 25) Bibuti yina kelanda mbandu ya Yezu tasungika bana na bo ti kukanga-ntima mpi kana mpila kele tavutukila dilongi yina mosi tii ntangu mwana tabakisa mbote-mbote mfunu na yo.a

3. Longa na nsadisa ya mbandu. Yo tavanda mbote nde bibuti kulanda ndongisila yina Polo kupesaka Bakristu ya Roma. Yandi sonikilaka bo nde: “Nge muntu ke longaka bantu ya nkaka, sambu na nki nge ke kudilongaka ve nge mosi? Nge muntu ke longaka nde muntu lenda kuyiba ve, sambu na nki nge ke yibaka?”​—Roma 2:21.

Ndongisila yai kele mfunu sambu bana kelandaka mambu yina bibuti kesalaka kuluta mambu yina bibuti ketubaka. Kana bibuti kesala mambu yina bo kelongaka bana, ntembe kele ve nde bana na bo tawidikilaka mambu yina bo kelongaka.

4. Yantika kulonga ntangu mwana kele ya fyoti. Timoteo yina vandaka kusala kisalu ya kimisionere ti ntumwa Polo, vandaka mbandu ya mbote sambu na bantu ya nzyunga na yandi. (Bisalu 16:1, 2) Kikuma mosi kele sambu nde, “katuka kileki” bo longaka yandi “mukanda ya Nzambi.” Mama ya Timoteo mpi nkaka na yandi vandaka kutangila yandi kaka ve Masonuku kansi mpi kusadisa yandi na kuyindula bakyeleka yina kuvandaka na Masonuku yango.​—2 Timoteo 1:5; 3:14, 15.

Kisika Nge Lenda Baka Lusadisu

Bambangi ya Yehowa kebasisaka mikanda mingi ya kevandaka ti lukanu ya kusadisa bibuti na kulonga bana na bo kyeleka ya Nzambi. Bo kenyemaka mikanda yankaka sambu na kusadisa bana ya fyoti. Mikanda yankaka lenda sadisa bibuti mpi bana na bo ya batoko na kulanda kusolula mbote.b

Ya kyeleka, na ntwala nde bibuti kulonga bana na bo mambu ya Nzambi, bo fwete zaba bamvutu na bangyufula yankaka ya mpasi yina bana lenda yula. Mu mbandu, nki mvutu nge tapesa kana bo yula nge bangyufula yai: Sambu na nki Nzambi mepesaka nzila na bampasi? Inki kele lukanu ya Nzambi sambu na ntoto? Bafwa kele na wapi? Bambangi ya Yehowa tasepela kusadisa nge na kubaka bamvutu na bangyufula yai mpi yankaka na mpila nde nge ti dibuta na nge kukwenda penepene na Nzambi.​—Yakobo 4:8.

[Banoti na nsi ya lutiti]