Sambu na Nki Kulemfuka na Minsiku ya Biblia?

KETI mambu yina Biblia ketubaka na yina metala kuvukisa nitu memanaka ngala mpi kele ve na mfunu? Ve. Nkutu, mambu yina Biblia ketubaka na yina metala kuvukisa nitu lenda sadisa beto na kubuya:

▪ Bamaladi yina kekatukaka na kuvukisaka nitu

▪ Mavumu ya balabala

▪ Mpasi ya kufwa makwela

▪ Kansansa yina keyangisama

▪ Nsoni na meso ya bantu na mambu yina bo mesadila nge

Yehowa Nzambi,a Ngangi na beto kezola nde beto sepela mpi beto sadila mbote makabu na yandi. Nzambi kele “Muntu [yina] ke longa nge sambu na mambote na nge.” (Yezaya 48:17) Muntu yina kelemfukilaka minsiku ya Biblia na yina metala kuvukisa nitu kebakaka mambote yai:

▪ Kendimamaka na Nzambi

▪ Kebakaka ngemba ya mabanza

▪ Kevandaka na bangwisana ya mbote ti dibuta na yandi

▪ Kezabanaka bonso muntu yina kevandaka ti bikalulu ya mbote

▪ Kekudizitisaka

Kansi, inki nge lenda sala kana nge kelemfukilaka ve bansiku ya Biblia ya bikalulu ya mbote? Keti nge lenda yambula luzingu na nge ya mbi? Keti Nzambi tavila ve mambu ya mbi yina nge mesalaka?

Tadila dyambu yai: Bantu yankaka yina kukumaka Bakristu na dibundu ya mvu-nkama ya ntete vandaka kusala pite, bizumba, mpi kuvukisa nitu babakala ti babakala to bankento ti bankento. Kansi, bo yambulaka bifu na bo ya mbi mpi bo bakaka mambote mingi. (1 Korinto 6:9-11) Bubu yai, bantu mingi na nsi-ntoto ya mvimba mesalaka mutindu mosi. Bo meyambulaka luzingu ya mansoni mpi mebakaka mambote ya kulemfukila minsiku ya Biblia. Mu mbandu, tala mambu yina kukuminaka Sara, yina beto tubilaka na disolo ya ntete.

“Mono Kudiwaka Mbala Mosi Bonso nde Mono Mekatuka na Kimpika”

Sara kumonaka nde, luzingu yina ya mansoni kupesaka yandi ve kimpwanza mpi kyese yina yandi vandaka kusosa. Yandi ketuba nde: “Mono monaka nde kansansa na mono kukumaka ngolo. Mono kumaka kuwa nsoni mpi mono vandaka na boma nde mono lenda baka divumu to maladi mosi ya mbi. Mono vandaka kaka kukwikila nde, Nzambi kele mpi mono zabaka nde mambu yina mono vandaka kusala vandaka kupesa yandi mpasi. Mono vandaka kudimona mvindu mpi yo vandaka kupesa mono mpasi.”

Bubu yai, Sara mebakaka ngolo ya kusoba luzingu na yandi. Yandi sosaka lusadisu ya bibuti na yandi yina kele Bambangi ya Yehowa. Yandi lombaka mpi lusadisu ya bankuluntu ya dibundu. Sara ketuba nde: “Mono sepelaka mingi na zola mpi bumbote ya bibuti na mono mpi ya bankuluntu. Mono kudiwaka mbala mosi bonso nde mono mekatuka na kimpika.”

Bubu yai, Sara kesansa yandi mosi bana na yandi zole. Yandi ketuba nde: “Mono kezabisaka bana na mono na pwelele yonso luzingu yina mono vandaka ti yo. Mono kezolaka nde bo bakisa mambu ya mpasi yina kukuminaka mono sambu mono lemfukilaka ve minsiku ya Nzambi. Mono kele ti lukanu ya kusadisa bo na kulemfukila minsiku ya Nzambi na yina metala kuvukisa nitu sambu bo vanda ti mavimpi, kansansa, mpi mawi ya mbote. Mono kendima nde, Nzambi kepesaka beto bansiku ya bikalulu ya mbote sambu yandi kezolaka ve nde beto nyokwama.”

Nge mpi lenda baka mambote ya kulemfukila lutwadisu ya zola ya Nzambi. Biblia kepesa lusilu yai: “Bansiku ya Mfumu Nzambi kele ya kieleka, bantu yina ke landaka yo bo kele kiese; yo ke na kifu ve, yo ke kangulaka meso ya bantu. Yo ke pesaka mono . . . matabisi kana mono landa yo.”​—Nkunga 19:9, 12.b

[Banoti na nsi ya lutiti]

[Bangogo sambu na kubenda dikebi ya kele na lutiti 8]

Mbala mingi, bantu yina kebuyaka kuzitisa minsiku ya Biblia kepesaka bankaka mpasi na mawi

[Bangogo sambu na kubenda dikebi ya kele na lutiti 9]

Bantu yina kezitisaka minsiku ya Biblia kevandaka ti kansansa ya mbote mpi bangwisana ya mbote na dibuta