Armagedoni—Inki Bantu Yankaka Ketubaka Sambu na Yo?

“Mpi bo vukisaka bo na kisika yina bo kebinga na Kiebreo Armagedoni.”​—KUSONGA 16:16, English Standard Version.

INKI mambu nge keyindula ntangu nge kewa ngogo “Armagedoni”? Ziku, nge keyindula mvita mosi ya nene. Ata ngogo Armagedoni kele kaka mbala mosi na Biblia, bansangu mpi bamfumu ya mabundu kesadilaka yo mbala na mbala.

Keti mambu yina bantu mingi ketubaka sambu na Armagedoni kewakanaka ti yina Biblia kelongaka? Yo kele mbote na kuzaba mvutu. Sambu na inki? Sambu kyeleka na yina metala Armagedoni lenda katula nge boma, lenda temuna mabanza na nge na yina metala makwisa mpi lenda vanda ti bupusi na mambu yina nge keyindulaka sambu na Nzambi.

Tadila bangyufula tatu ya kelanda mpi fwanisa mambu yina bantu mingi keyindulaka sambu na Armagedoni ti yina Biblia kelongaka mpenza.

1. KETI ARMAGEDONI KELE MVITA YINA BANTU TAVANDA NA KISINA NA YO?

Mbala mingi bimwangi-nsangu mpi bantu yina kesalaka bansosa ketubilaka ngogo “Armagedoni” bonso mvita yina bantu kevandaka na kisina na yo. Mumbandu, bantu fwanisaka Armagedoni ti Mvita ya I mpi ya II yina salamaka na ntoto ya mvimba. Na nima ya bamvita yai, bantu waka boma nde États-Unis mpi Union Soviétique tanwana na kusadilaka minduki yina kefwaka bantu mingi. Bimwangi-nsangu bingaka mavwanga yina zolaka kuyalumuka na ntoto ya mvimba “tiya ya Armagedoni.” Bubu yai, bantu ya kesalaka bansosa kewa boma nde kubeba ya mupepe tanata bansoba ya nene na ntoto mpi kekebisa nde ntama mingi ve “Armagedoni tasalama na ntoto ya mvimba.”

Mambu yina bo ketubaka kemonisa nde: Bantu kele ti kiyeka ya nene na yina metala makwisa ya ntoto mpi ya bima yonso yina kele na ntoto. Kana baluyalu kukeba ve, ntoto tabeba kimakulu.

Mambu yina Biblia kelongaka: Nzambi tapesa ve bantu nzila ya kubebisa ntoto. Biblia kendimisa beto nde Yehowaa gangaka ve ntoto sambu na “kuvanda ya mpamba.” Kansi yandi yidikaka yo “sambu bantu kuzinga muna.” (Yezaya 45:18) Na kisika ya kuyambula nde bantu kubebisa mpenza ntoto, Nzambi ‘tafwa bantu yina ke bebisaka nsi-ntoto!’​—Kusonga 11:18.

2. KETI ARMAGEDONI KELE KISUMBULA YA LUGANGU?

Bantangu yankaka bimwangi-nsangu kesadilaka ngogo “Armagedoni” sambu na kutubila kidimbu ya bisumbula ya nene ya lugangu. Mumbandu, na mvu 2010 zulunalu mosi vandaka na ntu-dyambu “‘Armagedoni’ na Haïti.” Yo vandaka kumonisa nde kunikana ya ntoto yina salamaka bisika mingi na nsi yai vandaka na kisina ya bampasi, kubeba ya bima mpi ya lufwa ya bantu. Bimwangi-nsangu mpi bantu ya kesalaka bafilme kesadilaka ngogo yina kaka sambu na mambu ya nene ve yina mesalamaka dezia kansi mpi sambu na yina bo kewaka boma nde yo tasalama. Mumbandu, bo sadilaka ngogo “Armagedoni” sambu na kumonisa malanda yina bantu keyindulaka ya tabasika na kututana ya ngolo mosi ya zulu (astéroïde) ti ntoto.

Mambu yina bo ketubaka kemonisa nde: Armagedoni kele konso dyambu ya kukonda kukana yina kefwaka bantu ya mesala ata kima mosi ve. Nge kele mpenza ve ti kima ya kusala sambu na kuditanina.

Mambu yina Biblia kelongaka: Armagedoni kele ve dyambu ya kukonda kukana yina kefwaka bantu yonso. Kansi, Armagedoni tafwa kaka bantu ya mbi. Biblia kesila nde: “Kubika fioti kaka bantu ya mbi ta vila, nge lenda sosa bo kansi nge ta mona bo ve.”​—Nkunga 37:10.

3. KETI NZAMBI TAFWA NTOTO NA ARMAGEDONI?

Bantu mingi ya kesambilaka kekwikilaka nde mvita ya nsuka tasalama na kati ya mambote ti mambi yina tafwa ntoto na beto. Nsosa mosi ya salamaka na iniversite ya Princeton na nsi États-Unis, monisaka nde bambuta 40 na kati ya nkama kendimaka nde nsi-ntoto tafwa na “mvita ya Armagedoni.”

Mambu yina bo ketubaka kemonisa nde: Nzambi gangaka ve bantu sambu na kuzinga kimakulu na ntoto to yandi gangaka ve ntoto sambu yo zinga mvula na mvula. Ntangu Nzambi gangaka bantu, yandi zabaka nde bo yonso fwete fwa na ntangu mosi buna.

Mambu yina Biblia kelongaka: Biblia ketuba pwelele nde Nzambi metulaka ‘ntoto na zulu ya bafondasio na yo na mpila nde yo zinga kimakulu.’ (Nkunga 104:5) Sambu na bantu, Biblia ketuba nde: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”​—Nkunga 37:29.

Ya kyeleka, mambu yina Biblia ketubaka meswaswana ti mambu yina bantu mingi keyindulaka sambu na Armagedoni. Yo yina, inki kele kyeleka na yina metala Armagedoni?

[Noti na nsi ya lutiti]