Mvita ya Armagedoni Tasalama Inki Ntangu?

‘Na nima mono talaka diaka, ebuna mono monaka ndonga mosi ya bantu mingi; ata muntu mosi ve lungaka kutanga bantu yina yonso. Bantu yina vandaka ya makanda yonso ti ya bandinga yonso ti ya bansi yonso. Bo mekatuka na mpasi ya nene.’​—KUSONGA 7:9, 14.

NTANGU melunga sambu na mvita ya Armagedoni. Inki mutindu?

Kele dezia ti kimvuka ya bantu yina kesadila Yehowa mpi kezinga na kuwakana ti minsiku ya kuzanguka ya bikalulu ya mbote yina kele na Biblia. Na lusadisu ya Nzambi, bamilio ya bantu yina mekatuka na bansi yonso, na makanda yonso mpi na bandinga yonso mevukana sambu na kusala kimvuka mosi ya bampangi yina kezolanaka. Kimvuka yina kemonanaka na kati ya Bambangi ya Yehowa.​—Yoane 13:35.

Kubika fyoti Satana tavukisa bantu na yandi mpi tanwanisa bantu ya ngemba yina kemonana bonso nde bo mekonda lutaninu. (Ezekiele 38:8-12; Kusonga 16:13, 14, 16) Inki mutindu nge lenda kwikila dyambu yai? Biblia ketubilaka mambu ya sikisiki yina kesadisa beto na kuzaba ntangu mvita ya Armagedoni tasalama. Mambu mingi yina Biblia tubilaka kele na kulungana dezia.

Mambu Yina Kelungana na Meso na Nge

Balongoki ya Yezu yulaka yandi kidimbu yina tasadisa bantu na kuzaba nde “ngidika ya bima kekwenda na nsuka.” (Matayo 24:3, NW) Yezu pesaka mvutu na kutubilaka ntangu yina “bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka. Nzala ta vanda mingi mpenza, ntoto mpi ta nikana na bisika ya mutindu na mutindu.” Yandi yikaka nde: “Mambu yina yonso kele bonso luyantiku ya misongo ke simba nkento na ntangu ya kubuta mwana.” (Matayo 24:7, 8) Ntumwa Polo bingaka nsungi yina mosi “bilumbu ya nsuka,” mpi yandi tubaka nde yo tavanda bilumbu ya “mpasi mingi.” (2 Timoteo 3:1) Keti nge kemona nde bambikudulu yina ketubila mambu yai ya kelungana bubu yai?

Sambu na nki yo tavanda nsungi ya mpasi mingi? Ntumwa Yoane kepesa kikuma. Yandi bikulaka nde “ntangu mingi ve me bika” sambu Yezu kukanga Satana ti bademo na yandi awa na ntoto. Biblia kemonisa nde “yandi me dasuka.” (Kusonga 12:7-12) Keti nge kebakisa nde nkadilu ya kuwa makasi mpi kusala mubulu kemonana na kati ya bantu bubu yai, kisika mosi ve kansi na nsi-ntoto ya mvimba?

Yezu tubaka mpi nde kisalu mosi ya kuyituka tasalama na ntangu yai ya mpasi. Yandi tubaka nde: “Bo ta longaka nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Matayo 24:14) Bubu yai, na bansi kuluta 235 Bambangi ya Yehowa kelonga nsangu ya mbote ya Kimfumu ya Nzambi na bandinga kuluta 500. Nzozulu ya Nkengi mpi Réveillez-vous ! kele mikanda zole yina ketendulaka Biblia ya Bambangi ya Yehowa kebasisaka mpi bo kekabulaka bazulunalu yina mingi mpenza na ntoto ya mvimba. Bambangi ya Yehowa mebalulaka mpi Biblia na bandinga kiteso ya 100. Kisalu na bo kesalamaka na nsadisa ya bantu ya luzolo ya mbote mpi mesimbama na makabu ya luzolo ya mbote. Keti kisalu yai ya kusamuna lenda vanda kulungana ya mbikudulu ya Yezu?

Biblia ketendulaka mpi mambu yina tasala nde Yehowa Nzambi kunwana mvita ti bambeni na yandi. Beto tadila bambikudulu tatu yina nge tamona kulungana na yo.

Mambu Yina Tasalama Ntama Mingi Ve

Mbikudulu 1. Biblia ketuba nde bantu ya bansi yonso tatula dikebi na bangogo yai “ngemba mpi lutaninu.” Mbala yankaka bo lenda yindula nde bo kezola kumanisa mambu yina kepesaka bantu mpasi. Kansi, mambu yina tasalama na nima tanata mpenza ngemba.​—1 Tesalonika 5:1-3, NW.

Mbikudulu 2. Baluyalu mingi tabaka lukanu ya kufwa mabundu ya nsi-ntoto. Biblia kefwanisaka baluyalu yina ti mbisi ya mfinda mpi mabundu ya nsi-ntoto ti nkento yina mevanda na zulu ya mbisi yango. (Kusonga 17:3, 15-18) Kukonda kuzaba, mbisi yina ya kifwani tasala mambu yina Nzambi kezola ntangu yo tafwa mabundu ya luvunu yina ketubaka nde yo kemonisaka Nzambi.

Ntumwa Yoane sadilaka bidimbu sambu na kutubila dyambu yango na bangogo yai: “Bibongo kumi yina ya nge me mona ti mbisi yina, bo ta vanda na kimbeni ti nkento yina: Bo ta botula bima na yandi yonso, bo ta bika yandi kinkonga, bo ta dia misuni na yandi, ebuna bo ta yoka yandi. Sambu Nzambi tulaka na ntima na bo yonso mabanza mosi sambu na kupesa kiyeka na bo ya kimfumu na mbisi yina, tii kuna ya mambu yonso ya Nzambi tubaka me lunga.”​—Kusonga 17:16, 17.

Mbikudulu 3. Na nima ya kufwa mabundu ya luvunu, Satana tavukisa bamfumu ya bansi yonso sambu na kunwanisa bantu yina kesambilaka Yehowa Nzambi.​—Kusonga 7:14; Matayo 24:21.

Inki Mutindu yo Tatadila Nge?

Kana nge mebakaka ntete ve dibaku ya kulonguka Biblia, nge lenda yindula nde mambu yina beto metubila talungana ve. Kansi, kele ti kikuma ya mbote ya kukwikila nde mambu yonso talungana mpi tasalama ntama mingi ve. Bambikudulu yina Biblia ketubilaka mpi ya melunganaka dezia kepesa kivuvu yina.a

Sambu na nki ve kubaka mwa ntangu sambu na kuzaba kikuma yina Bambangi ya Yehowa kendimaka nde ‘mvita ya kilumbu ya nene ya Nzambi Nkwa Ngolo Yonso’ mefinama mpi kikuma yina nge lenda vanda ve na boma na yo? Lomba bo na kusolula ti nge mambu yina Biblia kezabisa nge na kusala sambu na kuvanda na kati ya bantu yina Yehowa tatanina. (Kusonga 16:14) Mambu yina nge talonguka lenda soba mutindu na nge ya kutadila makwisa.

[Noti na nsi ya lutiti]

[Bangogo sambu na kubenda dikebi ya kele na lutiti 8]

Keti kisalu yina Bambangi ya Yehowa kesalaka lenda vanda kulungana ya mbikudulu ya Biblia?