“Yandi Kele Nzambi . . . ya Bantu Yina Kele na Luzingu”

Keti lufwa kele ngolo kuluta Nzambi? Ata fioti ve! Inki mutindu lufwa, to konso “mbeni” ya nkaka lenda vanda ngolo kuluta Nzambi Nkwa-Ngolo Yonso? (1 Bakorinto 15:26; Kubasika 6:3) Nzambi kele ti ngolo ya kukatula lufwa na nsadisa ya lufutumuku, mpi yandi ke sila nde yandi ta sala yo na nsi-ntoto na yandi ya mpa.a Keti lusilu yina kele ya kieleka? Yezu, Mwana ya Nzambi ke zabisa beto bangogo yina lenda fulusa bantima na beto ti kivuvu.​—Tanga Matayo 22:31, 32.

Ntangu Yezu vandaka kutuba na Basaduse yina vandaka kukwikila ve na lufutumuku, yandi tubaka nde: “Sambu na yina me tala lufutumuku ya bafwa, keti beno me tangaka ve mambu yina Nzambi tubilaka beno nde: ‘Mono kele Nzambi ya Abrahami mpi Nzambi ya Izaki mpi Nzambi ya Yakobi’? Yandi kele Nzambi ya bafwa ve, kansi ya bantu yina kele na luzingu.” Na verse yai, Yezu ke tubila mambu yina Nzambi zabisaka Moize na mwa-nti yina vandaka kupela tiya pene-pene ya mvu 1514 N.T.B. (Kubasika 3:1-6) Sambu na Yezu, bangogo yina Yehowa zabisaka Moize​—“Mono kele Nzambi ya Abrahami mpi Nzambi ya Izaki mpi Nzambi ya Yakobi”—​ke monisa nde lusilu ya lufutumuku kele diambu yina ta lungana mpenza. Inki mutindu?

Beto tadila baverse yina kele na ntwala mpi na nima ya bangogo yina. Ntangu Yehowa vandaka kuzabisa Moize mambu yina, batata yai ya mabuta Abrahami, Izaki mpi Moize vandaka me fwaka tuka ntama. Abrahami fwaka bamvula 329 me luta, Izaki bamvula 224 mpi Yakobi bamvula 197 me luta. Ata mpidina, Yehowa ke tuba nde “mono kele” Nzambi na bo, kansi ve nde “mono vandaka” Nzambi na bo. Yehowa tubaka sambu na batata yina tatu ya mabuta ya me fwaka bonso nde bo vandaka kaka na luzingu. Sambu na nki?

Yezu pesaka mvutu nde: “Yandi [Yehowa] kele Nzambi ya bafwa ve, kansi ya bantu yina kele na luzingu.” Bangogo ya Yezu ke sadisa beto na kubakisa diambu mosi ya mfunu na yina me tala lufutumuku. Kana lufutumuku vandaka ve, disongidila Abrahami, Izaki mpi Yakobi ta bikala kaka ya kufwa kimakulu mpi ta vutuka ve na luzingu. Kana yo kele mpidina, Yehowa ta vanda Nzambi ya bafwa. Mpidina yo ta tendula nde lufwa kele ngolo mingi kuluta Yehowa; mpi nde yandi kele ve ti ngolo ya kukatula bansadi na yandi ya kwikama na kimpika ya lufwa.

Yo yina, inki beto lenda tuba sambu na Abrahami, Izaki mpi Yakobi mpi bansadi yonso ya Yehowa ya kwikama yina me fwaka? Yezu tubaka bangogo yai ya ke pesa kikesa: “Na meso na yandi bo yonso kele na luzingu.” (Luka 20:38) Nkutu, lukanu ya Yehowa ya kufutumuna bansadi na yandi ya kwikama kele mpenza ya kieleka na mpila nde yandi ke yindulaka sambu na bo bonso nde bo kele kaka na luzingu. (Baroma 4:16, 17) Yehowa ta bumba bansadi yina yonso na mabanza na yandi ya kukonda ndilu, tii na ntangu yina yandi me tulaka sambu na kuvutula bo na luzingu.

Keti kivuvu ya kukutana diaka ti bantu yina beto vandaka kuzola ya me fwaka ke sepedisa nge? Kana mpidina, kuvila ve nde Yehowa kele ngolo mingi kuluta lufwa. Ata kima mosi ve lenda kanga yandi nzila ya kulungisa lusilu na yandi ya kufutumuna bafwa. Yo yina, longuka mambu mingi ya me tala lusilu ya lufutumuku mpi Nzambi yina ta lungisa lusilu yina. Kusala mpidina ta sadisa nge na kukwenda pene-pene na Yehowa, “Nzambi . . . ya bantu yina kele na luzingu.”