Keti Nge Lenda Vanda ti Luzingu ya Kele ti Lukanu?

BANGOGO yai kele ya kieleka mpenza! Luzingu na nsi-ntoto yai “kele kaka mpasi na mpasi.” Ziku nge me kudiyulaka nde: ‘Keti mono lenda vanda mpenza na luzingu ya kele ti lukanu bubu yai?’

Beto tadila mbandu ya Maria. Ntangu yonso yandi vandaka muntu ya kikesa, kansi bubu yai yandi me kuma ti bamvula 84, yandi kele ve ti makuki ya kubasika na nzo yandi mosi. Yandi ke yindulaka mbote kansi nitu na yandi kele diaka ngolo ve. Inki mutindu yandi lenda mona nde luzingu yina kele ti lukanu?

Inki beto lenda tuba sambu na nge? Na ntangu mosi buna, ziku nge me kudiyulaka kana luzingu na nge kele ti lukanu. Mbala ya nkaka nge ke salaka ntangu yonso kisalu mosi mpi kisalu yango ke lembisa nge. Ziku, bantu mingi ke bakaka ve na mbalu bikesa na nge mpi kisalu na nge. Ata luzingu na nge ke monana mbote bubu yai, nge lenda kudiyangisa sambu na bilumbu ke kwisa. Na bantangu ya nkaka, nge lenda mpi kudiwa nde nge kele nge mosi to nge lenda lemba nitu. Mbala ya nkaka kukonda kuwakana to mavwanga kele na kati ya dibuta na nge. Ziku, nge me fwisaka muntu mosi ya nge ke zolaka. Bakala mosi na zina ya André vandaka kuzola mingi tata na yandi yina na kintulumukina, belaka mpi fwaka. Yo vandaka diambu mosi ya mpasi sambu na André, mpi yandi ke monaka nde yandi lenda vila ve mpasi mpi mawa yina.

Yo vanda beto ke kutana ti bampasi ya nki mutindu, kele ti kima mosi ya beto ke vandaka na mfunu ya kuzaba: Keti mono lenda vanda mpenza ti luzingu ya kele ti lukanu? Beto lenda zwa mvutu na luzingu ya Yezu Kristu​—muntu mosi yina zingaka na ntoto bamvula kiteso ya 2 000 me luta. Ata yandi kutanaka ti bampasi ya mitindu yonso, Yezu vandaka mpenza ti luzingu yina vandaka ti lukanu. Beto mpi lenda vanda ti luzingu ya mutindu mosi kana beto landa mbandu na yandi.