Bo Kudipesaka na Luzolo Yonso na Mexique

YO KELE kiese na kumona mutindu baleke mingi ya Bambangi ke kumisa luzingu na bo pete sambu na kudipesa mingi na kisalu ya kusamuna. (Mat. 6:22) Inki bansoba bo ke salaka? Inki bampasi bo ke kutanaka ti yo? Sambu na kuzaba yo, bika beto tadila mbandu ya baleke ya nkaka na kati na bo yina ke samuna ntangu yai na Mexique.

“YO LOMBAKA NDE BETO SALA BANSOBA”

Dustin ti Jassa yina katukaka na États-Unis kwelanaka na Yanuari 2007. Ntangu fioti na nima, bo lungisaka ndosi na bo ya kusumba maswa ya fioti mpi kuzinga na kati yo na nsungi ya mvula mosi. Bo kangisaka maswa yango pene-pene ya Astoria, na mbanza Oregon na insi États-Unis, yo kele mbanza mosi ya kitoko yina kele na nziunga ya bamfinda, miwanda mpi bangumba yina nsongi na yo me fuluka ti neze; mpi yo kele ntama mingi ve ti nzadi-mungwa ya Pacifique. Dustin ke tuba nde: “Bisika yonso yina nge ke tala, mbanza yango kele kaka kitoko mpenza!” Bankwelani yai vandaka kuyindula nde bo vandaka ti luzingu ya kukonda mindondo mpi bo vandaka kutudila Yehowa ntima. Bo vandaka kuyindula mutindu yai: “Nkutu, beto ke zingaka na kati ya maswa ya bametre 7,9 mpi beto ke salaka kisalu ya kinsuni kilumbu ya mvimba ve, beto ke kwendaka na dibundu mosi ya ndinga ya nzenza mpi bantangu ya nkaka beto ke salaka bonso bapasudi-nzila nsadisi.’ Kansi, na nima ya mwa ntangu, bo bakisaka nde bo kudikusaka. Dustin ke tuba nde: “Na kisika ya kupesa maboko na dibundu yina, mbala mingi beto vandaka kubaka ntangu mingi sambu na kuyidika maswa na beto. Beto zabaka nde kana beto ke zola mpenza kutula Yehowa na kisika ya ntete, beto fwete sala bansoba.”

Jassa ke yika nde: “Na ntwala nde beto kwelana, mono vandaka kuzinga na Mexique, mpi mono vandaka na dibundu mosi ya Kingelesi. Mono vandaka kusepela kusamuna kuna, mpi mono vandaka na mpusa ya kuvutuka kuna.” Sambu na kulungisa mpusa na bo ya kukwenda kusamuna na insi ya nzenza, na lusambu na bo ya dibuta, Dustin ti Jassa yantikaka kutanga masolo ya luzingu ya bampangi ya babakala mpi ya bankento yina me kwendaka na bansi yina bambuma yelaka sambu na kukatula yo. (Yoa. 4:35) Dustin ke tuba nde: “Beto zolaka nde beto mpi kuwa kiese yina.” Ntangu banduku na bo ya Mexique zabisaka bo nde kimvuka mosi ya mpa kele na mfunu ya lusadisu, Dustin ti Jassa yindulaka sambu na yo. Bo yambulaka bisalu na bo, tekaka maswa na bo mpi kwendaka na Mexique.

“DIAMBU YA KULUTA MBOTE YINA BETO SALAKA”

Dustin ti Jassa kwendaka kuzinga na mbanza Tecomán, yina kele pene-pene ya nzadi-mungwa ya Pacifique kansi na kitamina ya bakilometre 4 345 na sudi ya Astoria. Dustin ke tuba nde: “Na kisika ya mupepe mpi bangumba ya kitoko, mwini vandaka ngolo kuna mpi beto vandaka kumona banti ya citron na ntama.” Na luyantiku, yo vandaka mpasi sambu na kuzwa kisalu. Sambu bo vandaka ve ti mbongo mingi, bo vandaka kudia loso ti madesu suka ti nkokila, konso mposo. Jassa ke tuba nde: “Kansi ntangu beto vandaka kusaya madia yango, balongoki na beto ya Biblia yantikaka kupesa beto mangulu, mankondo, payi-payi, mpi basaki ya kufuluka ti ba citron!” Nsuka-nsuka, bo zole zwaka kisalu na ekole mosi sambu na kulonga ndinga Taiwan na nzila ya Internet. Ntangu yai, mbongo yina bo ke bakaka na kisalu yina ke sadisaka bo na kulungisa bampusa na bo ya konso kilumbu.

Inki mutindu Dustin ti Jassa vandaka kudiwa sambu na luzingu na bo ya mpa? Bo ke tuba nde: “Kukwenda kuzinga kuna vandaka diambu ya kuluta mbote yina beto salaka. Bangwisana na beto ti Yehowa mpi ya beto zole kumaka ngolo kuluta mutindu yo vandaka ntete. Konso kilumbu beto ke salaka mambu mingi kumosi​—kukwenda kusamuna, kusolula na mutindu beto lenda sadisa balongoki na beto ya Biblia, mpi kubongisa balukutakanu. Katula yo, beto kele diaka ve ti luzingu ya mpasi mutindu yo vandaka ntete.” Bo ke yika nde: “Ntete beto vandaka kubakisa ve bangogo yina kele na Nkunga 34:9: ‘Meka, mpi tala mutindu Yehowa kele mbote’ kansi ntangu yai beto me mona mpenza bukieleka ya lusilu yina.”

INKI KE PUSAKA MAFUNDA YA BAMPANGI YA LUZOLO YA MBOTE NA KUSALA KISALU YINA?

Bampangi ya bankento mpi ya babakala kuluta 2 900 ya bampumpa mpi bayina me kwelaka​—yina mingi na bo kele ti bamvula 20 to kuluta mpi bankaka bamvula 30 to kuluta​—me kwendaka kuzinga na Mexique sambu na kusamuna kisika yina mpusa ya bansamuni ya Kimfumu kele mingi. Sambu na nki Bambangi yina yonso ndimaka kusala diambu yina ya mpasi? Ntangu bo yulaka bankaka na kati na bo ngiufula yina, bo pesaka bikuma tatu ya mfunu. Inki kele bikuma yango?

Sambu na kumonisa zola na bo sambu na Yehowa mpi bamfinangani na bo. Leticia bakaka mbotika ntangu yandi vandaka ti bamvula 18. Yandi ke tuba nde: “Ntangu mono kudipesaka na Yehowa, mono bakisaka nde yo ke tendula kusadila yandi na ntima na mono ya mvimba mpi na moyo na mono ya mvimba. Yo yina, sambu na kumonisa nde mono ke zolaka Yehowa na ntima ya mvimba, mono vandaka na mpusa ya kusadila mingi ntangu mpi ngolo na mono na kisalu na yandi.” (Mar. 12:30) Hermilo, yina kele ntangu yai bakala ya Leticia, kwendaka kusamuna kisika mpusa ya bansamuni ya Kimfumu vandaka mingi ntangu yandi lutisaka bamvula 20. Yandi ke tuba nde: “Mono bakisaka nde kusadisa bankaka na kulungisa bampusa na bo ya kimpeve kele mutindu ya kuluta mbote ya kumonisa zola na mono sambu na bamfinangani na mono.” (Mar. 12:31) Yo yina, yandi katukaka na Monterrey, mbanza mosi ya kimvwama kisika yandi vandaka kusala na banki mpi vandaka ti luzingu ya mbote mpenza, mpi kwendaka na mbanza mosi ya fioti.

Sambu na kuwa kiese ya kieleka. Ntangu fioti na nima ya mbotika, Leticia kwendaka ti mupasudi-nzila mosi ya nkento ya kele ti eksperiansi mingi na mbanza mosi ya ntama, mpi kuna bo samunaka na nsungi ya ngonda mosi. Leticia ke tuba nde: “Mono yitukaka ngolo. Kumona mutindu bantu vandaka kusepela na nsangu ya Kimfumu yina beto vandaka kulonga bo, pesaka mono kiese mingi. Na nsuka ya ngonda yina, mono kuditubilaka nde: ‘Yo kele diambu yina mono ke zola kusala na luzingu na mono!’” Yo kele mpi mutindu mosi sambu na Essly, mpangi-nkento mosi ya mpumpa yina katukaka kulutisa bamvula 20; kiese yina yandi monaka na bampangi ya nkaka siamisaka yandi na kukwenda kusamuna kisika mpusa vandaka mingi. Ntangu yandi vandaka ntete na banzo-nkanda kumi na zole ya luyantiku, yandi kutanaka ti Bambangi mingi ya kikesa yina vandaka kusamuna kisika mpusa vandaka mingi. Yandi ke tuba nde: “Kiese yina mono monaka na bilungi ya bampangi yina ya babakala mpi ya bankento pesaka mono mpusa ya kuvanda ti luzingu yina bo vandaka ti yo.” Bampangi mingi ya bankento salaka bonso Essly. Nkutu, na Mexique bampangi-bankento ya bampumpa kuluta 680 ke samunaka bisika yina mpusa kele mingi. Bo kele mbandu ya mbote mpenza sambu na baleke mpi bambuta!

Sambu na kuvanda ti luzingu yina kele ti lukanu mpi ya ke pesaka kiese. Na nima ya kumanisa banzo-nkanda kumi na zole ya luyantiku, Essly bakaka bourse sambu na kukwenda kutanga na universite. Banduku na yandi siamisaka yandi na kundima yo sambu na kuvanda ti luzingu yina bantu ke bingaka “luzingu ya mbote” disongidila, kubaka diplome na universite, kuvanda ti kisalu ya mbote, kusumba kamio mpi kusala banzietelo. Kansi, yandi landaka ve bandongisila na bo. Essly ke tuba nde: “Banduku na mono mingi ya Bakristu kudipesaka na kusosa bima yina, mpi mono bakisaka nde bo yambulaka kutula balukanu ya kimpeve na kisika ya ntete. Mono monaka mpi nde, bankaka sukaka mbi sambu bo kutanaka ti bampasi mingi na mutindu bo kudikotisaka na mambu ya nsi-ntoto yai. Mono vandaka na mpusa ya kusadila buleke na mono sambu na kusadila Yehowa mingi.”

Essly salaka ba formasio ya nkaka ya ntangu fioti yina sadisaka yandi na kuzwa kisalu sambu na kulungisa bampusa na yandi mpi kulanda kusala kisalu ya kimupasudi-nzila; na nima yandi kwendaka kisika mpusa ya bansamuni vandaka mingi. Nkutu, yandi longukaka ndinga ya bwala ya ba Otomi ti Tlapaneco. Bubu yai, ntangu yandi ke yindula bamvula tatu yina ya kisalu ya kusamuna na teritware ya ntama, yandi ke tuba nde: “Kusamuna kisika yina mpusa kele mingi pesaka mono kiese mpi salaka nde luzingu na mono kuvanda ti lukanu. Diambu ya kuluta mfunu, yo me kumisaka bangwisana na mono ti Yehowa ngolo.” Phillip ti Racquel, bankwelani mosi yina katukaka kulutisa bamvula 30 mpi katukaka na États-Unis ndimaka diambu yina. Bo ke tuba nde: “Sambu mambu ya nsi-ntoto yai ke soba nswalu-nswalu, bantu mingi ke mona nde luzingu na bo mpi ke soba ntangu yonso. Kansi, kusamuna kisika yina beto ke mona bantu mingi yina lenda widikila nsangu ya Biblia sadisaka beto na kuvanda ti luzingu yina kele ti lukanu. Yo ke pesaka beto kiese mingi!”

MUTINDU YA KUNUNGA BAMPASI

Ya kieleka, kukwenda kusamuna kisika mpusa ya bansamuni ya Kimfumu kele mingi ke vandaka mpi ti bampasi na yo. Mosi ya bampasi kele, mutindu ya kuzwa mbongo sambu na kulungisa bampusa na nge. Sambu na yo, nge fwete ndima kusoba luzingu na nge mpi kuyikana ti luzingu ya teritware yina. Verónica, mupasudi-nzila mosi ya kele ti eksperiansi mingi ke tuba nde: “Na teritware mosi yina mono kwendaka kusamuna, mono vandaka kulamba madia yina ke bakaka ntangu mingi ve mpi ke vandaka ntalu-fioti. Na teritware ya nkaka, mono vandaka kuteka bilele mpi kuzenga nsuki. Mpi bubu yai, mono ke salaka kisalu ya kuyobisa mpi kutula bunkete na nzo ya muntu mosi mpi mono ke longaka bantu yina me kuma bibuti mutindu ya kusolula ti bana na bo.”

Kuyikana ti luzingu mpi binkulu ya nkaka lenda vanda mpasi mingi-mingi kana nge ke zinga kisika mosi ti bantu ya bwala mosi ya ntama. Diambu yina kuminaka Phillip ti Racquel ntangu bo vandaka kusamuna na teritware ya bantu yina ke tubaka ndinga Nahuatl. Phillip ke tuba nde: “Binkulu na bo swaswanaka ngolo ti ya beto.” Inki sadisaka bo na kuyikana? Yandi ke tuba nde: “Beto vandaka kutula dikebi na mambu ya mbote yina beto vandaka kumona na bantu ya bwala yina mu mbandu, bangwisana ya mbote yina ke vandaka na kati ya mabuta na bo, masonga na bo, mpi kikalulu na bo ya kukaba.” Racquel ke yika nde: “Beto longukaka mambu mingi ntangu beto zingaka kuna mpi beto salaka kumosi ti bampangi ya babakala mpi ya bankento ya bwala yina.”

MUTINDU YA KUDIBONGISA

Kana nge ke zola kukwenda kusamuna na babwala mosi ya ntama kisika mpusa kele mingi, nki nge lenda sala sambu na kudibongisa ntangu yai? Bampangi ya babakala mpi ya bankento yina me salaka kisalu yango ke tuba nde: Na ntwala ya kukwenda, yantika kukumisa luzingu na nge pete mpi longuka kusepela na bima yina nge kele ti yo. (Bafi. 4:11, 12) Inki nge lenda sala diaka? Leticia ke tuba nde: “Mono vandaka kubuya bisalu ya kinsuni yina vandaka kulomba nde mono sala kontra ya ntangu ya nda to kubikala kaka kisika mosi. Mpusa na mono vandaka ya kuvanda ti makuki ya kukwenda konso kisika yina mono me zola mpi na ntangu yonso yina mono me zola.” Hermilo ke tuba nde: “Mono longukaka kulamba, kuyobisa bilele mpi kugoma yo.” Verónica ke tuba nde: “Ntangu mono vandaka ntete na nzo na beto ti bibuti na mono mpi bampangi na mono, mono vandaka kuyobisa mpi kutula bunkete na nzo, mono longukaka kulamba madia ya ntalu-fioti kansi ya ke pesaka mavimpi na nitu. Mono longukaka mpi kubumba mbongo.”

Levi ti Amelia yina katukaka na États-Unis mpi me kwelanaka tuka bamvula nana, ke monisa mutindu bisambu ya siki-siki sadisaka bo na kudibongisa sambu na kukwenda kusamuna na Mexique. Levi ke tuba nde: “Beto sosaka kuzaba ntalu ya mbongo yina beto vandaka na yo mfunu sambu na kusala nzietelo na nsungi ya mvula mosi, mpi na nima beto sambaka Yehowa na kusadisa beto na kuzwa mbongo yina.” Na nima ya mwa bangonda, bo lungisaka ntalu ya mbongo yina bo tubilaka na kisambu mpi kukonda kusukinina bo kwendaka na Mexique. Levi ke tuba nde: “Yehowa pesaka mvutu na bisambu na beto ya siki-siki, yo yina ntangu yai yo lombaka nde beto mpi kusala mambu yina beto silaka yandi.” Mpi Amelia ke yika nde: “Beto yindulaka nde beto ta bikala awa sambu na mvula mosi, kansi beto me sala bamvula nsambwadi mpi beto ke yindulaka ve ata fioti na kukatuka awa! Kuzinga awa ke pesa beto nzila ya kumona lusadisu ya Yehowa na meso na beto mosi. Konso kilumbu, beto ke monaka banzikisa ya bumbote na yandi.”

Sambu na Adam ti Jennifer, bankwelani yina katukaka na États-Unis yina ke samunaka na Mexique na teritware yina bo ke tubaka Kingelesi, kisambu sadisaka bo mpi. Bo ke pesa ndongisila yai: “Kuvingila ve nde mambu yonso kukuma mbote. Zabisa Yehowa na kisambu mpusa na nge ya kusadila yandi na kisika yina mpusa kele mingi mpi na nima sala mambu na kuwakana ti bisambu na nge. Kumisa luzingu na nge pete, sonikila biro ya filiale ya insi yina nge ke zola kukwenda kusamuna, mpi kana nge me mona nde mambu yina yonso me lunga, kwenda!”a Kana nge sala mpidina, nge ta vanda ti luzingu ya kiese mpi ta baka balusakumunu mingi ya kimpeve.