BAMVUTU NA BANGIUFULA YA BIBLIA

Keti Nzambi ke widikilaka bisambu yonso?

Nzambi ke widikilaka bantu ya makanda yonso. (Nkunga 145:18, 19) Ndinga na yandi, Biblia ke siamisa beto na kuzabisa yandi mambu yonso ya ke yangisa beto. (Bafilipi 4:6, 7) Ata mpidina, bisambu ya nkaka ke sepedisaka Nzambi ve. Mu mbandu, yandi ke sepelaka ve nde muntu kuvutukila bisambu yina yandi me kangaka na ntu.​—Tanga Matayo 6:7.

Diaka, Yehowa ke mengaka bisambu ya bantu yina ke lemfukila ve bansiku na yandi na luzolo yonso. (Bingana 28:9) Mu mbandu, na ntangu ya ntama, Nzambi buyaka kuwidikila bisambu ya bantu ya Izraele yina vandaka kufwa bantu. Yo kele pwelele nde, beto fwete lungisa mambu yina ke lombamaka sambu Nzambi kuwa beto.​—Tanga Yezaya 1:15.

Inki beto fwete sala sambu Nzambi kuwa beto?

Beto lenda kwenda ve pene-pene na Nzambi na kisambu kana beto kele ve ti lukwikilu. (Yakobo 1:5, 6) Beto fwete ndima nde yandi kele mpi ke kudibanzaka sambu na beto. Beto lenda kumisa lukwikilu na beto ngolo kana beto ke longuka Biblia, sambu lukwikilu ya kieleka me simbama na banzikisa mpi kivuvu yina kele na Ndinga ya Nzambi.​—Tanga Baebreo 11:1, 6.

Beto fwete samba na masonga mpi na kudikulumusa yonso. Ata Yezu, Mwana ya Nzambi, vandaka kudikulumusa ntangu yandi vandaka kusamba. (Luka 22:41, 42) Yo yina, na kisika ya kuzabisa Nzambi mambu yina yandi fwete sadila beto, beto fwete sala bikesa na kubakisa minsiku na yandi na kutangaka Biblia. Mpidina, beto lenda samba na kuwakana ti luzolo ya Nzambi.​—Tanga 1 Yoane 5:14.