Inki Mutindu Beto Lenda Monisa “Kikalulu Ya Kuvingila”?

1. Inki lenda pusa beto na kukuma ntima zulu-zulu?

NTANGU Kristu kumaka Ntotila na zulu na 1914, ngidika ya Satana kotaka na bilumbu na yo ya nsuka. Mvita mosi salamaka na zulu mpi Yezu losaka Diabulu ti bademo na yandi na nziunga ya ntoto. (Tanga Kusonga 12:7-9.) Satana me zaba nde yandi me bikala kaka “ti ntangu fioti.” (Kus. 12:12) Kansi, “ntangu” yina me sala dezia bamvula mingi, mpi bantu ya nkaka lenda yindula nde bilumbu ya nsuka me zinga mingi. Ntangu beto ke vingila Yehowa na kutula nsuka na nsi-ntoto ya Satana, keti beto ke kumaka ntima zulu-zulu?

2. Inki beto ta tadila na disolo yai?

² Kuvanda ntima zulu-zulu lenda vanda kigonsa, sambu yo lenda pusa beto na kusala mambu nswalu-nswalu kukonda kuyindula mbote. Inki mutindu beto lenda monisa nde beto kele ti kikalulu ya kuvingila? Disolo yai ta sadisa beto na kumonisa nde beto ke vingila mpi yo ta pesa bamvutu na bangiufula yai ke landa. (1) Inki beto lenda longuka na mbandu ya ntima-nda ya profete Mishe? (2) Inki mambu ta monisa nde nsuka me finama? (3) Inki mutindu beto lenda monisa ntonda na Yehowa sambu na ntima-nda na yandi?

INKI BETO LENDA LONGUKA NA MBANDU YA PROFETE MISHE?

3. Na bilumbu ya Mishe, mambu vandaka inki mutindu na Izraele?

³ Tanga Mishe 7:2-6. Profete Mishe monaka mutindu bantu ya Izraele yantikaka malembe-malembe kukonda kwikama na Yehowa tii ntangu Ahazi, Ntotila ya mbi, yantikaka kuyala. Mishe fwanisaka bantu ya Izraele ya kukonda kwikama ti “bansende.” Kaka mutindu bansende ke lwadisaka muntu yina me niata yo, bantu ya Izraele ya kukonda kwikama vandaka kusala bankaka mbi. Mambi kumaka mingi kibeni na mpila nde ata bantu ya dibuta mosi vandaka kuzolana diaka ve. Sambu Mishe zabaka nde yandi lendaka ve kusoba mambu yina yandi mosi, yandi kangudilaka Yehowa ntima na nzila ya kisambu. Na nima, yandi vingilaka na ntima-nda yonso sambu Nzambi kusala mambu. Mishe vandaka ti kivuvu nde Yehowa ta sala mambu na ntangu yina yandi mosi ta zola.

4. Inki bampasi beto ke kutana ti yo?

⁴ Bonso Mishe, beto mpi ke zinga na kati ya bantu yina ke sosaka kaka mambote na bo mosi. Mingi na bo kele “bantu ya ke pesaka ve matondo, bantu ya me konda kwikama, bantu ya ke zolaka ve bantu ya nkaka.” (2 Tim. 3:2, 3) Yo ke pesaka beto mpasi ntangu banduku ya kisalu, ya nzo-nkanda mpi bamfinangani ke sosaka kaka mambote na bo mosi. Kansi, bansadi ya nkaka ya Nzambi ke kutana ti bampasi ya mingi diaka. Yezu tubaka nde balongoki na yandi ta kutana ti kimbeni na kati ya dibuta mpi yandi sadilaka bangogo yina me fwanana ti bangogo ya kele na Mishe 7:6, sambu na kumonisa nde kimbeni ta kota na mabuta sambu na nsangu na yandi. Yandi tubaka nde: “Mono kwisaka kutula kukabwana, na kati ya mwana-bakala ti tata na yandi mpi mwana-nkento ti mama na yandi mpi nkento ya makwela ti bukilo na yandi ya nkento. Ya kieleka, bambeni ya muntu ta vanda bantu ya nzo na yandi mosi.” (Mat. 10:35, 36) Yo lenda vanda mpasi kibeni na kukanga ntima ntangu bantu ya dibuta yina kele ve Bakristu ke seka beto mpi ke menga beto! Kana beto me kutana ti bampasi ya mutindu yina, beto fwete bika ve nde bupusi ya dibuta kulembisa beto. Kansi, beto fwete bikala ya kwikama na Yehowa mpi kuvingila na ntima-nda yonso sambu Yehowa kuyidika bampasi yina. Kana beto ke lomba yandi lusadisu ntangu yonso, yandi ta pesa beto ngolo mpi mayele yina beto kele na yo mfunu sambu na kukanga ntima.

5, 6. Inki mutindu Yehowa sakumunaka Mishe, kansi inki Mishe monaka ve?

⁵ Yehowa sakumunaka Mishe sambu na ntima-nda na yandi. Mishe monaka nsuka ya Ntotila ya mbi Ahazi, mpi ya luyalu na yandi. Yandi monaka mpi mutindu mwana ya Ahazi, Ezekiasi Ntotila ya mbote bakaka kimfumu mpi vutulaka lusambu ya bunkete. Diaka, Mishe monaka kusambisama ya Samaria yina Yehowa bikulaka na nzila na yandi ntangu bantu ya Asiria nwanisaka kimfumu ya nordi ya Izraele.​—Mis. 1:6.

⁶ Kansi, Mishe monaka ve kulungana ya bambikudulu ya nkaka yina Yehowa zabisaka yandi na kusonika. Mu mbandu, yandi sonikaka nde: ‘Na kitini ya nsuka ya bilumbu, ngumba ya nzo ya Yehowa ta kuma ngumba mosi ya nda kibeni, yo ta luta bangumba yonso na nda. Bantu mingi ta kwisa kufuluka kuna. Mpi makanda mingi ta kwenda kuna mpi ta tuba nde: “Beno kwisa, mpi beto tombuka na ngumba ya Yehowa.”’ (Mis. 4:1, 2) Mishe fwaka bamvula mingi na ntwala nde mbikudulu yai kulungana. Ata mpidina, yandi vandaka ti lukanu ya ngolo ya kubikala ya kwikama na Yehowa tii na lufwa, ata bantu ya nziunga na yandi vandaka kusala mambi. Yo yina, yandi sonikaka nde: ‘Bantu yonso, ta tambula na zina ya nzambi na bo, kansi beto, beto ta tambula na zina ya Yehowa Nzambi na beto tii kuna, ee mvula na mvula.’ (Mis. 4:5) Na bantangu yina ya mpasi, Mishe vingilaka ti ntima-nda sambu yandi vandaka ti kivuvu nde Yehowa ta lungisa balusilu na yandi yonso. Profete yai ya kwikama tudilaka Yehowa ntima.

7, 8. (a) Sambu na nki beto fwete tudila Yehowa ntima? (b) Inki ta sadisa beto na kumona nde ntangu ke luta nswalu-nswalu?

⁷ Keti beto mpi ke tudilaka Yehowa ntima mutindu yina? Beto kele ti kikuma ya mbote ya kusala yo. Beto me monaka kulungana ya mbikudulu ya Mishe. Na ‘kitini ya nsuka ya bilumbu,’ bamilio ya bantu ya me katuka na makanda yonso, na mabuta yonso, mpi na bandinga yonso ke tombuka na ‘ngumba ya nzo ya Yehowa.’ Ata bo me katuka na makanda yina ke wakanaka ve, bansambidi yai me kumisaka ‘bambele na bo ya bitumba bansengo’ mpi me buyaka ‘kulonguka diaka bitumba.’ (Mis. 4:3) Kuvanda na kati ya bansadi ya Yehowa ya ke zinga na ngemba kele dibaku ya mbote kibeni!

⁸ Ya kieleka, beto yonso kele na mpusa nde Yehowa kutula nsuka na ngidika yai ya mbi kukonda kusukinina. Kansi, kana beto ke zola kuvingila ti ntima-nda, beto fwete tadila mambu mutindu Yehowa ke tadilaka yo. Yandi me ponaka kilumbu yina yandi ta sambisa bantu na nzila ya “muntu [mosi] yina yandi me tulaka,” Yezu Kristu. (Bis. 17:31) Kansi na ntwala nde kilumbu yina kukwisa, Nzambi ke pesa bantu ya mitindu yonso dibaku ya kubaka “nzayilu ya sikisiki ya kieleka,” sambu na kusadila mambu yina bo ke longuka mpi kuguluka. Luzingu ya bantu mingi kele na kigonsa. (Tanga 1 Timoteo 2:3, 4.) Kana beto ke kudipesa mingi sambu na kusadisa bankaka na kuzaba Nzambi, beto ta mona nde ntangu yina me bikala na ntwala nde kilumbu ya Yehowa kukwisa ta luta nswalu. Kubika fioti, nsuka ta kwisa mpi yo ta vanda na kintulumukina. Ntangu nsuka ta kwisa, beto ta vanda na kiese mingi sambu beto kudipesaka na kisalu ya kusamuna Kimfumu!

INKI MAMBU TA MONISA NDE NSUKA ME FINAMA?

9-11. Keti 1 Batesalonika 5:3 me lunganaka dezia? Tendula.

⁹ Tanga 1 Batesalonika 5:1-3. Ntama mingi ve, makanda ta tuba nde: “Ngemba mpi lutaninu!” Kana beto ke zola ve nde beto bwa na mutambu ntangu makanda ta tuba diambu yai, beto “bikala ya kusikama mpi beto tanina mabanza na beto.” (1 Bate. 5:6) Sambu na kusadisa beto na kubikala ya kusikama, beto tadila na bunkufi mambu yina ta salama na ntwala nde bantu kutuba bangogo yina ya mfunu.

¹⁰ Na nsuka ya mvita ya ntete mpi ya zole ya nsi-ntoto ya mvimba, makanda tubaka nde ngemba me kota. Na nima ya Mvita ya ntete ya nsi-ntoto ya mvimba, Société des Nations salamaka ti kivuvu nde yo ta nata ngemba. Na nima, ntangu mvita ya zole ya nsi-ntoto ya mvimba manaka, bantu kumaka ti kivuvu nde Nations unies ta tula ngemba na ntoto. Baguvernema mpi bantwadisi ya mabundu tulaka ntima nde bimvuka yina zole ta nata ngemba. Mu mbandu, na 1986, Nations-Unies bingaka mvula yina Mvula ya Ngemba na Nsi-Ntoto ya Mvimba (Année internationale de la paix). Na mvula yina, bamfumu ya bansi mingi mpi bantwadisi ya mabundu kwendaka kukutana ti mfumu ya Dibundu ya Katolika na mbanza Assise, na Italie, sambu na kusamba sambu na ngemba.

¹¹ Kansi, yo vanda bantu tubaka nde, Ngemba mpi lutaninu na mvula yina to tubaka bangogo ya nkaka ya mutindu yina, mambu yina yonso lungisaka ve mbikudulu yina kele na 1 Batesalonika 5:3. Sambu na nki? Sambu ‘lufwa ya mbala mosi’ yina Biblia bikulaka me salama ntete ve.

12. Inki beto me zaba sambu na bangogo: “Ngemba mpi lutaninu”?

¹² Banani ta tuba na bilumbu ke kwisa bangogo yai ya mfunu: “Ngemba mpi lutaninu”? Inki ta vanda mukumba ya bantwadisi ya mabundu ya Kikristu mpi ya mabundu ya nkaka? Inki mutindu bamfumu ya baluyalu ta vukana na kutuba bangogo yina? Biblia ke zabisa beto ve. Beto me zaba kaka nde, yo vanda bantu ta tuba bangogo yina inki mutindu to bo ta sala konso mambu yina sambu na kundimisa bantu, yo ta vanda ve ngemba mpi lutaninu ya kieleka. Satana ta landa kuyala ngidika yai ya mbi. Nsi-ntoto yai me beba mingi kibeni mpi yo ta bikala kaka mutindu yina. Yo ta vanda mawa mingi kibeni kana beto kwikila luvunu yina ya Satana ta mwanga mpi kudikotisa na mambu ya nsi-ntoto!

13. Sambu na nki bawanzio me simba mipepe ya lufwa?

¹³ Tanga Kusonga 7:1-4. Ntangu beto ke vingila kulungana ya mbikudulu yina kele na 1 Batesalonika 5:3, bawanzio ya ngolo mingi me simba mipepe ya lufwa ya mpasi ya nene. Inki bo ke vingila? Ntumwa Yoane tubilaka diambu mosi ya mfunu​—kutulama ya kidimbu ya nsuka ya “bampika ya Nzambi,” Bakristu yina bo me tulaka mafuta.a Ntangu bo ta manisa kutula kidimbu ya nsuka, bawanzio ta yambula mipepe ya lufwa. Inki ta salama na nima?

14. Inki ke monisa nde kubika fioti bo ta fwa Babilone ya Nene?

¹⁴ Babilone ya Nene, yina kele kintinu ya nsi-ntoto ya mvimba ya mabundu ya luvunu ta baka nkanu ya lufwa. “Bantu ya bansi, bibuka ya bantu, makanda, mpi bandinga” ta vanda ve ti makuki ya kupesa yandi lusadisu. Beto ke mona dezia bidimbu yina ke monisa nde nsuka na yandi me finama. (Kus. 16:12; 17:15-18; 18:7, 8, 21) Nkutu, bubu yai, bima yina ke mwangaka bansangu ke monisa pwelele bisalu ya mbi ya mabundu ya luvunu mpi ya bantwadisi na yo, mpi mambu yina yonso ke pusa bantu na kuyambula kupesa bo maboko. Ata mpidina, bantwadisi ya Babilone ya Nene ke mona ve nde bo kele kibeni na kigonsa. Bo ke kudikusa mpenza! Na nima ya kutuba “Ngemba mpi lutaninu,” bamfumu ya politiki ya luyalu ya Satana ta balukila dibundu ya luvunu na kintulumukina mpi ta fwa yo. Babilone ya Nene ta monana diaka ve ata fioti! Beto monisa ntima-nda mpi beto vingila sambu na kumona mambu yina ya nene.​—Kus. 18:8, 10.

INKI MUTINDU BETO LENDA MONISA NTONDA SAMBU NA NTIMA-NDA YA NZAMBI?

15. Sambu na nki Yehowa ke vingilaka na ntima-nda yonso?

¹⁵ Ata bantu me vwezaka zina na yandi, Yehowa ke vingila na ntima-nda yonso ntangu yina me fwana sambu na kuyidika mambu. Yehowa ke zola ve nde bantu ya ntima masonga kufwa. (2 Pie. 3:9, 10) Keti beto mpi ke vandaka na mpusa yina? Na ntwala nde kilumbu ya Yehowa kukwisa, beto lenda monisa ntonda sambu na ntima-nda na yandi na mambu yai ke landa.

16, 17. (a) Sambu na nki beto fwete sosa kusadisa bampangi yina ke samunaka diaka ve? (b) Sambu na nki bampangi yina ke samunaka diaka ve fwete sala nswalu sambu na kuvutukila Yehowa?

¹⁶ Sadisa bampangi yina ke samunaka diaka ve. Yezu tubaka nde kiese ke vandaka na zulu ntangu dimeme mosi yina vilaka me monana. (Mat. 18:14; Luka 15:3-7) Ya kieleka, Yehowa ke kudiyangisaka mingi sambu na bampangi yonso yina ke monisaka nde bo ke zolaka zina na yandi, ata bubu yai bo ke sadila yandi diaka ve ti kikesa. Kana beto sadisa bampangi ya mutindu yina na kuvutuka na dibundu, beto ta sepedisa Yehowa mpi bawanzio.

¹⁷ Keti nge kele mosi ya bampangi yina, bubu yai, ke sadila diaka ve Nzambi ti kikesa? Ziku, mpangi mosi na dibundu pesaka nge mpasi na ntima, yo yina nge yambulaka organizasio ya Yehowa. Sambu ntangu mingi me luta, nge lenda kudiyula nde: ‘Keti ntangu yai luzingu na mono me kuma mbote kuluta mpi mono me kuma na kiese mingi? Keti Yehowa muntu lwadisaka mono, to yo kele muntu mosi ya kukonda kukuka? Keti Yehowa Nzambi me salaka dezia diambu mosi sambu na kusala mono mbi?’ Nkutu, yandi ke sadilaka beto ntangu yonso mambu ya mbote. Ata bubu yai beto ke lungisa diaka ve mambu yina ke monisa kudipesa na beto na Nzambi, yandi ke landa kupesa beto makabu yonso ya mbote. (Yak. 1:16, 17) Kubika fioti, kilumbu ya Yehowa ta kwisa. Yai kele ntangu ya kuvutuka na Tata na beto ya zulu yina ke zolaka beto mpi na dibundu​—kisika mosi kaka ya lutaninu na bilumbu yai ya nsuka.​—Kul. 33:27; Baeb. 10:24, 25.

18. Sambu na nki beto fwete pesa lusadisu na bampangi yina ke twadisaka dibundu?

¹⁸ Pesa lusadisu na kwikama yonso na bampangi yina ke twadisa dibundu. Yehowa ke twadisaka beto mpi ke taninaka beto bonso ngungudi ya zola. Yandi me tulaka Mwana na yandi Ngungudi ya Nene ya kibuka na yandi. (1 Pie. 5:4) Bankuluntu na mabundu kuluta 100000 ke bakaka ntangu sambu na kugungula dimeme mosi mosi. (Bis. 20:28) Ntangu beto ke pesaka lusadisu na kwikama yonso na bampangi yina ke twadisa dibundu, beto ke monisaka ntonda na Yehowa mpi na Yezu sambu na mambu yonso yina bo me salaka sambu na beto.

19. Inki mutindu beto lenda kwenda pene-pene ya bampangi Bakristu?

¹⁹ Kwenda pene-pene ya bampangi. Yo ke tendula inki? Kana bambeni me kwisa kunwanisa bo, basoda yina me bakaka formasio ya mbote ke salaka kimvuka mosi mpi ke vandaka na bumosi. Na mutindu yina, bo ke salaka kibuka mosi yina bambeni lenda bwisa ve. Satana ke yedisa mayele na yandi sambu na kunwanisa bansadi ya Nzambi. Yai kele ve ntangu ya kunwanisa bampangi na beto Bakristu. Yo kele ntangu ya kukwenda pene-pene ya bampangi-Bakristu, kukanga meso na kukonda kukuka ya bankaka, mpi kumonisa nde beto ke tula ntima na lutwadisu ya Yehowa.

20. Inki beto fwete sala ntangu yai?

²⁰ Bika nde beto yonso kulanda kukangula meso na kimpeve mpi kumonisa kikalulu ya kuvingila. Na ntima-nda yonso, beto vingila ntangu bantu ta tuba nde “Ngemba mpi lutaninu!” mpi ntangu bo ta tula Bakristu yina bo me tulaka mafuta kidimbu ya nsuka. Na nima, bawanzio iya ta yambula mipepe ya lufwa na ntoto, mpi Babilone ya Nene ta fwa. Ntangu beto ke vingila mambu yina ya nene, beto landa lutwadisu ya bampangi yina Yehowa me ponaka sambu na kutwadisa organizasio na yandi. Beto kwenda pene-pene ya bampangi Bakristu sambu na kunwanisa Diabulu mpi bademo! Yai kele ntangu ya kulanda ndongisila yai ya muyimbi-bankunga: “Beno vanda kikesa, mpi bika nde ntima na beno kuvanda ngolo, beno yonso yina ke vingilaka Yehowa.”​—Nk. 31:24, NW.