BAMVUTU NA BANGIUFULA YA BIBLIA
Inki kele lukanu ya kuvutuka ya Kristu?
Na ntwala ya kutombuka na zulu na mvu 33 T.B., Yezu Kristu silaka nde yandi ta vutuka. Yandi kudifwanisaka ti muntu yina butukaka na dibuta ya kintotila mpi salaka nzietelo mosi ya nda mpi vutukaka ti kiyeka na kuyala bonso ntotila. Lukanu ya kuvutuka ya Yezu kele ya kutula luyalu mosi ya mbote sambu na bantu.—Tanga Luka 19:11, 12.
Yezu ta natila bantu luyalu ya mbote
Kristu ta vutuka ti nitu ya nki mutindu? Yandi futumukaka bonso kigangwa ya kimpeve yina ke monanaka ve. (1 Piere 3:18) Na nima, yandi kwendaka na zulu mpi vandaka na diboko ya kitata ya Nzambi. (Nkunga 110:1) Bamvula mingi na nima, Yezu telamaka na ntwala ya Yehowa Nzambi, ‘Mbuta Muntu ya Bilumbu,’ yina pesaka Yezu kiyeka ya kuyala bantu. Yo yina, Yezu ta vutuka ve bonso muntu, kansi bonso Ntotila yina ke monanaka ve.—Tanga Daniele 7:13, 14.
Inki mambu Yezu ta sala ntangu yandi ta vutuka?
Ntangu Yezu ta vutuka ti bawanzio yina ke monanaka ve, yandi ta sambisa bantu. Yandi ta fwa bantu ya mbi kansi yandi ta pesa bantu yina ke ndimaka yandi bonso Ntotila luzingu ya mvula na mvula.—Tanga Matayo 25:31-33, 46.
Luyalu ya Yezu bonso Ntotila ta kumisa ntoto paladisu. Yandi ta futumuna bafwa na mpila nde bo sepela ti luzingu na Paladisu na ntoto.—Tanga Luka 23:42, 43.