Nzambi Ta Sala Nki Sambu na Mambu ya Mbi?

Biblia ke zabisa beto pwelele mambu yina Yehowa ti Yezu Kristu, Mwana na yandi ta sala sambu na bampasi yina Satana Diabulu me basisaka. Biblia ke tuba nde: “Mwana ya Nzambi [Yezu] me monanaka sambu na kikuma yai: sambu na kufwa bisalu ya Diabulu.” (1 Yoane 3:8) Yezu ta fwa ngidika ya bima ya ntangu yai ya me fuluka ti bwimi, kimbeni, mpi mambu ya mbi. Yezu ke sila nde yandi “ta losa” Satana Diabulu, “mfumu ya nsi-ntoto yai na nganda.” (Yoane 12:31) Ntangu bupusi ya Satana ta vanda diaka ve, Nzambi ta tula nsi-ntoto mosi ya mpa ya lunungu mpi ntoto yai ta kuma kisika mosi ya ngemba.—2 Piere 3:13.

Inki beto ta tuba sambu na bantu yina ke buyaka kusoba banzila na bo na ntu-ngolo yonso mpi ke salaka mambu ya mbi? Yindulula lusilu yai: “Bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.” (Bingana 2:21, 22) Bupusi ya bantu ya mbi ta vanda diaka ve. Na nsungi yina ya ngemba, bantu ya bulemfu ta katuka malembe-malembe na kimpika ya kukonda kukuka yina bo me bakaka na Adami.—Baroma 6:17, 18; 8:21.

Inki mutindu Nzambi ta katula mambi na ntoto ya mpa? Yandi ta katula ve kimpwanza ya kupona yina yandi me pesaka bantu sambu bo sala mambu bonso barobo. Kansi, yandi ta longa bantu ya bulemfu banzila na yandi mpi ta sadisa bo na kuyambula bisalu mpi bangindu ya mbi.

Nzambi ta sala nki sambu na bisumbula ya kukonda kukana? Yandi me sila nde ntama mingi ve, Kimfumu na yandi ta yala ntoto. Yezu Kristu, Ntotila ya Kimfumu yina Nzambi me ponaka, kele ti kiyeka ya kubelula bambefo. (Matayo 14:14) Yezu kele mpi ti kiyeka na zulu ya bangolo ya lugangu. (Marko 4:35-41) Yo yina, bampasi yina bantu ke kutanaka ti yo sambu na “ntangu mpi mambu ya kukonda kukana” ta vanda diaka ve. (Longi 9:11, NW) Na nsi ya luyalu ya Kristu, bampasi ta bwila diaka bantu ve.—Bingana 1:33.

Beto lenda tuba nki sambu na bamilio ya bantu yina salaka mbi ve kansi fwaka? Ntangu fioti na ntwala ya kufutumuna Lazare, Yezu tubaka nde: “Mono kele lufutumuku mpi luzingu.” (Yoane 11:25) Ee, Yezu kele ti kiyeka ya kufutumuna to ya kuvutula bantu yina fwaka na luzingu!

Kana nge ke sepela na dibanza ya kuzinga na ntoto, kisika yina mambu ya mbi ta bwila diaka ve bantu ya mbote, sambu na nki ve kubaka lukanu ya kulonguka Biblia sambu na kuzaba mambu mingi ya me tala Nzambi ya kieleka mpi balusilu na yandi? Bambangi ya Yehowa ya kele na kisika ya nge ke zingaka ta sepela na kusadisa nge sambu na kubaka nzayilu yina. Beto ke lomba nge na kiese yonso na kukutana ti bo to kusonikila bambasisi ya zulunalu yai.