BAMVUTU NA BANGIUFULA YA BIBLIA
Keti mabundu yonso ke kumisaka Nzambi?
Ntembe kele ve nde kana nge landa bansangu yina ke luta na nsi-ntoto, nge ta mona nde bantangu ya nkaka bantu ke sadilaka mabundu sambu na kusala mambu ya mbi. Mabundu yonso ve me katukaka na Nzambi ya kieleka. (Matayo 7:15) Mabundu me kusaka bantu mingi.—Tanga 1 Yoane 5:19.
Ata mpidina, Nzambi ke tulaka dikebi na bantu ya masonga yina ke zolaka mambu ya mbote mpi ya kieleka. (Yoane 4:23) Nzambi ke binga bantu ya mutindu yai na kulonguka kieleka yina kele na Biblia, Ndinga na yandi.—Tanga 1 Timoteo 2:3-5.
Inki mutindu nge lenda zaba dibundu ya kieleka?
Yehowa Nzambi ke vukisaka bantu ya ke katuka na mabundu mingi sambu na kulonga bo kieleka mpi kulonga bo na kuzolana. (Mishe 4:2, 3) Nge lenda zaba bansambidi ya dibundu ya kieleka na mutindu bo ke zolanaka bo na bo.—Tanga Yoane 13:35.
Yehowa Nzambi ke vukisaka bantu ya mitindu yonso na nsadisa ya lusambu ya kieleka.—Nkunga 133:1
Lukwikilu mpi mutindu ya kuzinga ya bansambidi ya kieleka me simbama na Biblia. (2 Timoteo 3:16) Bo ke pesaka mpi zina ya Nzambi lukumu. (Nkunga 83:19) Bo ke zabisaka bantu nde Kimfumu ya Nzambi kele kivuvu mosi mpamba sambu na bo. (Daniele 2:44) Bo ke landaka mbandu ya Yezu mutindu bo ke bikaka nde ‘nsemo na bo kusema,’ ntangu bo ke sadilaka bamfinangani na bo mambu ya mbote. (Matayo 5:16) Bantu ke zabaka Bakristu ya kieleka na mutindu bo ke kwendaka na banzo ya bantu sambu na kuzabisa bo nsangu ya mbote ya Kimfumu ya Nzambi.—Tanga Matayo 24:14; Bisalu 5:42; 20:20.