BAMVUTU NA BANGIUFULA YA BIBLIA
Inki mutindu bana lenda longuka na kuzola Nzambi?
Sadila bima ya kele na lugangu sambu na kusadisa bana na nge na kuzaba mpi na kuzola Nzambi
Bana na nge lenda longuka na kuzola Nzambi kaka kana bo kele ti banzikisa ya ke monisa bo nde Nzambi kele mpi yandi ke zolaka bo. Sambu bana kuzola Nzambi, bo fwete zaba yandi. (1 Yoane 4:8) Mu mbandu, bo fwete zaba mambu yai: Lukanu ya Nzambi vandaka nki ntangu yandi gangaka muntu? Sambu na nki Nzambi ke pesaka nzila na bampasi? Inki mambu Nzambi ta sala sambu na bantu na bilumbu ke kwisa?—Tanga Bafilipi 1:9.
Sambu na kusadisa bana na nge na kuzola Nzambi, nge fwete monisa bo nde nge ke zolaka yandi. Ntembe kele ve nde kana bo mona nde nge ke zolaka Nzambi, bo ta landa mbandu na nge.—Tanga Kulonga 6:5-7; Bingana 22:6.
Inki mutindu nge lenda simba ntima ya bana na nge?
Ndinga ya Nzambi kele ngolo. (Baebreo 4:12) Yo yina, sadisa bana na nge na kulonguka malongi ya luyantiku ya Biblia. Sambu na kusimba ntima ya bantu, Yezu vandaka kuyula bangiufula, kuwidikila, mpi kutendula Masonuku. Sambu na kusimba ntima ya bana na nge, landa mbandu ya Yezu.—Tanga Luka 24:15-19, 27, 32.
Diaka, masolo ya Biblia yina ke monisa mutindu Nzambi vandaka kusadila bantu mambu lenda sadisa bana na kuzaba mpi na kuzola yandi. Mikanda ya bo me yidika sambu na kulonga bana kele na www.jw.org.—Tanga 2 Timoteo 3:16.