DISOLO YINA KELE NA LUTITI YA ZULU | KETI YO KELE MFUNU NA KUSAMBA?

Sambu na Nki Nzambi Ke Lombaka Beto na Kusamba?

Nzambi ke zola nde nge sala kinduku ti yandi.

Banduku ke solulaka sambu kinduku na bo kukuma ngolo. Mutindu mosi, Nzambi ke lomba beto na kusolula ti yandi, mpidina yo ke pesaka beto nzila ya kusala kinduku ya ngolo ti yandi. Yandi ke tuba nde: “Beno ta yindula mono, beno ta samba mono, ebuna mono ta ndima beno.” (Yeremia 29:12) Kana nge ke solula ti Nzambi, nge ta “kwenda pene-pene na [yandi], mpi yandi ta kwisa pene-pene na [nge].” (Yakobo 4:8) Biblia ke zabisa beto nde: “[Yehowa] kele penepene na bantu yonso yina ke bingaka yandi.” (Nkunga 145:18) Kana beto ke samba Nzambi mbala na mbala, kinduku na beto ti yandi ta kuma ngolo.

“[Yehowa] kele penepene na bantu yonso yina ke bingaka yandi.” —Nkunga 145:18

Nzambi ke zola kusadisa nge.

Yezu tubaka nde: “Nani na kati na beno kana mwana na yandi kulomba yandi mampa, yandi ta pesa yandi ditadi? To kana yandi lomba yandi mbisi ya masa, keti yandi ta pesa yandi nioka? Yo yina, kana beno . . . me zaba kupesa makabu ya mbote na bana na beno, beno fwete zaba kibeni nde Tata na beno yina kele na zulu ta pesa bima ya mbote na bantu yina ke lombaka yandi yo!” (Matayo 7:9-11) Nzambi ke lomba nge na kusamba yandi sambu ‘yandi ke kudibanzaka sambu na nge’ mpi ke zola kusadisa nge. (1 Piere 5:7) Nkutu, yandi ke lomba nge na kuzabisa yandi bampasi na nge. Biblia ke songa beto nde: “Beno kudiyangisa ve sambu na kima ata mosi, kansi na mambu yonso na nzila ya kisambu mpi ya dodokilu kumosi ti kupesa matondo, beno zabisa balombilu na beno na Nzambi.”—Bafilipi 4:6.

Bantu ke vandaka ti nzala ya mambu ya kimpeve.

Bantu ya mayele yina ke longukaka bikalulu ya bantu ke tubaka nde bantu mingi ke waka nzala ya kusala kisambu. Bantu ya ke ndimaka ve nde Nzambi kele mpi bayina ke tubaka nde mpila kele ve ya kuzaba kana yandi kele to ve, kele mpi na kati ya bantu yango.a Diambu yai ke monisa nde Nzambi gangaka bantu ti nzala ya kusala kisambu. Yezu tubaka nde: “Kiese na bantu yina kele na nzala ya mambu ya kimpeve.” (Matayo 5:3) Mutindu mosi ya kulungisa mpusa yai kele ya kusolula ti Nzambi mbala na mbala.

Kana beto ke samba Nzambi, nki mambote beto lenda baka?

a Na 2012, kimvuka mosi ya ke salaka bansosa (Pew Research Center) monisaka nde na États-Unis bantu 11 na kati ya bantu nkama ya ke ndimaka ve nde Nzambi kele, ke sambaka mbala mosi konso ngonda.