Sambu na Nki Biblia Me Gulukaka?

Biblia me gulukaka. Yo yina bubu yai, nge lenda vanda ti Biblia mpi kutanga yo. Kana nge pona mbalula mosi ya mbote ya Biblia, nge lenda ndima mpenza nde nge ke tanga kopi mosi ya mbote ya masonama ya kisina.a Kansi, ata Biblia lendaka kubeba, ata bantu telaminaka yo mpi sosaka kusoba nsangu na yo, sambu na nki yo me gulukaka, mbala mingi nkutu na mutindu ya kuyituka? Inki ke sala nde mukanda yai kuswaswana ti mikanda ya nkaka?

Balongoki mingi ya Biblia me bakisaka bonso ntumwa Polo, yina sonikaka nde: “Masonuku yonso kele ya kupemama na Nzambi.” (2 Timoteo 3:16) Bo ke kwikilaka nde Biblia me gulukaka sambu yo kele Ndinga ya Nzambi mpi sambu yandi me taninaka yo tii bubu yai. Faizal yina beto tubilaka na disolo ya ntete bakaka lukanu na nima ya kulonguka Biblia sambu na kuzikisa yandi mosi mambu yina bo zabisaka yandi. Mambu yina yandi longukaka yitukisaka yandi. Yandi sukininaka ve na kubakisa nde mambu mingi yina mabundu ya Kikristu ke longaka kele ve na Biblia. Diaka, lukanu ya Nzambi yina kele na Biblia na yina me tala ntoto simbaka ntima na yandi.

Yandi ke tuba nde: “Mono me ndima ntangu yai nde, Biblia yai ya mono kele na yo kele dikabu yina me katukaka na Nzambi. Kana Nzambi me gangaka bima yonso, keti yandi lenda vanda ve ti ngolo ya kupesa beto mukanda mpi kutanina yo sambu na beto? Kutuba nde yandi lenda sala yo ve ta tendula kutula bandilu na ngolo ya Nzambi. Kutula bandilu na ngolo ya Nkwa-Ngolo Yonso—mono kele nani sambu na kusala yo?”—Yezaya 40:8.