Watchtower MIKANDA YA KE NA INTERNET
Watchtower
MIKANDA YA KE NA INTERNET
Kikongo (Rép. dém. du congo)
  • BIBLIA
  • MIKANDA
  • BALUKUTAKANU
  • wp16 juillet balut. 14-15
  • Nge Lenda Fwanisa Mambu ya Nge Ke Kwikilaka ti Yina Kele na Biblia

Kele ve ti video sambu na mambu ya nge ke sosa.

Kifu me salama na ntangu ya kubaka video.

  • Nge Lenda Fwanisa Mambu ya Nge Ke Kwikilaka ti Yina Kele na Biblia
  • Nzozulu ya Nkengi Kesamunaka Kimfumu ya Yehowa (Nimero ya Bantu Yonso)—2016
  • Tubantu-diambu
  • Mambu ya Mutindu Mosi
  • MUTINDU YA KUFWANISA MAMBU YA BETO KE KWIKILAKA TI YINA KELE NA BIBLIA
  • Kimfumu ya Nzambi Kele Inki?
    Inki Biblia Kelongaka Mpenza?
  • Kimfumu ya Nzambi Kele Nki?
    Inki Biblia Ke Longa Beto?
  • Keti Bantu Yonso ya Mbote Kekwendaka na Zulu?
    Nzozulu ya Nkengi Kesamunaka Kimfumu ya Yehowa—2010
  • Yezu Kristu Kele Nani?
    Inki Biblia Kelongaka Mpenza?
Tala Mambu Mingi
Nzozulu ya Nkengi Kesamunaka Kimfumu ya Yehowa (Nimero ya Bantu Yonso)—2016
wp16 juillet balut. 14-15

Nge Lenda Fwanisa Mambu Ya Nge Ke Kwikilaka Ti Yina Kele Na Biblia

KETI nge ke monaka nde nge kele Mukristu? Kana ee, nge kele na kati ya bantu kuluta bamiliare zole na ntoto yina ke tubaka nde bo ke landaka Kristu. Bubu yai, mabundu kele mingi ya bo ke bingaka nde ya Bukristu. Kansi, malongi na bo mpi mutindu na bo ya kutadila mambu kele ya kuswaswana. Yo yina, mambu ya nge ke kwikilaka lenda vanda mpi ya kuswaswana ti ya bantu ya nkaka yina ke tubaka nde bo kele Bakristu. Keti yo kele mfunu na kutadila mambu ya nge ke kwikilaka? Ee, yo kele mfunu kana nge ke zola kuvanda na dibundu ya Bukristu yina Biblia yo mosi ke longaka.

Bo vandaka kubinga balongoki ya Yezu Kristu ya mvu-nkama ya ntete nde “Bakristu.” (Bisalu 11:26) Sambu bantu kuzaba bo, bo vandaka ve na mfunu ya bazina ya nkaka, sambu dibundu ya Bukristu vandaka kaka mosi. Bakristu yonso vandaka kulanda na bumosi malongi mpi bandongisila ya Yezu Kristu yina yantikisaka dibundu ya Bukristu. Inki nge lenda tuba sambu na dibundu na nge? Keti nge ke ndima nde yo ke longaka mambu yina Kristu longaka mpi yina balongoki ya Kristu ya mvu-nkama ya ntete vandaka kukwikila? Inki mutindu nge lenda zaba kana yo kele mpidina? Kaka Biblia lenda sadisa nge.

Beto tadila diambu yai: Yezu Kristu vandaka kuzitisa mingi Masonuku sambu yo vandaka Ndinga ya Nzambi. Yandi vandaka kundima ve bantu yina vandaka kumona malongi ya Biblia mpamba na mutindu bo vandaka kutula binkulu ya bantu na kisika ya ntete. (Marko 7:9-13) Yo yina, yo ke pwelele nde balongoki ya kieleka ya Yezu fwete baka malongi na bo na Biblia. Konso Mukristu fwete kudiyula nde, ‘Keti mambu ya bo ke longaka na dibundu na mono ke wakanaka ti yina Biblia ke longaka?’ Sambu na kubaka mvutu na ngiufula yina, fwanisa mambu yina dibundu na nge ke longaka ti yina Biblia ke tubaka mpenza.

Yezu tubaka nde kima fwete simba lusambu na beto na Nzambi kele kieleka yina kele na Biblia. (Yoane 4:24; 17:17) Ntumwa Polo tubaka nde sambu beto guluka, beto fwete baka “nzayilu ya sikisiki ya kieleka.” (1 Timoteo 2:4) Yo yina, yo kele mfunu nde mambu ya beto ke kwikilaka kusimbama na kieleka ya sikisiki ya Biblia. Yo kele mfunu kana beto ke zola kuguluka!

MUTINDU YA KUFWANISA MAMBU YA BETO KE KWIKILAKA TI YINA KELE NA BIBLIA

Beto ke lomba nge na kutanga bangiufula sambanu ya me landa mpi kutala bamvutu yina Biblia ke pesa na bangiufula yina. Kudiyula nde, ‘Keti mambu ya bo ke longaka na dibundu na mono me fwanana ti mambu yina Biblia ke tubaka?’

Mwa bangiufula yai lenda sadisa nge na kufwanisa mambu ya nge ke kwikilaka ti yina Biblia ke longaka. Keti nge lenda fwanisa malongi ya nkaka ya bo ke longaka na dibundu na nge ti mambu yina Biblia ke tubaka? Bambangi ya Yehowa ta vanda na kiese ya kusadisa nge na kulonguka kieleka ya Biblia ya kele pwelele. Nge lenda lomba Mbangi mosi ya Yehowa sambu na kulonguka Biblia ya ofele. To nge lenda kwenda na site Internet na beto, jw.org.

1 NGIUFULA: Nzambi kele nani?

MVUTU: Yehowa, Tata ya Yezu, kele Nzambi ya kimakulu mpi Ngangi nkwa-ngolo yonso yina gangaka bima yonso.

MAMBU YINA BIBLIA KE TUBAKA:

“Beto ke pesaka ntangu yonso matondo na Nzambi, Tata ya Mfumu na beto Yezu Kristu, ntangu beto ke sambaka sambu na beno.”—Bakolosai 1:3.

“Yehowa Nzambi na beto, nge me fwana na kubaka nkembo, lukumu, mpi ngolo, sambu nge muntu gangaka bima yonso.”—Kusonga 4:11.

Tala mpi Baroma 10:13; 1 Timoteo 1:17.

2 NGIUFULA: Yezu Kristu kele nani?

MVUTU: Yezu kele Mwana ya ntete ya Nzambi. Nzambi gangaka Yezu, yo yina beto ke tuba nde yandi kele ti luyantiku. Yezu ke lemfukaka na Nzambi mpi na luzolo ya Nzambi.

MAMBU YINA BIBLIA KE TUBAKA:

“Tata kele nene kuluta mono.”—Yoane 14:28.

“[Yezu] kele kifwani ya Nzambi yina ke monanaka ve, mwana ya ntete ya lugangu yonso.”—Bakolosai 1:15.

Tala mpi Matayo 26:39; 1 Bakorinto 15:28.

3 NGIUFULA: Mpeve santu kele inki?

MVUTU: Mpeve santu kele ngolo yina Nzambi ke sadilaka sambu na kulungisa luzolo na yandi. Yo kele ve muntu. Bantu lenda fuluka ti mpeve santu mpi kubaka ngolo na nzila na yo.

MAMBU YINA BIBLIA KE TUBAKA:

“Kaka ntangu Elizabeti waka mbote ya Maria, mwana yina vandaka na divumu na yandi nikanaka, mpi Elizabeti fulukaka ti mpeve santu.”—Luka 1:41.

“Beno ta baka ngolo ntangu mpeve santu ta kwisa na zulu na beno.”—Bisalu 1:8.

• Tala mpi Kuyantika 1:2; Bisalu 2:1-4; 10:38.

4 NGIUFULA: Kimfumu ya Nzambi kele inki?

MVUTU: Kimfumu ya Nzambi kele luyalu ya kele na zulu. Yezu kele Ntotila ya Kimfumu ya Nzambi. Kubika fioti Kimfumu yai ta sala nde luzolo ya Nzambi kusalama bisika yonso na ntoto.

MAMBU YINA BIBLIA KE TUBAKA:

“Wanzio ya nsambwadi bulaka mpungi. Ebuna bandinga ya ngolo wakanaka na zulu, yo ke tuba nde: ‘Kimfumu ya nsi-ntoto me kuma Kimfumu ya Mfumu na beto mpi ya Kristu na yandi, mpi yandi ta yala bonso ntotila mvula na mvula.’”—Kusonga 11:15.

Tala mpi Daniele 2:44; Matayo 6:9, 10.

5 NGIUFULA: Keti bantu yonso ya mbote ke kwendaka na zulu?

MVUTU: Ve. Nzambi me ponaka kimvuka mosi ya fioti ya bantu ya kwikama, yina Biblia ke bingaka “kimvuka ya fioti,” sambu na kukwenda na zulu. Bo ta vanda bantotila ti Yezu mpi ta yala bantu.

MAMBU YINA BIBLIA KE TUBAKA:

“Kuwa boma ve, kimvuka ya fioti, sambu Tata na beno me ndimaka na kupesa beno Kimfumu.”—Luka 12:32.

“Bo ta vanda banganga-nzambi ya Nzambi mpi ya Kristu, mpi bo ta yala bonso bantotila ti yandi.”—Kusonga 20:6.

Tala mpi Kusonga 14:1, 3.

6 NGIUFULA: Luzolo ya Nzambi kele inki sambu na ntoto mpi sambu na bantu?

MVUTU: Ntangu Kimfumu ya Nzambi ta yala, ntoto ta kuma paladisu mpi bantu ya kwikama ta vanda ti mavimpi ya kukuka, ngemba ya kimakulu, mpi luzingu ya kukonda nsuka.

MAMBU YINA BIBLIA KE TUBAKA:

“Bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.”—Nkunga 37:10, 11.

“Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:3, 4.

Tala mpi Nkunga 37:29; 2 Piere 3:13.

    Mikanda ya Kikongo (1982-2025)
    Basika
    Kota
    • Kikongo (Rép. dém. du congo)
    • Kabula
    • Mambu ya Nge Me Zola
    • Copyright © 2025 Watch Tower Bible and Tract Society of Pennsylvania
    • Bantuma ya Kulanda na Ntwala ya Kusadila
    • Bansiku ya Ke Tadila Kinsweki
    • Paramètres de confidentialité
    • JW.ORG
    • Kota
    Kabula