Dikabu Yina Me Swaswana ti Makabu ya Nkaka

YO KE MONANA nde kima ya kutudila kilapi kimate nsongi ya kele bonso maswa yina ke na diboko ya Jordan kele ve mfunu. Kansi, yo ke na kati ya bima yina yandi ke zolaka mingi. Jordan ke tuba nde: “Nkaka Russell, nduku mosi ya dibuta na beto, pesaka mu yo ntangu mu vandaka mwana-fioti.” Na nima ya lufwa ya Russell, bo songaka Jordan nde Russell sadisaka nkaka na yandi ya bakala mpi bibuti na yandi mingi; yandi vandaka kupesa bo kikesa na bantangu ya mpasi. Jordan ke tuba nde: “Ntangu yai ya mu me zaba mambu mingi sambu na nkaka Russell, dikabu yai ya fioti kele mfunu mingi kibeni sambu na mu.”

Mutindu diambu ya Jordan ke monisa, dikabu mosi lenda vanda ti mfunu fioti to yo lenda vanda mfunu ve sambu na bantu ya nkaka. Kansi, sambu na muntu yina bo me pesa yo ya ke monisa ntonda, yo lenda vanda mfunu mingi kibeni. Biblia ke tendula dikabu mosi ya kuluta mfunu na bangogo yai ya me zabanaka mingi: “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.”—Yoane 3:16.

Dikabu yina lenda natila muntu yina ke baka yo luzingu ya mvula na mvula! Keti kele ti dikabu ya nkaka ya kuluta mfunu? Ata bantu ya nkaka lenda zaba ve mfunu ya dikabu yai, Bakristu ya kieleka ke monaka nde yo kele “mfunu kibeni.” (Nkunga 49:8; 1 Piere 1:18, 19) Kansi, sambu na nki Nzambi pesaka luzingu ya Mwana na yandi bonso dikabu sambu na bantu?

Ntumwa Polo tendulaka yo na bangogo yai: “Disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso.” (Baroma 5:12) Muntu ya ntete, Adami, salaka disumu ntangu yandi kolaminaka Nzambi na luzolo yonso; yo yina yandi bakaka ndola ya lufwa. Na nzila ya Adami, lufwa me kuminaka bana na yandi yonso—bantu.

“Lufutu yina disumu ke pesaka kele lufwa, kansi dikabu yina Nzambi ke pesaka kele luzingu ya mvula na mvula na nzila ya Mfumu na beto Kristu Yezu.” (Baroma 6:23) Sambu na kukatula bantu na ndola ya lufwa, Nzambi tindaka Mwana na yandi, Yezu Kristu, na ntoto sambu yandi tambika luzingu na yandi ya kukuka sambu na bantu. Na nzila ya kimenga yina, ya beto ke bingaka “nkudulu,” bantu yonso yina ta monisa lukwikilu na Yezu ta baka luzingu ya mvula na mvula.—Baroma 3:24.

Sambu na balusakumunu yonso yina Nzambi ke pesa bansadi na yandi na nzila ya Yezu Kristu, Polo ke tuba nde: “Beto pesa Nzambi matondo sambu na dikabu na yandi ya ofele yina beto lenda tendula ve.” (2 Bakorinto 9:15) Ya kieleka, nkudulu kele mbote mingi yo yina mpila ya kutendula yo mbote-mbote kele ve. Kansi, na makabu yonso ya kitoko yina Nzambi me pesaka bantu, sambu na nki nkudulu kele mfunu mingi kuluta? Na nki mutindu yo me swaswana ti makabu yonso ya nkaka ya Nzambi me pesaka?a Mpi nki beto fwete sala sambu na yo? Beto ke lomba nge na kutanga bamvutu yina Biblia ke pesa na bangiufula yai na masolo zole yina me landa.