Bantu Iya ya Ke Tambusa Bampunda mpi Nge

Bo ke basika na kintulumukina mpi maboto na bo ke tula makelele bonso nzasi! Mutindu bampunda iya yina ya ngolo mpi bantu yina ke tambusa yo ke monana kele pwelele kibeni yo yina yo ke monana bonso nde yo ke na kubasika na Biblia! Mpunda ya ntete kele ya mpembe—muntu ya ke tambusa yo kele ntotila ya nkembo yina bo me katuka kutula. Mpunda ya zole kele ya mbwaki; muntu ya ke tambusa yo ke katula ngemba na ntoto ya mvimba. Mpunda ya tatu kele ya ndombe bonso mpimpa ya ngolo; muntu ya ke tambusa yo me simba kilo na maboko na yandi ntangu bo ke zabisa nsangu ya mbi na yina me tala nzala. Mpunda ya iya kele ya kunzuluka, yo ke monisa nde maladi mpi mambu ya nkaka ya mpasi ta basika; Lufwa yo mosi muntu ke tambusa yo. Mpi Maziamu, kisika ya bo ke zikaka bantu yonso, ke landa yo na nima sambu na kulokuta bantu mingi yina ke fwa!—Kusonga 6:1-8.

“Mbala ya ntete ya mu tangaka mambu ya me tala bantu iya yina ke tambusa bampunda, mu waka boma. Mu yindulaka nde Kilumbu ya Kusambisa me kwisa mpi sambu mu vandaka ve ya kuyilama, mu zolaka ve kuguluka.”—Crystal.

“Mu sepelaka mingi ti bantu yina ke tambusa bampunda ya mikubu ya kuswaswana. Ntangu mu bakisaka ntendula ya mbona-meso yina, mu bakisaka mambu yonso.”—Ed.

Keti nge me kudiwaka mutindu mosi ti Crystal sambu na bantu iya ya ke tambusa bampunda yina kele na mukanda ya Kusonga? To keti nge me kudiwaka bonso Ed? Yo vanda nge kudiwaka bonso Crystal to Ed, disolo ya ke tubila bantu iya yina ke tambusa bampunda kele na kati ya bambona-meso yina me zabanaka mbote ya kele na mukanda ya Kusonga, mukanda ya nsuka ya Biblia. Keti nge me zaba nde nge lenda baka mambote kana nge bakisa mbona-meso yai? Inki mutindu? Nzambi ke sila nde nge lenda baka kiese ya kieleka kana nge tanga, nge longuka, mpi nge zitisa mambu yina bo me sonikaka na mukanda yai ya bambikudulu.—Kusonga 1:1-3.

Ata mbona-meso yai ya me tala bantu iya ya ke tambusa bampunda ke pesaka bantu ya nkaka boma, lukanu na yo kele ve ya kupesa nge boma. Ya kieleka, bantu mingi me bakisaka nde mbona-meso yai me kumisaka lukwikilu na bo ngolo mpi nkutu yo me sadisaka bo na kukuma ti kivuvu nde mambu ta bonga na bilumbu ke kwisa. Yo lenda vanda mutindu mosi sambu na nge! Nge lenda tanga disolo ya me landa.