Ntama Mingi Ve Nzambi Ta Katula Bampasi Yonso

“O Yehowa, tii nki ntangu mono fwete dila sambu na kulomba lusadisu, kansi nge ke wa ve? Tii nki ntangu mono fwete lomba lusadisu sambu na mubulu, kansi nge ke sala kima ve?” (Habakuki 1:2, 3) Habakuki muntu ya mbote mpi yina vandaka kusepedisa Nzambi muntu tubaka mambu yai. Keti kisambu na yandi monisaka nde yandi kondaka lukwikilu? Ata fioti ve! Nzambi ndimisaka Habakuki nde yandi me tulaka ntangu yina yandi ta katula bampasi.—Habakuki 2:2, 3.

Ntangu nge to muntu ya nge ke zolaka mingi ke mona mpasi, yo ke vandaka pete na kutuba nde Nzambi ke sala ve mambu nswalu, mpi yo ke lomba nde yandi sadisa kaka na ntangu yina. Kansi, Biblia ke tuba nde: “Yehowa ke sukinina ve na kulungisa lusilu na yandi, mutindu bantu ya nkaka ke yindulaka, kansi yandi ke monisila beno ntima ya nda, sambu yandi ke zola ve nde ata muntu mosi kufwa, kansi yandi ke zola nde bantu yonso kubalula ntima.”—2 Piere 3:9.

INKI NTANGU NZAMBI TA KATULA BAMPASI?

Ntama mingi ve! Yezu monisaka nde ndonga mosi ya bantu ta mona mambu ya mutindu na mutindu yina ta monisa bilumbu ya nsuka ya “ngidika ya bima.” (Matayo 24:3-42) Kulungana ya mbikudulu ya Yezu na bilumbu na beto ke monisa nde kubika fioti Nzambi ta yidika mambu ya bantu.a

Kansi, nki mutindu Nzambi ta manisa bampasi yonso? Ntangu Yezu vandaka na ntoto, yandi monisaka ngolo yina Nzambi kele na yo ya kumanisa bampasi ya bantu. Beto tadila mwa bambandu ya ke tubila yo.

Bisumbula ya Lugangu: Ntangu Yezu ti bantumwa na yandi vandaka kutambula na Nzadi-Mungwa ya Galilea, mupepe ya ngolo zolaka kudindisa maswa na bo. Kansi, Yezu monisaka nde yandi ti Tata na yandi kele ti kiyeka na zulu ya bangolo ya lugangu. (Bakolosai 1:15, 16) Yezu tubaka kaka nde: “Bika makelele! Vanda pima!” Inki salamaka? “Mupepe manaka mpi pima ya nene kotaka.”—Marko 4:35-39.

Maladi: Bantu zabaka nde Yezu kele ti kiyeka ya kubelula bifwa-meso, bikata, bantu yina vandaka kubwa ngambu, bantu ya maladi ya lepre, mpi bantu yonso yina vandaka ti maladi ya nkaka. “Yandi belulaka bantu yonso yina vandaka kubela.”—Matayo 4:23, 24; 8:16; 11:2-5.

Nzala: Yezu sadilaka kiyeka yina Tata na yandi pesaka yandi sambu na kukumisa mingi madia yina vandaka fioti. Biblia ke tuba nde ntangu Yezu vandaka kulonga, yandi disaka bantu mingi mbala zole.—Matayo 14:14-21; 15:32-38.

Lufwa: Lufutumuku ya bantu tatu yina Yezu salaka yina kele na Biblia ke monisa pwelele nde Yehowa kele ti ngolo ya kukatula lufwa. Mosi na kati ya bantu yina yandi futumunaka salaka bilumbu iya na maziamu.—Marko 5:35-42; Luka 7:11-16; Yoane 11:3-44.