Keti Nge Zabaka Yo?

Inki sadisaka longoki Etiene na kuwa ve boma ntangu bo vandaka kumonisa yandi mpasi?

ETIENE kutanaka ti kimvuka mosi ya babakala ya nku. Bo vandaka bazuzi 71 mpi vandaka ti kiyeka mingi bonso bantu ya Sanedreni, tribinale ya nene, na Izraele. Kaifa, Nganga-Nzambi ya Nene, yina twadisaka mambu na tribinale mwa bangonda ntangu bo zengilaka Yezu nkanu ya lufwa, muntu sadisaka lukutakanu yai. (Mat. 26:57, 59; Bis. 6:8-12) Ntangu bo vandaka kukusila Etiene makambu, bo monaka kima mosi na Etiene yina yitukisaka bo kibeni, luse ya Etiene kumaka “bonso luse ya wanzio.”—Bis. 6:13-15.

Inki sadisaka Etiene na kuwa ve boma mpi kuvanda pima na diambu yai ya mpasi? Na ntwala ya kunata Etiene na Sanedreni, mpeve ya Nzambi sadisaka yandi na kudipesa mingi na kisalu ya kusamuna. (Bis. 6:3-7) Ntangu yandi vandaka na tribinale, mpeve yai landaka kusadisa yandi, yo vandaka kupesa yandi kikesa mpi kuyibusa yandi malongi ya Biblia. (Yoa. 14:16, noti na nsi ya lutiti) Ntangu Etiene vandaka kutuba na kikesa yonso na tribinale, mutindu kapu ya 7 ya mukanda ya Bisalu ke monisa yo, mpeve santu yibusaka yandi baverse kiteso ya 20 ya Masonuku ya Kiebreo. (Yoa. 14:26) Kansi lukwikilu ya Etiene kumaka ngolo mingi ntangu yandi monaka na mbona-meso, Yezu me vanda na diboko ya kitata ya Nzambi.—Bis. 7:54-56, 59, 60.

Beto lenda kutana mpi ti mambu ya mpasi to mbangika. (Yoa. 15:20) Kana beto ke tanga Ndinga ya Nzambi konso kilumbu mpi ke samuna mbala na mbala, beto ta bika nde mpeve ya Yehowa kutwadisa beto. Beto ta zwa mpi ngolo ya kukanga ntima na mbangika kana beto ke tanina ngemba ya mabanza.—1 Pie. 4:12-14.