Keti Beno Kele ya Kuyilama Sambu na Bisumbula Yina Kebwilaka Bantu?
1. Sambu na nki yo kele mayele na kuyilama na ntwala sambu na bisumbula?
1 Konso mvula, bamilio ya bantu na inza ya mvimba, mpi bampangi na beto mingi ya babakala ti ya bankento kemonaka mpasi sambu na mipepe ya ngolo, kunikana ya ntoto, bamvula ya mipepe ya ngolo, mpi kufuluka ya masa. Sambu bisumbula kesalamaka na kintulumukina mpi yo lenda bwila konso muntu na kati na beto, yo kele mayele na kuvanda ya kuyilama na ntwala.—Bing. 21:5.
2. Sambu na nki bansamuni fwete zabisa bankuluntu adresi na bo ya mpa ti nimero na bo ya telefone?
2 Na Ntwala ya Kisumbula: Bantangu yankaka, bamfumu kekebisaka na ntwala nde kisumbula tasalama. Yo kele mfunu na kutula dikebi na balukebisu yina. (Bing. 22:3) Na bantangu ya mutindu yina, bankuluntu tasosa kukutana ti bampangi yonso ya dibundu sambu na kusadisa bo na kuyilama. Na nima ya kisumbula, bankuluntu fwete sala kikesa sambu na kukutana ti bantu yonso yina kevukanaka ti bo na dibundu sambu na kuzaba kana bo kele mbote mpi kana bo kele na mfunu ya lusadisu. Bankuluntu lenda vidisa ntangu ya mbote kana bo mebaka ve bansangu ya mpa ya sikisiki. Yo yina, yo kele mfunu nde bansamuni kuzabisa sekretere ti nkengi na kulonguka ya mukanda adresi na bo ya mpa ti nimero na bo ya telefone.
3. Inki mutindu beto lenda sala na bumosi ti bankuluntu kana beto kezinga na kisika yina bo ketuba nde kisumbula tasalama?
3 Kana dibundu kele na kisika yina bo ketuba nde kisumbula tasalama, bankuluntu lenda lomba bansamuni na kupesa bo zina ti nimero ya telefone ya mpangi to nduku na bo yina kezingaka ve na kisika yina, mpi yina bo fwete binga kana dyambu ya mpasi mebwa. Kusala mpidina tasadisa bankuluntu na kuzaba kisika kele bampangi yina kutinaka kigonsa. Bankuluntu lenda sala mpi pula ya mambu yina dibundu tasala kana kisumbula mebwa, mu mbandu listi ya bima yina bo lenda vanda na yo mfunu, mutindu ya kukatula bantu na kisika ya kigonsa, mpi mutindu ya kupesa maboko na bantu yina kele na mfunu ya lusadisu. Kusala na bumosi na bangidika yai ya zola kele mfunu.—Baeb. 13:17.
4. Inki beto fwete sala kana kisumbula mesalama na kisika ya beto kezingaka?
4 Na Nima ya Kisumbula: Inki nge fwete sala kana kisumbula mesalama na kisika ya nge kezingaka? Zikisa nde bo melungisa bampusa ya kinsuni ya fami na nge yina kelomba kulungisa kukonda kusukinina. Kana mpila kele, sadisa bantu yankaka yina kubwilaka mpasi. Mpi sala ngolo sambu na kukutana nswalu ti nkengi na kulonguka ya mukanda to nkuluntu yankaka. Nge fwete sala yo ata kana nge kele ve na kigonsa to na mfunu ya lusadisu. Kana nge kele na mfunu ya lusadisu, tula ntima nde bampangi na nge ke na kusala yonso sambu na kusadisa nge. (1 Kor. 13:4, 7) Kuvila mpi ve nde Yehowa kemona mambu ya mebwila nge, mpi tula ntima nde yandi tasadisa nge. (Nk. 37:39; 62:9) Vanda ya kuyilama sambu na kusadisa bantu yankaka na mawi ti na kimpeve. (2 Kor. 1:3, 4) Vutukila nswalu programe na nge ya bisalu ya teokrasi.—Mat. 6:33.
5. Inki kivuvu beto Bakristu kevandaka na yo ntangu beto kewaka nde kisumbula tasalama?
5 Ata bantu ya inza kevandaka na susi mingi ntangu bo kewaka nsangu nde kisumbula tasalama, kansi beto lenda vingila avenire ti kivuvu yonso. Ntama mingi ve bisumbula yonso takuma mambu ya ntama. (Kus. 21:4) Na ntangu ya beto kevingila, beto lenda sala mambu na mayele sambu na kuvanda ya kuyilama na ntangu ya kigonsa mpi ya mpasi, mpi kuvanda ntangu yonso ti kikesa ya kuzabisa nsangu ya mbote na bantu yankaka.