Beto Baka Mikumba na Beto na Valere!
1 Na nsungi ya luzingu ya bantu, Yehowa mepesaka bansadi na yandi mikumba mingi. Yandi mepesaka bo mikumba yango kukonda kutadila mvula na bo, kisika na bo na kati ya kimvuka ya bantu, to kana bo kele bankento to babakala. (Luka 1:41, 42; Bis. 7:46; Filp. 1:29) Inki mikumba yandi mepesa beto bubu yai?
2 Mikumba na Beto: Beto kele ti dibaku ya mbote ya kuvanda bantu yina Yehowa kelongaka. (Mat. 13:11, 15) Beto kele mpi ti dibaku ya mbote ya kukumisa Yehowa na bakomantere na balukutakanu ya dibundu. (Nk. 35:18) Kana bo pesa beto dibaku ya kupesa bakomantere, beto fwete sala yo na kyese yonso. Mutindu mosi, kana beto kemona konso kisalu na kati ya dibundu nde yo kele lukumu, beto tasadila mpenza mayele ti ngolo na beto sambu na kulungisa yo. Keti beto kevukanaka mbala na mbala na kisalu ya kuyidika mpi kutula bunkete na Nzo ya Kimfumu?
3 Ata bamilio ya bantu kekudiyulaka kana Nzambi kewaka bisambu na bo, beto kele ti dibaku ya mbote sambu Muntu ya kuluta mfunu na luyalanganu kewaka bisambu na beto. (Bing. 15:29) Yehowa yandi mosi kewaka bisambu ya bansadi na yandi. (1 Pie. 3:12) Yandi metulaka ve bandilu na yina metala ntalu ya bambala yina beto lenda samba yandi. Beto kele ti dikabu mosi ya nene kibeni, disongidila dibaku ya kusamba yandi “ntangu yonso”!—Ef. 6:18.
4 “Bantu ya Kesalaka Kumosi ti Nzambi”: Dibaku mosi ya kuluta kitoko ya beto kele na yo kele kusamuna nsangu ya mbote ya Kimfumu ya Nzambi bonso “bantu ya kesala kumosi ti Nzambi.” (1 Kor. 3:9, NW) Kisalu yai kepesaka beto kyese ti kikesa. (Yoa. 4:34) Yo lombaka ve nde Yehowa kusadila bantu sambu na kusala kisalu yai, kansi yandi mepesaka beto kisalu yango sambu yandi kezolaka beto. (Luka 19:39, 40) Na mutindu yina, Yehowa mepesaka ve dibaku yai ya mbote kaka na konso muntu. Bantu yina kesalaka kisalu yai na meso ya bantu yonso fwete lungisa mambu ya kimpeve ya Nzambi kelombaka mpi kutanina yo. (Yez. 52:11) Keti beto kemonisaka nde beto kebakaka dibaku yai ya mbote na valere na kusalaka nde kisalu yai kuvanda kitini ya mfunu ya mambu ya beto kesalaka mbala na mbala konso mposo?
5 Mikumba ya Yehowa kepesaka beto kesalaka nde luzingu na beto kuvanda ti lukanu. (Bing. 10:22) Beto fwete mona yo ve mpamba ata fyoti! Kana beto kemonisa nde beto kebaka mpenza mikumba na beto ya kisalu na valere, beto tapesa kyese na Tata na beto ya zulu, Muntu yina kepesaka “makabu yonso ya mbote mpenza.”—Yak. 1:17.