Beto Yonso Kupesana Kikesa
1. Bavizite ya bankengi-ntambudi kevandaka mabaku ya sipesiali ya kusala inki?
1 Ntumwa Polo kusonikilaka Bakristu ya dibundu ya Roma nde: “Mono ke zolaka mingi na kumonana ti beno sambu na kunatila beno lusadisu yina ke katukaka na mpeve ya Nzambi sambu na kupesa beno ngolo na lukwikilu na beno. Kima ya nkaka diaka, mono ke zola nde beto pesana kikesa; yo ke songa nde kikesa na beno ta katuka na lukwikilu yina ya beno ta mona na mono, kikesa na mono mpi ta katuka na lukwikilu yina ya mono ta mona na beno.” (Roma 1:11, 12) Bubu yai, bavizite ya bankengi-ntambudi kevandaka mpi mabaku ya kupesana kikesa.
2. Sambu na nki bo kezabisaka na ntwala vizite ya nkengi-ntambudi?
2 Dibundu: Mbala mingi, bo kezabisaka dibundu vizite ya nkengi-ntambudi kiteso ya bangonda tatu na ntwala. Yo kepesaka beto ntangu ya kuyidika manaka na beto na mpila nde beto baka mpenza mambote na vizite yina. (Ef. 5:15, 16) Kana nge kesalaka kisalu ya kinsuni, nge lenda lomba konzie sambu na kubasika na kisalu ya bilanga na mposo yina. Bankaka keyidikaka manaka na bo sambu na kusala kisalu ya kimupasudi-nzila nsadisi na ngonda yina. Kana nge kanaka kusala nzyetelo, keti nge lenda soba manaka yina sambu na kuvanda pana na mposo yina?
3. Konso muntu lenda sala nki na vizite ya nkengi-ntambudi sambu na kubaka kikesa?
3 Lukanu ya ntetentete ya vizite ya nkengi-ntambudi kevandaka ya kupesa konso muntu kikesa mpi kulonga beto mutindu ya kusala kisalu ya kusamuna. Keti nge lenda lomba na kusamuna ti yandi to ti nkento na yandi kana yandi mekwelaka? Nkengi-ntambudi kesepelaka na kusala ti bansamuni mingi, mpi ti bayina kele ve na eksperiansi mingi to bayina kezola kutomisa mayele na bo ya kulonga. Beto yonso lenda longuka na mutindu na yandi ya kulonga mpi kusadila mabanza yonso yina yandi lenda pesa beto na zola yonso. (1 Kor. 4:16, 17) Kana nge binga yandi na kudya na nzo na nge, yo tapesa nge dibaku yankaka ya kupesana kikesa. (Baeb. 13:2) Sambu badiskure ya nkengi-ntambudi kevandaka na kuwakana ti bampusa ya dibundu, widikila na dikebi yonso.
4. Inki mutindu beto lenda pesa nkengi-ntambudi na beto kikesa?
4 Nkengi-Ntambudi: Ntumwa Polo kuswaswanaka ve ti bampangi yonso ya dibundu. Yandi vandaka kukutana ti bampasi, yandi vandaka ti basusi, yandi vandaka mpi ti mfunu ya kikesa. Ebuna, ntangu bo vandaka kupesa yandi kikesa, yandi vandaka kuvutula ntonda. (2 Kor. 11:26-28) Ntangu bampangi ya dibundu ya Roma kuwaka nde Polo, yina kuvandaka ntangu yina muntu ya boloko, kekwenda na Roma, bankaka kwisaka tii na bwala Zandu ya Apiusi (kitamina ya bakilometre 74) sambu na kukutana ti yandi! “Ntangu Paulo monaka bo, yandi pesaka mersi na Nzambi, ebuna yandi bakaka kikesa ya mpa.” (Bis. 28:15) Nge mpi lenda pesa nkengi-ntambudi na beno kikesa. Pesa maboko na kyese yonso na vizite na yandi sambu na kumonisa nde nge kepesa yandi lukumu mingi. (1 Tim. 5:17) Na kutuba mpi na bisalu na nge, monisa ntonda na nge sambu na bikesa ya yandi kesala sambu na mambote na beno. Nkengi-ntambudi ti nkento na yandi tasepela ntangu bo tamona lukwikilu, zola mpi kukanga ntima na beno.—2 Tes. 1:3, 4.
5. Sambu na nki beto yonso kele na mfunu ya kikesa bubu yai?
5 Na ‘bilumbu yai ya nsuka ya mpasi mingi,’ nani na kati na beto kele ve na mfunu ya kikesa? (2 Tim. 3:1) Baka lukanu ntangu yai ya kusala mingi na mposo ya sipesiali ya kisalu ti nkengi-ntambudi. Beto yonso, bankengi-ntambudi ti bansamuni, lenda pesana kikesa na kyese yonso. Na mutindu yina, beto talanda na ‘kupesana kikesa mpi na kusadisana beto na beto.’—1 Tes. 5:11.