Beto Kabula Baperiodike Yina Ketaka Kimbangi na Kyeleka
1. Inki kele mfunu ya Nzozulu ya Nkengi ti Réveillez-vous !?
1 Nzozulu ya Nkengi Kesamunaka Kimfumu ya Yehowa ti Réveillez-vous ! kelanda na kuvanda bisadilu ya ntete na kisalu ya kusamuna Kimfumu mpi ya kukumisa bantu balongoki. (Mat. 24:14; 28:19, 20) Beto kesepelaka na kupesa mbala na mbala baperiodike yai zole na bantu na ntangu beto kesalaka mitindu ya kuswaswana ya kisalu ya kusamuna.
2. Inki bansoba bo mesalaka na Nzozulu ya Nkengi ti Réveillez-vous !, mpi sambu na nki?
2 Na nsungi ya bamvula mingi, beto memonaka bansoba mingi na bazulunalu yai na yina metala bunene na yo, mambu ya kevandaka na kati, mpi bametode ya beto kesadilaka sambu na kukabula yo. Bo kesalaka bansoba yai sambu bazulunalu yai kubenda dyaka mingi kuluta dikebi ya bantu mpi sambu yo buta mbuma mingi dyaka, na mpila nde nsangu ya Kimfumu kusimba ntima ya ‘bantu yonso sambu bo guluka mpi bo zaba mambu ya kieleka.’—1 Tim. 2:4.
3. Inki mutindu beto tasadila baperiodike na kisalu ya kusamuna?
3 Kubanda Yanuari 2006, beto mekumaka kusadila mbote bangogo ya kuswaswana ya kukotila na masolo sambu na kukabula nimero mosi mpamba ya Réveillez-vous ! Ntangu yai, beto tasadila mpi metode yina mosi na kisalu na beto ya kusamuna sambu na kukabula nimero mosi mpamba ya Nzozulu ya Nkengi Kesamunaka Kimfumu ya Yehowa. Mbandu ya mambu ya kutuba na ntwala ya kupesa konso periodike kebasikaka na lutiti ya nsuka ya Kisalu na Beto ya Kimfumu. Mbala mingi bangogo yai ya kukotila na masolo ketubilaka masolo ya ntete yina kele na periodike, kansi bantangu yankaka yo ketubilaka mpi masolo yankaka yina kesepedisaka mingi bantu. Beto lenda sadila mbote bangogo yina ya kukotila na masolo kana beto tanga mbote disolo yina periodike yango ketubila mpi kusadila bangogo na beto mosi sambu na kuwakanisa bangogo ya kukotila na masolo ti mabanza yina mefwana na teritware na beto.
4. Sambu na nki yo lenda vanda mbote na kusadila bangogo yankaka ya kukotila na masolo, katula bangogo ya kukotila na masolo yina kebasikaka na Kisalu na Beto ya Kimfumu?
4 Ata Kisalu na Beto ya Kimfumu kepesaka mabanza zole sambu na konso periodike, nge lenda sadila bangogo ya kuswaswana ya kukotila na masolo. Kikuma mosi ya lenda pusa na kusala mutindu yina kele nde masolo yankaka lenda benda mingi dikebi ya bantu na teritware. To, mbala yankaka nge lenda mona nde nge tasadila bangogo ya kukotila na masolo na mutindu mosi ya kuluta mbote kana nge sadila disolo yina kesepedisa nge mingi.
5. Na ntwala ya kubongisa bangogo ya kukotila na masolo sambu na kupesa periodike, nki nge fwete sala?
5 Mutindu ya Kubongisa Bangogo ya Kukotila na Masolo: Ntetentete, nge fwete tanga mbotembote disolo yina nge kepona na kutubila. Mbala yankaka nge lenda vanda ve na mpila ya kutanga masolo yonso ya periodike na ntwala ya kuyantika kusadila yo na kisalu ya bilanga. Kansi, nge fwete tubila disolo yina nge mepona na kyese yonso mpi na mutindu mosi ya pwelele. Nge tanunga na kusala yo kaka kana nge kezaba mbote mambu ya nge kezola kutubila.
6. Inki mutindu beto lenda yidika bangogo ya kukotila na masolo ya beto mosi?
6 Ya zole, yidika bangogo ya kukotila na masolo yina nge lenda soba kukonda mpasi. Sambu na kuyantika kusolula ti muntu, nge lenda sadila ngyufula mosi ya kebenda dikebi mpi ya kewakana ti disolo. Tulaka ntangu yonso kivuvu nde Ndinga ya Nzambi kele na ngolo ya kusimba ntima ya muntu. (Baeb. 4:12) Pona verse mosi ya kewakana ti disolo yina nge ketubila, mingimingi verse ya bo mepesa to ya bo mevutukila mambu yina kele ya kusonika na periodike yina nge ketubila. Na nima, tadila mutindu ya kuwakanisa verse mosi ti disolo ya beto ketubila.
7. Inki mutindu beto lenda tomisa dyaka bangogo na beto ya kukotila na masolo?
7 Na Mabaku Yonso: Sambu bangogo ya kukotila na masolo kubuta mpenza mbuma ya mbote, beto fwete sadilaka yo. Sala kisalu ya kusamuna ti dibundu sambu na kukabula baperiodike kilumbu ya Mposo. Pesa baperiodike na bantu yina mendimaka dezia mikanda na beto yankaka. Pesaka ntangu yonso baperiodike na bantu yina nge kelongukaka Biblia ti bo, mpi na bantu yankaka yina nge lenda kuta na ntangu nge mevutukila muntu mosi. Nge lenda pesa baperiodike na bantu yina nge kekutana ti bo na ntangu nge kekwenda kusumba bima, na ntangu nge kesala nzyetolo, to na ntangu nge kevingila munganga na lupitalu. Tomisaka mbala na mbala bangogo na nge ya kukotila na masolo na ntangu nge kesadila yo na ngonda ya mvimba.
8. Na nki mitindu Nzozulu ya Nkengi ti Réveillez-vous ! kele mfunu?
8 Nzozulu ya Nkengi ti Réveillez-vous ! kele baperiodike ya mfunu. Yo kekumisaka Yehowa nde yandi kele Mfumu ya luyalanganu. (Bis. 4:24) Yo kepesaka bantu kikesa ti nsangu ya mbote ya Kimfumu ya Nzambi mpi kesyamisaka bo na kukwikila na Yezu Kristu. (Mat. 24:14; Bis. 10:43) Dyaka, yo ketendulaka mutindu mambu ya kesalama na nsi-ntoto ke na kulungisa bambikudulu ya Biblia. (Mat. 25:13) Sadila mabaku yonso sambu na kudibongisa na kupesa bazulunalu yai na bantu ya teritware na beno na mpila nde yo sadisa bo na kubaka mambote na bazulunalu yango.
9. Inki mutindu beto lenda tula fondasio sambu na kuvutukila muntu?
9 Kana nge nunga na kupesa muntu zulunalu, to ata kana nge mesolula mambu ya kimpeve ti muntu, na nsuka yula ngyufula mosi to tuba dyambu mosi ya kebenda dikebi ya muntu yina na mpila nde yo sadisa nge na kuvutukila mpi na kusolula dyaka ti yandi mambu ya kimpeve. Kana beto kesala kikesa sambu na kukuna bankeni ya kyeleka, beto lenda tula mpenza kivuvu nde Yehowa takangula ntima ya bantu yina kele mpenza na mpusa ya kuzaba mpi kusadila yandi.—1 Kor. 3:6.