Beto Sungimina Nkudulu ti Ntonda

1, 2. Inki bikuma kepusaka beto na kusungimina nkudulu ti ntonda?

¹ Sambu na kulemfuka na ntuma ya Yezu, Bakristu ya ntoto ya mvimba tavukana na nima ya kudinda ya ntangu na Lumingu, Marsi 22, 2008, sambu na kusungimina lufwa ya Yezu Kristu. (Luka 22:19; 1 Kor. 11:​23-26) Ntonda kepusaka beto na kusala mutindu yina sambu na mambu yonso ya kusalamaka na dati yina bamvula meluta 1975. Sambu yandi bikalaka ya kwikama ntangu bo vandaka kumonisa yandi mpasi mpi bo fwaka yandi na zulu ya nti ya mpasi, Yezu kusantisaka zina ya Tata na yandi, mpi kupesaka mvutu ya kukuka na mafingu ya Satana.​—⁠Yobi 1:11; Bing. 27:⁠11.

² Menga ya Yezu yina kutyamukaka kundimisaka kuwakana ya mpa, yo kangulaka nzila sambu Nzambi kundima bantu ya kukonda kukuka bonso bana na yandi mpi kupesa bo kivuvu ya kuyala ti Kristu na Kimfumu ya zulu. (Yer. 31:​31-34; Mar. 14:24) Dyaka, bunene ya zola ya Nzambi sambu na bantu kumonanaka pwelele na mutindu yandi pesaka Mwana na yandi yina yandi kezolaka mingi bonso kimenga, mutindu Yezu yandi mosi kutendulaka yo na Nikodemo.​—⁠Yoa. 3:⁠16.

3. Inki mutindu bantu yina tavanda na Lusungiminu tabaka mambote?

³ Binga Bantu Yankaka: Nimero ya Kisalu na Beto ya Kimfumu ya Yanuari kumonisaka nde beto lenda sala listi ya bantu yina beto mezaba mpi kupesa konso muntu emvitasio. Keti nge meyantika dezia kubinga bantu yina kele na listi na nge? Keti nge mebaka bangidika sambu na kusala mingi na kampanye yina tayantika na Marsi 1 sambu na kubinga bantu na Lusungiminu? Bantu yina tavanda na Lusungiminu yango tawa bansangu ya mekatuka na Masonuku yina takumisa ngolo lukwikilu na bo na nkudulu, mpi kusala mutindu yina tanata na luzingu ya mvula na mvula.​—⁠Roma 10:⁠17.

4. Sambu na nki beto fwete kuma na ntwala na Lusungiminu?

⁴ Bampangi yonso yina takuka lenda kudibongisa sambu na kukwisa na ntwala sambu na kuyamba na kyese yonso bantu yina kundimaka emvitasio ya sipesiali. Sambu bantu kevandaka mingi na Lusungiminu, yo kele mbote nde beto tula dikebi mingimingi na bantu ya mpa ti na bayina kekwisaka na balukutakanu bantangu yankaka.

5. Inki mutindu nge lenda yidika ntima na nge sambu na Lusungiminu?

⁵ Yidika Ntima na Nge: Beto Fimpa Masonuku Konso Kilumbu ya 2008 mpi kalandrie ya 2008 kele ti manaka ya lutangu ya Biblia ya sipesiali sambu na Lusungiminu banda na Marsi 17. Kutadila mambu ya mfunu yina kusalamaka na bilumbu ya nsuka ya luzingu ya Yezu na ntoto tasadisa nge na kuyidika ntima na nge sambu na Lusungiminu. (Esd. 7:10) Kuyindulula na kisambu masolo yai ya Biblia takumisa ngolo ntonda na nge sambu na zola yina Yehowa mpi Mwana na yandi kumonisaka na kupesaka nkudulu.​—⁠Nk. 143:⁠5.

6. Inki bupusi kumonisa ntonda sambu na nkudulu tavanda na yo na luzingu na beto?

⁶ Sambu Lusungiminu mefinama, bika beto kudibongisa mbotembote mpi kusadisa bankaka na kudibongisa sambu na dyambu yai ya mfunu. Kusungimina nkudulu ti ntonda takumisa ngolo bangwisana na beto ti Yehowa mpi ti Mwana na yandi. (2 Kor. 5:​14, 15) Yo tapusa beto mpi na kulanda mbandu na bo na kumonisaka zola ya kuditambika sambu na bantu yankaka.​—⁠1 Yoa. 4:⁠11.