Beto Yonso Kele ti Kima ya Kupesa na Yehowa
1 Keti nge kezabaka nde bantu lenda pesa Nzambi kima? Abele kupesaka na Yehowa makabu ya bambisi na yandi ya kuluta kitoko, Noa ti Yobi mpi kupesaka makabu ya mutindu mosi. (Kuy. 4:4; 8:20; Yobi 1:5) Ya kyeleka, makabu yina kuvwamisaka ve Ngangi ata fyoti, sambu bima yonso kele ya Yandi. Kansi, makabu yina kumonisaka zola ya ngolo yina bantu yai ya kwikama kuvandaka na yo sambu na Nzambi. Bubu yai, beto lenda sadila ntangu, ngolo, mpi mbongo na beto sambu na kupesa Yehowa ‘makabu ya lukumu.’—Baeb. 13:15.
2 Ntangu: Yo kele dyambu mosi ya kusikisa mpenza kana beto kesumba ntangu yina beto kelutisaka na mambu ya mfunu mingi ve sambu na kusala mingi na kisalu ya kusamuna. (Ef. 5:15, 16) Ziku beto lenda soba manaka na beto sambu na kusala kisalu ya kimupasudi-nzila nsadisi ngonda mosi to bangonda mingi na mvula. To beto lenda sala ntangu mingi na kisalu ya kusamuna kuluta yina beto kesalaka ntete. Kana beto keyika konso mposo minuta 30 na bangunga ya beto kesalaka ntete, na nsuka ya ngonda beto tayika bangunga zole na yina beto kepesaka ntete.
3 Ngolo: Sambu na kuvanda ti ngolo ya kusala kisalu ya kusamuna, yo kelombaka nde beto buya bansaka ya kulutisila ntangu mpi bisalu yina kelembisaka beto nitu sambu beto sadila ve Yehowa na ngolo na beto yonso. Dyaka, beto fwete buya kutula susi mingi na mambu yina lenda “katula” beto kyese na ntima, yina keyibaka ngolo na beto yina beto lenda sadila na kisalu ya Nzambi. (Bing. 12:25) Ata beto kele ti bikuma ya mbote ya kutula susi, yo meluta mbote nde beto ‘bikila Yehowa kilo na beto.’—Nk. 55:23; Filp. 4:6, 7.
4 Mbongo: Beto lenda pesa mpi bima na beto ya kinsuni sambu na kupesa maboko na kisalu ya kusamuna. Polo kusyamisaka bampangi na yandi Bakristu na ‘kubumba’ mbala na mbala mwa kima sambu na kupesa na bansukami. (1 Kor. 16:1, 2) Mutindu mosi, beto lenda bumba mwa mbongo ya kupesa makabu sambu na bampusa ya dibundu na beto mpi sambu na kisalu yina kesalama na nsi-ntoto ya mvimba. Yehowa kesepelaka na makabu yina beto kepesaka na ntima ya mvimba, ata yo kele kaka ya fyoti.—Luka 21:1-4.
5 Yehowa mepesaka beto bima mingi. (Yak. 1:17) Beto kemonisaka ntonda na beto ntangu beto kepesaka na luzolo yonso ntangu, ngolo, mpi bima na beto yankaka sambu na kusadila yandi. Ntangu beto kesalaka mutindu yina, yo kesepedisaka Yehowa, “sambu Nzambi ke zolaka nde bantu kupesa makabu ti kiese.”—2 Kor. 9:7.