Inki Mutindu Beto Lenda Sadisa Bantu Yina Tavanda na Lusungiminu?
1. Inki kimbangi ya ngolo tapesama na Marsi 22, 2008?
1 Na Marsi 22, 2008, bamilio ya bantu na nsi-ntoto ya mvimba tabaka kimbangi mosi ya ngolo. Bantu yina tavanda na Lusungiminu tawa nsangu ya metala zola ya nene yina Yehowa kumonisaka na mutindu yandi pesaka mwana na yandi bonso nkudulu sambu na bantu. (Yoa. 3:16) Bo talonguka mambu ya metala Kimfumu mpi mutindu Yehowa tasadila Kimfumu yango sambu na kulungisa luzolo na yandi na ntoto ya mvimba. (Mat. 6:9, 10) Bo tamona na meso na bo mosi zola, bumosi, mpi kikalulu ya kuyamba ya bansadi ya Nzambi.—Nk. 133:1.
2. Inki mutindu beto lenda sadisa balongoki ya Biblia yina tavanda na Lusungiminu?
2 Balongoki ya Biblia: Na kati ya bantu yina tavanda na Lusungiminu, beto lenda tanga bantu yina beto yantikaka kulonguka Biblia ti bo ntama mingi ve. Songisa bo na bampangi yankaka. Tendudila bo manaka ya balukutakanu ya konso mposo, mpi tambwisa bo na Nzo ya Kimfumu. Na ntangu mutubi tasala diskure, ntembe kele ve nde yandi tasyamisa bo na kulanda na kuyela na kimpeve. Nge lenda sadila mambu yina yandi tatuba sambu na kusyamisa balongoki na nge.
3. Inki beto lenda sala sambu na kusyamisa bansamuni ya melembaka yina tavanda na Lusungiminu?
3 Bansamuni Yina Melembaka na Kimpeve: Na kati ya bantu yina tavanda na Lusungiminu, beto lenda tanga mpi bansamuni yina melembaka na kimpeve. Baka lukanu ya kupesa bo mbote ti kyese yonso. Bika kuyula bo bangyufula ya metadila bo to kutuba mambu yina lenda pesa bo nsoni. Bilumbu fyoti na nima ya Lusungiminu, bankuluntu fwete kwenda kutala bansamuni yonso yina melembaka mpi ya kukwisaka na Lusungiminu, kusikisa bo sambu na bikesa ya bo salaka sambu na kukwisa, mpi kulomba bo na kukwisa na lukutakanu ya dibundu yina kekwisa.
4. Inki mutindu konso muntu na kati na beto lenda sadisa banzenza?
4 Banzenza: Na kati ya bantu yankaka dyaka yina tavanda na Lusungiminu, beto lenda tanga mpi bantu ya beto mezabanaka ti bo, to bantu ya dibuta na beto yina beto tabingisa. Bankaka tabaka emvitasio na kampanye ya sipesiali yina tasalama. Kana nge mona bantu yina nge kezaba ve, baka lukanu ya kupesa zina na nge mpi ya kuzodila bo kukwisa ya mbote. Ziku yo kele mbala na bo ya ntete ya kukwisa na balukutakanu na beto. Na ntangu beno kesolula, nge lenda zaba mutindu ya kukutana ti bo dyaka. Kana nge kwenda kutala bo to nge binga bo na telefone bilumbu fyoti na nima ya Lusungiminu, nge lenda syamisa bo na kulonguka dyaka mambu mingi ya Biblia.
5. Inki beto lenda tuba sambu na kuyantika kulonguka Biblia ti muntu?
5 Beto lenda sadila mambu yina mutubi tatuba na diskure ya Lusungiminu sambu na kupesa mukanda Biblia Kelongaka na ntangu beto tavutukila bantu yina tavanda na Lusungiminu. Mu mbandu, mutubi tatanga Yezaya 65:21-23. Na ntangu beto tasala mvutukilu ya mpa, beto lenda tubila diskure yango mpi kutuba nde: “Bika mu songa nge balusakumunu yankaka yina nkudulu tanata.” Na nima, beto lenda tadila balutiti 4-5 ya mukanda Biblia Kelongaka. To Beto lenda tuba nde, “Bantu mingi kekudiyulaka nki ntangu beto tamona kulungana ya mbikudulu yai ya Yezaya.” Na nima, beto lenda tadila baparagrafe 1-3 ya kapu 9. Metode yankaka kele ya kutubila mambu yina mutubi tatuba na diskure, kupesa mukanda Biblia Kelongaka, mpi kumonisa mutindu kulonguka kesalamaka.
6. Inki mabaku beto kele na yo na mutindu beto kelemfuka na ntuma ya Yezu ya kusungimina lufwa na yandi?
6 Bika nde konso muntu na kati na beto kusosa mabaku ya kusadisa balongoki ya Biblia, bansamuni yina melembaka na kimpeve, mpi banzenza yina tavanda na Lusungiminu. (Luka 22:19) Ntembe kele ve nde Yehowa tasakumuna mambu yonso yina beto tasala na kisalu ya Kimfumu.