“Beno Pesa Nzambi Mersi”
1 Ntangu Yezu kubelulaka bantu kumi yina kuvandaka ti maladi ya lepre, kaka mosi na kati na bo kuvutukaka sambu na kupesa yandi mersi. Yezu kuyulaka nde: “Si bantu yina yonso kumi me beluka! Kansi wapi bantu yina ya nkaka uvwa?” (Luka 17:11-19) Yo kele mfunu mpenza nde beto monisa ntonda mpi kupesa mersi sambu na makabu yonso ya mbote mpi ya kukuka yina, Yehowa Nzambi, Tata na beto ya zola mpi ya kekabaka, kepesaka beto!—Kol. 3:15; Yak. 1:17.
2 Inki kele mwa mambu yina fwete pusa beto na kupesa Nzambi mersi? Beto kemonisaka ntonda sambu na nkudulu yina kele dikabu ya kuluta nene ya Nzambi mepesaka bantu. (Yoa. 3:16) Beto kemonisaka mpi ntonda na Yehowa na mutindu yandi kebendaka beto na yandi. (Yoa. 6:44) Bumosi na beto ya Bukristu kele kikuma yankaka ya kumonisa ntonda. (Nk. 133:1-3) Ntembe kele ve nde, nge lenda yindula makabu mingi yankaka yina kekatukaka na Yehowa. Bika nde beto kuma ve ata fyoti bonso bantu ya Izraele yina kumonisaka ve ntonda mpi kuvilaka mambu yina Yehowa kusalaka sambu na bo!—Nk. 106:12, 13.
3 Monisa Ntonda: Ata yo lenda vanda nde bantu yonso kumi yina vandaka na maladi ya lepre kusepelaka sambu na mambu yina Yezu kusalaka sambu na bo, mosi mpamba kupesaka yandi mersi. (Luka 17:15) Mutindu mosi, beto kemonisaka ntonda na ntangu beto kesalaka kisalu ya kusamuna ti kikesa. Kana beto kepesa mpenza Tata na beto ya zola mersi sambu na mambu yonso yina yandi mesalaka, yo tapusa beto na kuzabisa bankaka mambu ya metala yandi sambu na kumonisa zola mpi kikalulu na yandi ya kukaba. (Luka 6:45) Ebuna, na ntangu beto kezabisa bankaka “mambu mingi ya mbote” mpi mabanza ya Yehowa, zola ti ntonda na beto sambu na yandi tayela.—Nk. 40:6.
4 Syamisa Bankaka na Kumonisa Ntonda: Beto fwete sosa mabaku ya kusadisa bana na beto mpi balongoki ya Biblia sambu bo yedisa ntonda na bo. Bibuti kele ti mabaku mingi ya kusala dyambu yai, mu mbandu ntangu bo ketubilaka lugangu ya Yehowa ti bana na bo. (Roma 1:20) Ntangu beto kelonguka Biblia ti muntu, beto lenda yula yandi nde, “Mambu yai kelonga beto nki na yina metala kimuntu ya Yehowa?” Mutindu ntonda ya longoki keyela, zola na yandi sambu na Nzambi mpi lukanu na yandi ya kusepedisa Nzambi tayela.
5 Na bilumbu yai ya nsuka, bantu mingi kemonisaka ve ntonda mpi kepesaka ve mersi. (2 Tim. 3:1, 2) Yehowa kesepelaka mpenza na ntangu yandi kemonaka bansadi na yandi ya mekudipesaka kesala kisalu ya kusamuna ti kikesa yonso sambu na kumonisa ntonda na bo!—Yak. 1:22-25.