Beto Kebwisa Bima Yina Mekangamaka Ngolo

¹ Banda ntama kibeni, Satana kesadilaka luvunu ti malongi ya luvunu sambu na kukusa bantu mingi. Yandi kelongaka malongi bonso Butatu busantu, kukonda kufwa ya moyo, mpi bilungi ya tiya. Yandi kesyamisaka ntembe na yina metala Ngangi mpi bukyeleka ya Biblia. Kumenga bantu sambu na mpusa na bo ya nitu mpi kuvanda na zola sambu na nsi kele na kati ya bima yina kekangaka bantu nzila na kundima kyeleka. (2 Kor. 4:⁠4) Inki mutindu beto lenda bwisa balukwikilu ya mutindu yai ya mekangamaka ngolo?​—⁠2 Kor. 10:​4, 5.

² Tadila Mawi: Mbala mingi, balukwikilu yina bo melongaka bantu nde yo kele kyeleka kevandaka na bupusi ya ngolo na mawi na bo. Bo melongaka bantu yankaka malongi ya luvunu banda bumwana. Sambu na kusadisa bantu yai, beto fwete tuba na mutindu yina kemonisa luzitu na bangindu na bo.​—⁠1 Pie. 3:​15, 16.

³ Beto lenda monisila bantu yango luzitu na kupesaka bo nzila ya kutendula mambu ya bo kekwikilaka mpi bikuma yina bo kekwikilaka mambu yango. (Yak. 1:19) Mbala yankaka, bo kekwikilaka nde moyo kefwaka ve sambu bo mefwilaka bantu ya bo kezolaka mpi kevandaka na mpusa ya ngolo ya kumona bo dyaka. To bo ketaka bankinsi sambu bo kesepelaka na mabaku yina yo kepesaka bo ya kuvanda kumosi na dibuta. Kuwidikila mambu ya bo ketuba tasadisa beto na kubakisa mawi na bo mpi na kupesa bo mvutu na mutindu mosi ya mbote.​—⁠Bing. 16:⁠23.

⁴ Landa Mbandu ya Yezu: Yezu kupesaka beto mbandu mosi ya kuluta mbote ntangu yandi pesaka mvutu na bangyufula ya muntu mosi yina kuzabaka mbote bansiku. Yezu kusongaka yandi ve mambu yina yandi fwete sala, sambu mambu yina muntu yango vandaka kukwikila mpi kuzola mingi lendaka kusala nde yandi buya mvutu yango. Kansi, Yezu kusadilaka Masonuku, kulombaka yandi na kumonisa mabanza na yandi, mpi kusadisaka yandi na kuyindula na nsadisa ya kingana mosi.​—⁠Luka 10:​25-37.

⁵ Ndinga ya Nzambi lenda sala nde bantu kuyambula kukwikila na malongi ya luvunu ya mabundu. (Baeb. 4:12) Kutendudila bawi na beto kyeleka na kukanga ntima yonso lenda simba ntima na bo, mpi beto lenda kuka na kusadisa bo na kubuya luvunu mpi kundima kyeleka yina lenda katula bo na kimpika.​—⁠Yoa. 8:⁠32.