Longa Bankaka na Kuzola Yehowa

1. Inki kupusaka bantu yankaka penepene ya Yehowa?

¹ Keti nge keyibuka mbala ya ntete ya nge waka mambu ya metala Yehowa? Inki dyambu kupusaka nge penepene na yandi? Bantu mingi ya masonga tazabisa nge nde kima kupusaka bo penepene na Ngangi na beto kele nzayilu ya bikalulu na yandi ya kuluta nene, mingimingi mawa mpi zola na yandi.​—⁠1 Yoa. 4:⁠8.

2, 3. Inki mutindu beto lenda sadila mukanda Biblia Kelongaka sambu na kusadisa balongoki ya Biblia na kuyedisa zola na bo sambu na Yehowa?

² “Yai Kele Nzambi na Beto”: Mukanda Biblia Kelongaka kebendaka dikebi na zola ya Yehowa mpi na mfunu ya kusala bangwisana ti yandi. Inki mutindu beto lenda sadila mukanda yai sambu na kusadisa bantu yankaka na kuyedisa zola na bo sambu na Nzambi? Ntangu beto ketadila ngindu mosi ya mpa, beto lenda yula bangyufula yina kepusaka bantu na kuyindula, mu mbandu: “Kyeleka yai kemonisa nki na yina metala Yehowa?” to “Na nki mutindu ngindu yai kepesa nzikisa ya kemonisa nde Yehowa kele Tata ya kuluta mbote yina muntu lenda zola kuvanda ti yandi?” Kulonga na mutindu yai lenda sadisa longoki na kusala bangwisana ya kukonda nsuka ti Yehowa.

³ Ntangu beto kesadisa balongoki ya Biblia na kubakisa nde kubaka nzayilu ya Nzambi mosi kaka ya kyeleka mpi ya moyo kele dibaku ya nene, bo tatuba mutindu yai, kana beto vutukila bangogo yai ya Yezaya, “yai kele Nzambi na beto.” (Yez. 25:⁠9) Ntangu beto ketendula Ndinga ya Nzambi, beto fwete monisa mutindu bantu tabaka balusakumunu na kulungana ya balukanu ya Yehowa na nzila ya luyalu na yandi ya kele na maboko ya Kristu Yezu.​—⁠Yez. 9:​5, 6.

4, 5. Zola sambu na Yehowa ketendula inki?

⁴ Banzikisa ya Zola ya Yehowa: Beto mezaba nde kuzola Yehowa na ntima, na moyo, mpi na mabanza na beto yonso ketendula mambu mingi kuluta kuvanda ti mawi ya ngolo sambu na Nzambi. Beto fwete ndima mpi kulanda mutindu na yandi ya kuyindula. (Nk. 97:10) Zola sambu na Nzambi kemonanaka kana beto kelemfuka na bansiku na yandi yonso mpi kelanda na kusala “bisalu ya bikalulu ya santu mpi . . . bisalu ya kukangama na Nzambi,” ata na ntwala ya kimbeni to mbangika.​—⁠2 Pie. 3:​11, NW; 2 Yoa. 6.

⁵ Kusala luzolo ya Nzambi sambu beto kezolaka yandi kepesaka kyese. (Nk. 40:⁠9) Longoki ya Biblia fwete bakisa nde bansiku ya Nzambi yonso kevandaka sambu na mambote ya kukonda nsuka ya bansadi na yandi. (Kul. 10:​12, 13) Kana muntu kezinga na kuwakana ti lutwadisu ya Yehowa, yandi tamonisa ntonda ya mudindu sambu na bisalu ya kitoko ya Nzambi. Sadisa longoki na kubakisa nde kutambula na banzila ya lunungu ya Yehowa tatanina yandi na mambu mingi ya mpasi.

6. Inki balusakumunu muntu lenda baka kana yandi kezola Yehowa?

⁶ Balusakumunu Sambu na Bantu Yina Kezolaka Nzambi: Yehowa kekudibanzaka mpenza sambu na bantu ya kudikulumusa yina kezolaka yandi, mpi yandi kesongaka bo “mambu ya mudindu ya Nzambi.” (1 Kor. 2:​9, 10, NW) Kana bo kele ti nzayilu yai ya balukanu ya Yehowa, bo tavanda ti kivuvu ya kyeleka mpi mboninu ya mbote sambu na makwisa. (Yer. 29:11) Bantu yina kezolaka Yehowa tabaka mambote na yandi ya nene kibeni. (Kub. 20:⁠6) Bo kele ti kivuvu ya luzingu ya mvula na mvula sambu Nzambi kezolaka bo mingi.​—⁠Yoa. 3:⁠16.

7. Inki mutindu nge kekudiwaka na yina metala kulonga bankaka na kuzola Yehowa?

⁷ Kana beto kuma ti nzayilu mingi ya Tata na beto ya zulu, beto tazabisaka yo mingi na bantu yankaka. (Mat. 13:52) Yo kele dibaku ya nene kibeni na kulonga bankaka, mpi mingimingi bana na beto, na kuzola Yehowa! (Kul. 6:​5-7) Bika nde beto yonso, kumosi ti balongoki na beto ya Biblia, kulanda na kupesa Yehowa lukumu ntangu beto kemona ‘mambote na yandi ya nene.’​—⁠Nk. 145:⁠7.