‘Beno Zinga Kaka na Zola ya Nzambi’

1. Inki kele lukanu yina bo basisaka mukanda ‘Beno Zinga Kaka na Zola ya Nzambi’?

¹ Beto kevingila ti kyese mingi mpenza kulonguka ya mukanda ya mpa ‘Beno Zinga Kaka na Zola ya Nzambi’ na Kulonguka ya Biblia ya Dibundu, na mposo ya Februari 23 sambu na bandinga ya Kifalansa ti Swahili to, ntangu yo tabasika na ndinga na beto! Mukanda yina Nto-Kimvuka kutindilaka konso muntu yina kezolaka Yehowa, kusukaka ti bangogo yai: “Beto ketula kivuvu na masonga yonso nde mukanda yai tasadisa beno na kulanda na kusadila kyeleka na luzingu na beno mpi na mutindu yina kuzinga kaka na ‘zola ya Nzambi ti kivuvu ya kubaka moyo ya mvula na mvula.’ ”​—⁠Yude 21.

2. Mukanda yai ya mpa tasadisa beto na nki mambu ya luzingu?

² Mambu ya Beto Kevingila: Inki mutindu beto lenda sadila minsiku ya Biblia na mambu bonso kinduku, bansaka ya kulutisila ntangu, kuzitisa kiyeka, bikalulu, makwela, kutuba, mpi binkulu? Kansansa na beto tatwadisama na minsiku ya kuzanguka ya lunungu yina kele na Ndinga ya Nzambi. (Nk. 19:​7, 8) Ntangu nzayilu na beto na yina metala mutindu Yehowa ketadilaka mambu keyela, mpusa ya kusepedisa yandi tapusa beto na kulemfuka na mambu yonso ya luzingu na beto.​—⁠Bing. 27:11; 1 Yoa. 5:⁠3.

3. Sambu na nki beto fwete sala yonso sambu na kupesa bakomantere na kulonguka ya konso mposo?

3 Baka Lukanu ya Kupesa Bakomantere: Na ntangu nge kekudibongisa, baka lukanu ya kukumisa Nzambi na kimvuka ya bantu na yandi. (Baeb. 13:15) Dibundu ya mvimba talonguka mukanda yai ya mpa kumosi. Sambu beto tavanda kaka ti kitini ya fyoti ya kulonguka konso mposo, beto takuka na kudibongisa mbotembote, ebuna yo tapesa beto dibaku ya kutuba mambu ya beto longukaka. Bakomantere ya beto meyidika mbote mpi ya sikisiki tapusa bankaka na zola mpi na bisalu ya mbote ebuna yo tasala nde kulonguka kuvanda ya mbote mpi kusalama na kyese. (Baeb. 10:24) Mpi, kyese na beto tavanda dyaka mingi ntangu beto tasala bakomantere ya kemonisa lukwikilu na beto.

4. Sambu na nki yo kele mfunu mpenza na kulemfuka na bansiku ya Yehowa?

⁴ Na mpimpa ya nsuka ya luzingu na yandi na ntoto, Yezu kuwakanisaka kulemfuka na bansiku ya Yehowa ti kuzinga kaka na zola ya Nzambi. (Yoa. 15:10) Na lusadisu ya mukanda ‘Zola ya Nzambi,’ beto tabaka mpenza lukanu ya kusadila minsiku ya Biblia na luzingu na beto ya konso kilumbu mpi na ‘kuzinga kaka na zola ya Nzambi.’​—⁠Yude 21.