Kusamuna Kesadisaka Beto na Kubikala Ngolo na Kimpeve

1. Inki mambote kisalu ya kusamuna kenatilaka beto?

¹ Kusala kisalu ya kusamuna ti kikesa lenda kumisa beto ngolo na kimpeve mpi kuyedisa kyese na beto. Ya kyeleka, beto kesamunaka ntetentete sambu na kusepedisa Yehowa. Kansi, kana beto kelemfuka na ntuma ya ‘kulonga nsangu,’ beto tabaka balusakumunu ya Yehowa mpi bulemfu yina tanatila beto mpi mambote na mitindu mingi. (2 Tim. 4:2; Yez. 48:​17, 18) Ebuna, inki mutindu kisalu ya kusamuna lenda pesa beto ngolo mpi kyese?

2. Inki mutindu kisalu ya kusamuna kekumisaka beto ngolo?

² Beto Kebakaka Ngolo mpi Balusakumunu: Kusamuna kesyamisaka beto na kutula dikebi na balusakumunu ya Kimfumu na kisika ya kutula dikebi na mambu ya mpasi ya bubu yai. (2 Kor. 4:18) Kutendula malongi ya Biblia kekumisaka ngolo lukwikilu na beto na balusilu ya Yehowa mpi keyedisaka ntonda na beto sambu na kyeleka. (Yez. 65:​13, 14) Ntangu beto kesadisa bankaka na kuyela na kimpeve sambu na kuvanda “bantu ya nsi-ntoto yai ve,” beto kekumisaka ngolo lukanu na beto mosi ya kukabwana na nsi-ntoto yai.​—⁠Yoa. 17:​14, 16; Roma 12:⁠2.

3. Inki mutindu kisalu na beto ya kusamuna kesadisaka beto na kuyedisa bikalulu ya Bukristu?

³ Kuvukana na kisalu ya kusamuna kesadisaka beto na kuyedisa bikalulu ya Bukristu. Mu mbandu, kusala kikesa na kukuma bima yonso sambu na bantu ya mitindu yonso kesadisaka beto na kuyedisa kudikulumusa ya nene. (1 Kor. 9:​19-23) Na ntangu beto kesolulaka ti bantu yina “me lemba, kikesa ve, bonso mameme me konda ngungudi ya kutala bo,” beto kelongukaka zola mpi kuditula na kisika ya bankaka. (Mat. 9:36) Beto kelongukaka kukanga-ntima na ntangu beto kelandaka na kusamuna ata bantu kemonisa ve dikebi na nsangu to kemenga beto. Kyese na beto kekumaka mingi na ntangu beto kekudipesaka sambu na mambote ya bankaka.​—⁠Bis. 20:⁠35.

4. Inki mutindu nge kekudiwaka na yina metala kisalu na nge ya kusamuna?

⁴ Yo kele lusakumunu mpenza na kusala kisalu yina kepesa lukumu na Muntu mosi kaka ya mefwana na kubaka lusambu na beto! Kisalu ya kusamuna kepesaka beto ngolo. Yo kenataka balusakumunu mingi na bantu yina kekudipesaka mpenza na “kulonga nsangu ya mbote.”​—⁠Bis. 20:⁠24.