Keti Nge Kele ya Kuyilama Sambu na Nkinsi Mosi ya Kimpeve?
1. Yo kelombaka kuyidika inki mambu sambu na kusala nkinsi?
1 Sambu na kusala nkinsi, yo kelombaka kuyidika mambu mingi. Yo kelombaka kusosa madya, kulamba yo mbote, mpi na nima kupesa yo na bantu. Yo kelombaka mpi kuyidika mutindu ya kukabula madya. Dyaka, yo kelombaka kuyidika kisika ya bantu tadya madya yango. Banzenza mpi fwete yilama, mingimingi kana bo tasala mwa kitamina sambu na kukuma na kisika yina nkinsi tasalama. Ata yo kelombaka kisalu mingi, kudya madya ya ntomo mpi ya ketunga ti banduku mpi dibuta kesalaka nde nkisi yina kuvanda mfunu. Ntama mingi ve, Bambangi ya Yehowa ya ntoto ya mvimba tavukana na bimvuka ya nene mpi ya fyoti sambu na kusala nkinsi ya kimpeve ya bo kevingila; nkinsi yango kele Lukutakanu ya Distrike ya kele ti ntu-dyambu “Kangula Meso!” Bisalu mingi mesalama dezia sambu na kuyidika manaka mpi mambu yonso na ntwala. Bo mebingisa beto yonso. Sambu na kuvanda na kati ya bantu yina takwisa mpi kubaka mambote mingi, beto mpi fwete kudibongisa.—Bing. 21:5.
2. Kuvanda konso kilumbu na nkinsi na beto ya kimpeve kelomba nki?
2 Baka Mambote Mingi: Keti nge memanisa mambu ya nge keyidika sambu na kuvanda konso kilumbu na nkinsi yai ya kimpeve? Kana mpila kele, solula ti mfumu na nge ya kisalu sambu na kusonga yandi nde nge tavanda na bitini yonso ya lukutakanu na beno, ti na kilumbu ya ntete. Keti nge memanisa bangidika sambu na transpore mpi kisika ya kulala? Bankuluntu fwete zikisa nde bo melungisa bampusa ya baminunu ti bantu yina kele ti bifu na nitu mpi bantu yankaka yina lenda vanda ti mfunu ya lusadisu.—Yer. 23:4; Gal. 6:10.
3. Sambu na nki beto fwete kwenda ve na balukutakanu ya bansi mingi yina bo mebingisa beto ve?
3 Na bisika yankaka bo tasala balukutakanu ya distrike ya bansi mingi. Kuvila ve nde bo mebingisa mabundu ya sikisiki mpi bantu ya mekatuka na bansi ya nzenza na balukutakanu yina. Ntangu biro ya filiale mesala bangidika yai, bo mezaba dezia ntalu ya bantu yina bo mebingisa, bisika ya kuvanda, mpi bashambre ya otele. Kana bansamuni kukwenda na balukutakanu ya bansi mingi yina bo mebingisa bo ve yo lenda sala nde ntalu ya bantu kulutana.
4. Inki bangibusa tasadisa beto na kuvanda ya kuyilama na luyantiku ya manaka ya konso kilumbu?
4 Kudibongisa na kukuma na ntwala konso kilumbu na lukutakanu ya distrike sambu na kuzwa kisika ya kuvanda na ntwala nde manaka kuyantika. Sadila mwa minuta na ntwala nde lukutakanu kuyantika sambu na kulosa disu na manaka. Yo tasadisa nge na kuyidika ntima na nge na mambu yina bo talonga na lukutakanu. (Esd. 7:10) Ntangu ntwadisi ya lukutakanu kezabisa miziki ya luyantiku, widikila yo mpi vanda ya kuyilama sambu na kuyimba nkunga ya luyantiku mpi kulanda kisambu.
5. Inki mutindu dibuta na beto lenda baka mambote mingi ya lukutakanu?
5 Kana bantu ya dibuta kuvanda kisika mosi na ntangu lukutakanu kesalama, yo tasadisa bibuti na kuzikisa nde bana na bo kelanda manaka ti dikebi. (Kul. 31:12) Bo kesyamisa konso muntu na kulanda baverse na Biblia na yandi ntangu bo ketanga. Kubaka banoti ya nkufi lenda sadisa nge na kulanda ti dikebi ya mingi. Na nima, banoti na nge tasadisa nge na kuyibuka mambu ya mfunu ya badiskure. Nunga mpukumuna ya kusolula mpamba-mpamba to ya kubasika-basika na ntangu lukutakanu kesalama. Kana nge kele ti telefone, sala na mpila nde yo vwalangasa ve mabanza na nge to ya bantu yankaka na ntangu lukutakanu kesalama. Na nsuka ya konso kitini ya manaka ya kilumbu, sambu na nki ve kusolula ti bankaka mambu ya lukutakanu yina kusepidisaka nge?
6. Inki kele kitini ya kuluta kitoko ya balukutakanu na beto ya distrike, mpi inki mutindu yo lenda natila beto mambote mingi?
6 Na lukutakanu ya distrike, beto kevandaka ti dibaku ya kusala bangwisana ya ngolo ti bampangi na beto ya babakala mpi ya bankento, dyambu yina lenda salama ve na nsi-ntoto. (Nk. 133:1-3; Mar. 10:29, 30) Sambu na nki ve kubaka lukanu ya kusonga bampangi yina mevanda penepene ti nge zina na nge mpi kusolula ti bo na ntangu ya kupema? Yai kele mosi ya mambote ya kunata madya ya kukonda kilo mpi ya kubikala na kisika ya lukutakanu olie ya kubasika sambu na kukwenda na restora. Sala yonso na mpila nde nge konda ve dibaku ya mutindu yai ya kupesana kikesa.—Roma 1:11, 12.
7. Inki mambu beto fwete yidika na yina metala bilele yina beto talwata?
7 Kulwata: Ntuma yina Yehowa kupesaka bantu ya Izraele ya kutula malenda na bansongi ya bilele na bo, mpi ya kutula na konso dilenda nsinga ya bule kebenda mpenza dikebi na beto. (Kut. 15:37-41) Yo vandaka dyambu ya vandaka kumonana na meso ya bantu ya vandaka kuyibusa bo nde bo vandaka bantu yina Yehowa tulaka na kingenga sambu na lusambu na yandi. Bubu yai, bilele ya lukumu, ya kukonda mindondo ya beto kelwataka na ntangu beto kekwendaka na lukutakanu ketulaka beto na kingenga na nsi-ntoto. Yo ketaka kimbangi ya ngolo na bantu yina ketalaka beto ata ntangu beto kebasikaka sambu na kukwenda kudya na nima ya manaka. Yo yina, yindula mbotembote na ntwala bilele yina nge talwata.
8. Inki mutindu beto lenda ta kimbangi na bantu yankaka ntangu beto kele na mbanza yina lukutakanu kesalama?
8 Ta Kimbangi: Kana beto kudibongisa na ntwala, beto lenda kuka kuta kimbangi na bantu na ntangu beto kele na mbanza yina lukutakanu kesalama. Mpangi mosi yina kwendaka na restora ti nkento na yandi na nima ya manaka kumonisaka kaka makaro na yandi mpi kuyulaka nsadi mosi ya restora nde: “Keti nge memona bantu mingi ti makaro yai?” Nsadi yango tubaka nde yandi monaka bo mpi yandi vandaka kudiyula sambu na nki bo lwataka makaro ya mutindu mosi. Yo nataka na disolo mpi mpangi-bakala bingisaka muntu yango na lukutakanu ya distrike.
9. Inki mutindu beto lenda monisa ntonda sambu na Yehowa, Muntu yina kebingisa beto?
9 Ata bampangi na beto bantu tasala badiskure, bainterview mpi bansonga yonso, yo kele Tata na beto ya zulu, Yehowa, muntu mesadisa nkinsi ya kimpeve ya mvula yai. (Yez. 65:13, 14) Beto tamonisa ntonda na Muntu yina kebingisa beto kana beto vanda pana konso kilumbu mpi kudya konso kitini ya madya ya kimpeve yina bo kepesa. Keti nge memanisa na kudibongisa sambu na kusala mutindu yina?
[Lupangu ya kele na lutiti 6]
Bangibusa ya Lukutakanu ya Distrike
◼ Bangunga: Bilumbu yonso tatu manaka tayantikaka na 9:20. Bakyelo takangukaka na 8:00. Na ntangu miziki tayantika kubula, beto yonso fwete vanda na bisika na beto na ntangu yina na mpila nde manaka kuyantika na mutindu mosi ya kepesa lukumu. Manaka tasuka na 16:55 na Kitanu ti na Mposo, mpi na 16:00 na Lumingu. Sambu na balukutakanu ya bansi mingi, manaka ya Kiya tayantika na 13:20 mpi tasuka na 16:55.
◼ Kubumba Bisika: Beno lenda bumba bisika ya kuvanda kaka sambu na bantu yina kekwisa kumosi ti beno na vwatire to bantu yina kezingaka ti beno nzo mosi.
◼ Madya ya Midi: Beto kelomba beno na kunata madya ya kukonda kilo kansi ya mefwana na kudisa nitu, mu mbandu: mampa, bambuma (mankondo), nguba, mikati to bagato. Beno fwete tula bima bonso masa, kafe to te na kima mosi yina kepasukaka ve sambu na kubuya ba aksida. Ata muntu mosi ve kele ti nswa ya kunata malafu na lukutakanu ya distrike. Kana beno nata madya na beno ti bima yina beno lenda nwa, beno tavanda ve na mfunu ya kusumba yo na bateki. Kubuya kusumba bima na bantu yina kele na nganda tasadisa beto na kupesa kimbangi ya mbote na yina metala bunkete na beto. (Beno simba nde: Bateki kele ve ti nswa ya kukota na kisika ya lukutakanu na konso ntangu yina.—Yoa. 2:13-17.)
◼ Makabu: Beto lenda tula makabu ya luzolo ya mbote na Nzo ya Kimfumu na beto to na lukutakanu ya distrike sambu na kumonisa ntonda na beto na bangidika ya lukutakanu mpi na kisalu yina kesalama na ntoto ya mvimba.
◼ Ba Aksida mpi Maladi ya Kintulumukina: Bampangi yina kesalaka na departema ya ketalaka maladi ya kintulumukina kubokutaka nde bampangi mingi kebingaka bo sambu na mambu ya fyoti kibeni. Kana maladi kukanga muntu na kintulumukina na kisika ya lukutakanu ya distrike, beto kelomba beno na kusolula ti mpangi mosi ya kisalu ya kuyamba bantu, ebuna yandi tasukinina ve na kuzabisa departema ya Lusadisu ya Ntete na mpila nde bampangi yina kele na lukutakanu mpi ya mezaba kisalu yango mbote kutala nene ya maladi yango mpi kupesa lusadisu na bo.
◼ Kubaka Ndinga: Beno fwete kangisa ve konso masini yina ya kubakila ndinga na kura to na bansinga ya mikro ya kisika ya lukutakanu, kansi beno lenda baka ndinga na mutindu yina tavwalangasa ve dikebi ya bantu yankaka.
◼ Kubaka Bafoto: Kana beno kebaka bafoto na ntangu programe kesalama, beto kelomba beno na kusadila ve flashe. Beto kelomba beno mpi na kubinga ve bantu yina kekangaka bafoto na kukwisa na kisika ya lukutakanu. Kana beno mona bantu yango kekanga bafoto na kisika ya lukutakanu, beno kwenda ve na bo sambu bo kanga beno bafoto.—Yoa. 2:13-17.
◼ Batelefone: Beno fwete sala na mpila nde yo bebisa ve dikebi ya bawi.
◼ Bunkete: Mbala mingi, yo kemonanaka nde bantu yina kesumbaka madya na bateki kelosaka bapapie na ntoto to basashe ya bo kekangilaka bo bima yango. Yo kesalaka nde kibansala ya mvimba kufuluka ti bapapie, basashe, babusho ya milangi mpi buna na buna. Kana muntu mebaka lukanu ya kusumba kima mosi na bantu yina ketekaka (mu mbandu: bazoka, babisikwiti, bagato, bitini ya bambisi to konso kima yankaka), pana yandi kele ti mukumba ya kulosa papie to sashe yina na kati ya bitunga ya bima ya mvindu kansi na ntoto ve. Kana beto memona nde muntu mosi melosa papie to sashe na ntoto, beto fwete lokuta yo mpi kulosa yo na bitunga ya bima ya mvindu. Bampangi, beto kelomba beno na kusala mpenza kikesa sambu kisika ya beto kesadila lukutakanu na beto ti nzyunga na yo kubikala bunkete. Konso muntu yina kele na lukutakanu fwete tadila dyambu ya bunkete na ntima mosi. Kana konso muntu kusala dikabu na yandi, na nsuka ya kilumbu, kisika ya lukutakanu tabikala bunkete. Beto kezola kumonisa bikalulu ya Nzambi yina beto kesambilaka sambu yandi kele santu.—1 Pie. 1:15, 16; Kub. 19:10; Kul. 23:14.
◼ Na Bisika na Beto ya Kulala: (1) Kana bo mepesa beto kisika ya kulala, beto fwete lutisa ve ntalu ya bantu yina munkwa nzo mepesila nswa. (2) Kana nge tazola ve kuvanda na nzo yina bo mepesa nge, beto kelomba nge na kutuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka konso ngidika yina kele mfunu. (4) Kusadila ve na mutindu ya mbi konso ngidika yina bampangi mebaka sambu na banzenza. Beto fwete sadilaka bukatikati. (5) Bunkete kekwendaka kumosi ti kikalulu ya kukangama na Nzambi. Kisika na beno ya kulala fwete vanda ntangu yonso bunkete mpi na ndonga. Dyambu yai ketadila mpi Nzo ya Kimfumu, yina beno lenda sadila bonso kisika ya kulala sambu na bampangi yina kekatukaka na mabundu ya ntama. (6) Monisa mbuma ya mpeve na mutindu na nge ya kuzinga ti bankaka, yo vanda ti munkwa nzo to ti bampangi Bakristu yankaka yina lenda vanda nzo mosi to kisika mosi ti nge.—Gal. 5:22, 23.